പാപ കർക്കിടകം

വിവാഹം കഴിഞ്ഞ ശേഷമുള്ള ആദ്യത്തെ ഓണം.
ചിത്രയുടെ വീട്ടിലേക്കുള്ള ഓണക്കോടികളും ആട്ടിറച്ചിയും ഇന്നലെ ഉത്രാട പാച്ചലിനിറങ്ങിയപ്പോൾ വാങ്ങി വേറെത്തന്നെ പാക്ക് ചെയ്തു വച്ചിരുന്നു. രാവിലെ മാമാനത്തും പറശ്ശിനിയും തൊഴുതശേഷം അവളുടെ വീട്ടിലേക്കിറങ്ങാൻ നിൽക്കെയാണ് ക്ലബ്ബിൽ നിന്നും ചിത്രയ്ക്ക് രയിശന്റെ കോൾ.

'ചേച്ചി, നിങ്ങൾ വീട്ടിലേക്ക് പോകുന്നില്ലേ?'
 

'ഞങ്ങളിറങ്ങാൻ നിൽക്കുവാണ്, ചേട്ടൻ കാർ മുറ്റത്തേക്കിറക്കി തിരക്ക് കൂട്ടുന്നുണ്ട്.'


'എന്നാൽ ക്ലബ്ബിന്റെ അടുത്ത് നിർത്താൻ പറ, ഞാനും വരാം. ഓണക്കോടിയൊക്കെ നിങ്ങൾ വാങ്ങീട്ടുണ്ടാവുവല്ലോ.'


കല്ല്യാണം കഴിഞ് ഒരുവർഷത്തിന് ഇനി പന്ത്രണ്ട് ദിവസം. ഇതുവരേക്കും രയിശൻ മുന്നേ വരാമെന്ന് പറഞ്ഞു പറ്റിച്ച പലദിവസങ്ങളും ക്ലബ്ബെത്തുന്നതുവരെ ചിത്ര ഓർത്തു പറയുമ്പോൾ അത്ഭുതം സന്തോഷത്തിന്റെ വകഭേദങ്ങളോടെ മുഖത്തുകണ്ടു.

ചിത്രയുടെ വീട്ടിൽ പോയാൽ അകത്തേക്ക് കയറുന്ന പതിവ് കുറവാണ്.
കൂട്ടുകുടുംബമാണ്. എന്തുകരുതുമെന്ന ചിന്ത മാറാനുള്ള പരിചയം വന്നിട്ടില്ല. കാലുനീട്ടി തുരുമ്പുപിടിച്ച നൂൽ കസേരയിലിരിക്കും.


'ചായ എടുക്കട്ടേ? ചെത്താൻ പോയിട്ടില്ലേ? വിശേഷം വല്ലതും?' എന്നതിൽ കവിഞ്ഞുള്ള വർത്തമാനവും കുറവാണ്.


രയിശൻ അടുക്കളയിൽ കല്ല്യാണത്തിന് ശേഷംതൊട്ടുള്ള വിശേഷം പറച്ചിലാണ്.
കോട്ടത്തും, ആലക്കക്കാരുടെ പൂക്കളവും കണ്ട്  തിരിച്ചുവന്നപ്പോഴേക്കും മൂന്നു മണിക്കൂർ.

വീട്ടിലെത്തി അടുക്കളയിലെ ടേബിളിനു ചുറ്റും അഞ്ചുപേരും വട്ടത്തിലിരുന്നു.

ഓണവും വിഷുവും കർക്കിടവാവും മാത്രമാണ് എല്ലാവരും ഒരുമിച്ചിരിക്കുന്നതെന്ന് അപ്പോഴോർത്തു.
കഴിഞ്ഞ വാവിന് തിരുനെല്ലിയായിരുന്നു. അമ്മമ്മയുടെ ബലിപൂജ.

ഇനി വണ്ടിയെടുക്കാൻ എന്നെ വിളിക്കരുതെന്ന് ചിത്രയെ ഓർമിപ്പിച്ചശേഷം രയിശനു പിന്നാലെ രഞ്ജിത്തും ക്ലബ്ബിലേക്കിറങ്ങി.
എട്ട് ലിറ്റർ കള്ളും, രയിശൻ സംഘടിപ്പിച്ച രണ്ടു സ്ക്കോച്ചും പതിമൂന്നുപേരും.
ക്ലബ്ബിന്ന് മാറിയുള്ള പുഴക്കരയിൽ പിന്നെയൊരു ബഹളമായിരുന്നു. കഴിഞ്ഞയാഴ്ചത്തെ ഓണപ്പരിപാടികളുടെ കുറ്റവും കുറവുംതൊട്ട് എങ്ങോട്ടേക്കോ പോയി. പാട്ടും ആട്ടവും ബഹളവും.
മനസ്സറിഞ്ഞുള്ള ഏതോരുവന്റെ സന്തോഷത്തിന്റെ താക്കോൽ പൂട്ട് തുറന്നപോലെ പരമാനന്ദസുഖം പതിമൂന്നുപേരിലേക്കും മഞ്ഞുപോൽ മൂടിയിരുന്നു.

രാവിലെ ചെത്താൻ തെങ്ങിലേക്ക് എങ്ങനെ വലിഞ്ഞുകയറിയെന്ന് ഇപ്പോഴും ഓർമ്മയില്ല. ഡീഹൈഡ്രേഷൻ, ഭക്ഷണം അകത്തേക്ക് കയറാത്ത അവസ്ഥ.
ഉപ്പിട്ട നാരങ്ങാവെള്ളം കപ്പിൽ കലക്കി ഓണക്ഷീണം തീർക്കാൻ മുറ്റത്തിരുന്നു.

'രഞ്ജിത്തേ..രഞ്ജിത്തേ ..'
കുന്നിൻപുറത്തു നിന്നും നാരാണേട്ടൻ മുറ്റത്തേക്ക് ഓടിവരുന്നു. വിയർത്ത് വിറച്ച്. വായ തുറക്കാനാവാതെ പിന്നിലേക്ക് കൈ ചൂണ്ടി. പാമ്പിനെ വല്ലോം കണ്ടു പേടിച്ചിട്ടാവുമെന്ന് ഊഹിച്ചു. കാത് ചെരിച്ചുവച്ച് മുന്നിൽ നിന്നു.

'രയിശൻ തൂങ്ങി..'
ആദ്യം മനസ്സിലായില്ല. പലകുറി അയാളത് ആവർത്തിച്ചു.
അമ്മയും ചിത്രയും മുറ്റത്തേക്ക് പാഞ്ഞുവന്നു.
കണ്ണിൽ ഇരുട്ട് കേറി. കൈ വിറയ്ക്കാൻ തുടങ്ങി. അകത്തുകയറി രയിശന്റെ മുറിയുടെ വാതിലിനു മുട്ടി. തുറക്കാത്തതിനാൽ വാതിൽ തുറന്ന് അകത്തുകയറി. നെഞ്ചിൽ കാളിയാൻ മിന്നി.

കുന്നുംപുറത്തേക്ക് ഓടിക്കയറി. പ്ലാവിന്റെ കൊമ്പത്തു തൂങ്ങിയാടുന്ന രയിശന്റെ കാലുകളിലൂടെ ഇന്നലപെയ്ത മഴയുടെ ബാക്കി തുള്ളികൾ.

പുലർച്ചെ മൂന്നുമണിവരെ ഒരുമിച്ചിരുന്ന, പാട്ടുപാടിയ, ആഘോഷിച്ച ജീവനറ്റ അവന്റെ ശരീരം. കഴിഞ്ഞ ഇരുപത്തിയേഴു വർഷങ്ങളുടെ തയമ്പ് പറ്റിയ കൂടെപിറപ്പിന്റെ ജീവനില്ലാത്ത ശരീരം.
മരവിച്ച വിരലുകൾ, ഇരുട്ട് പിടിച്ച മുഖം.

ആരോവന്ന് കയറഴിച്ചപ്പോൾ അനക്കമില്ലാതെ താഴേക്ക് വീഴുന്ന അവന്റെ ശരീരം കണ്ടു.
പോലീസ് ജീപ്പും ആംബുലൻസും ആൾക്കൂട്ടവും.
കാഞ്ഞിരകൊള്ളിക്ക് തീ കൊളുത്തി ശ്മശാനത്തിൽ നിന്നിറങ്ങിവന്ന ശേഷം വാതിലടച്ചു.
രണ്ട്, മൂന്ന്, നാല് സിഗരറ്റുകൾ ആവർത്തിച്ച് കൊളുത്തി. സിഗററ്റിനൊപ്പം മൂന്നു ദിനരാത്രങ്ങൾ മാഞ്ഞുപോയി.

സഞ്ചയത്തിന് പുറത്തേക്കിറങ്ങി. 
വിശ്വസിക്കാനാവാതെ പതിനൊന്നുപേർ മുറ്റത്തിരിക്കുന്നുണ്ട്. മൂക്കറ്റം കുടിച്ചിട്ടുണ്ട്. സജീവന്റെയും വിത്തിന്റെയും നനഞ്ഞ കണ്ണുകൾ.
പോക്കറ്റിൽ നിന്നും കിട്ടിയ അഞ്ചുവരിയിൽ കാരണങ്ങളൊന്നുമില്ല.
മാപ്പപേക്ഷയെന്നപോലെ വെറും അഞ്ചുവരി. അച്ഛന്, ചിത്രയ്ക്ക്, അമ്മയ്ക്ക്, കൂട്ടുകാർക്ക്, പിന്നെ രഞ്ജിത്തിന്.
കാലത്തിന്റെ കൈകളിലേക്ക് ഓർമ്മയായി സ്വയം മാറിയൊരാളുടെ പിഴച്ച കണക്കുകൂട്ടലിനു പിന്നിലെ കാരണങ്ങൾ ആരും ചർച്ചചെയ്യാൻ തുനിഞ്ഞില്ല. അത്രയേറെ വിഷാദമാക്കുന്ന ഒന്നിനെക്കുറിച്ചും മനുഷ്യൻ ദീർഘകാലം ചിന്തിച്ചിരിക്കില്ലെങ്കിലും ബാക്കിയില്ലാത്ത മനുഷ്യരൊക്കെ കുറ്റബോധമെന്നപോൽ കണ്ണിനുമുന്നിൽ വന്നുനിൽക്കുമെന്ന് പോയവന് അറിയുമായിരുന്നിരിക്കണം.


ചിത്ര അദിതിയെ നാലുമാസം വയറ്റിൽ ചുമക്കുമ്പോഴാണ് അന്തിചെത്തിനിടെ തെങ്ങിൽ നിന്ന് വീഴുന്നത്, നട്ടെല്ലിനും വലതുകാലിനും സാരമായ പരിക്കോടുകൂടി മംഗലാപുരം കെഎംസിയിൽ ആറുമാസം. 


'ഷാപ്പിൽ കള്ളുകൊടുത്തു കഴിഞ്ഞാൽ നേരെ ഇങ്ങോട്ട് വരണം'

'വന്നിട്ട്?'

'എന്റെ വയറു തടവി ഇവിടിരിക്കണം'

'മുഴുവൻ സമയവുമോ?'

'ഉച്ചയ്ക്കും അന്തിക്കും ചെത്താൻ പോട്' ഞാൻ ചിരിച്ചു.

രണ്ടാമത്തെ മാസമാണ് വയറ്റിലുണ്ടെന്ന് അറിയുന്നത്. സന്തോഷം ഒരു പ്രഭാവലയം പോലെ അവളെ പൊതിഞ്ഞുനിന്നു. ആഹ്ലാദം ചിറകുനൽകി.
കുഞ്ഞാഗ്രഹങ്ങൾ പോലും സാധിക്കാതെ എന്ത് ഭാഗ്യംകെട്ട ജീവിതമാണ് എന്നോടെത്തെന്ന ചിന്തകൾ എന്നിലേക്ക് ചാഞ്ഞിറങ്ങി.

കീറിമുറിച്ച അടിവയറ്റിലെ വേദനയിൽ എനിക്കപ്പുറം കിടന്ന് അലമുറയിടുന്നത് നോക്കി പകലും രാത്രിയും ഞാൻ മുഖം പൊത്തി കരഞ്ഞു. ചിറകറ്റ് വീണുപിടയുന്ന ചിത്രയെ ഞാൻ കണ്ടു. അവളെ അനുഗ്രഹിക്കണമേ ദൈവങ്ങളേയെന്ന് ഞാൻ പ്രാർത്ഥിച്ചു.

നടുപൊന്തി വീൽചെയറിൽ മുറ്റത്തേക്കിറങ്ങാൻ പാകമാകുമ്പോഴേക്കും അദിതിക്ക് മൂന്നുമാസം കഴിഞ്ഞിരുന്നു.
സന്ദർശകരുടെ എണ്ണം പതിയെ കുറഞ്ഞുവന്നു. ചാപ്പയിലെ സത്യേട്ടൻ മുറതെറ്റാതെ അന്തിക്കേറി വരുമ്പോൾ കേറും. എന്തേലും പച്ചക്കറിയോ മറ്റോ ഞേറ്റിയാവും.

'സുരേശനും തെങ്ങിന്ന് വീണതോടെ ചെത്താൻ ആളില്ലടാ'

'സുരേശന് ഇപ്പൊ എങ്ങനെ?'

'വാരിയെല്ല് പൊട്ടീന് പോലും, മംഗലാപുരത്തന്നെ'

കൊല അഴിച്ചുവിടാൻ പറഞ്ഞു. സുരേശന്റെ വീട് എങ്ങനെ കഴിയുമോ എന്തോ. സത്യേട്ടനും ഞാനും അടക്കം പറഞ്ഞു.
ഇൻഷുറൻസ് ഇല്ല എന്നത് ചെത്തുകാരുടെ ഒരു ശാപമാണ്. പ്രീമിയത്തിന്റെ കണക്ക് നോക്കിയാൽ അതടക്കാൻ കള്ള് വെക്കുന്നത് പോലാവും.

ബ്രാഞ്ച് സെക്രട്ടറിയുടെ ഫോൺ സംസാരം മുറ്റത്തുന്നു കേട്ടു.
വെളിച്ചെണ്ണയും ചില ബേക്കറി കവറുകളും ചിത്രയെ ഏൽപ്പിച്ചു. ചില പേപ്പറുകൾ നേരെ നീട്ടി, തുറന്നു നോക്കാതെ ടീവിയുടെ ശബ്ദം കുറച്ചു.

'കോ-ഓപ്പറേറ്റിവ് ബാങ്കിന്റെ കലക്ഷൻ ഏജന്റായി ഒരൊഴിവുണ്ട്, പിന്നെയൊന്ന് നീതിസ്റ്റോറിലും.' സെക്രട്ടറി പറയുമ്പോൾ ചിത്രയെ തിരിഞ്ഞു നോക്കി. അച്ഛനും അമ്മയും കട്ടിലിനടുത്തു വന്നുനിന്നു.

'എന്താ കുഞ്ഞിരാമാട്ട?' അച്ഛന് നേരെതിരിഞ്ഞ് സെക്രട്ടറി ആരാഞ്ഞപ്പോൾ ചിത്രയുടെ പുറത്തുതട്ടി അവൾക്ക് മാത്രമായി തീരുമാനം വിട്ടുകൊടുത്തു.

സന്ദേഹങ്ങൾ ഒന്നുമില്ലാതെതന്നെ അവൾ ബാങ്കിലെ കലക്ഷൻ ഏജന്റ് ജോലി ഉറപ്പിച്ചു. പണക്കണക്കും സുഖവും മറ്റും നോക്കിയാൽ നീതിസ്റ്റോറിലെ ജോലിയാണ് ഭേദമെന്ന ധാരണ ചിത്രയ്ക്കുണ്ടായിരുന്നു.

'കുഞ്ഞുള്ളതല്ലേ, കലക്ഷൻ ഏജന്റിനിറങ്ങാം. അതാവുമ്പോ സമയം നോക്കി ഇറങ്ങാലോ.' ചിത്ര അഭിപ്രായം പറഞ്ഞു. കട്ടിലിനോരത്തിരുന്നു. ചിത്രയുടെ വിരലുകൾ രഞ്ജിത്തിന്റെ തയമ്പ് പിടിച്ച കൈക്കുള്ളിലൊതുങ്ങി. ഇരുവർക്കിടയിലും മൗനഭാഷ ഒഴുകിനീങ്ങുന്നത് സെക്രട്ടറി കണ്ടു. രണ്ടുമൂന്ന് ഫോം ഒപ്പിട്ടു വാങ്ങി. 



വീൽചെയറും വാക്കറും ഒഴിവാക്കിയപ്പോഴേക്കും വലതുകാലിന്റെ മുടന്ത് തെളിഞ്ഞുവന്നു. പുറത്തേക്കിറങ്ങാൻ മടിയായിരുന്നു. നടക്കാൻ പറ്റിയത് ഭാഗ്യമെന്ന് ആലോചിച്ചു. ഗർഭകാലം ഉശിരോടെ കൂടെ നിൽക്കാൻ കഴിയാഞ്ഞത് ഒരുഗർഭകാലം ചിത്രയുടെ കൂടെ വൈകുന്നേരങ്ങളിൽ കലക്ഷന് നടന്നുതീർക്കാമെന്ന് കരുതി. അവളുടെ കൂടെ നടന്നു. അദിതിയെ തോളിലേറ്റി.
വൈകുന്നേരത്തെ പാർട്ടി ഓഫീസിലേക്കുള്ള നടത്തിനിറങ്ങുമ്പോൾ അച്ഛൻ വാതിൽ പൂട്ടി മീറ്റർപെട്ടിയിൽ വച്ചു. അമ്മ തൊഴിലുറപ്പുശേഷം വഴിയിൽ കാത്തു നിൽക്കും.

ഒരു ഗർഭകാലം.


താൽക്കാലികമായി വളംഡിപ്പോയിൽ കയറി. മുടന്തൻറെ വളം ഡിപ്പോയെന്ന് പേരുവീണത് ഞായറാഴ്ച്ച ചാപ്പയിൽ പോയിരിക്കെ ചെത്തുകാർ പറഞ്ഞറിഞ്ഞു. കുറുപ്പിന്റെ വളംഡിപ്പോ അങ്ങനെ മുടന്തൻറെ വളംഡിപ്പോയായി.

'സ്കൂട്ടർ വാങ്ങുന്നതിനെപ്പറ്റി എന്താ അഭിപ്രായം?' ഞാൻ ചിരിച്ചു. ജോലിക്കാർക്ക് എന്തും ആവാലോയെന്ന് തമാശ പറഞ്ഞു.

പൊടുന്നനെയെന്നപോലെ തുടരെത്തുടരെയുള്ള അച്ഛന്റെ വയറുവേദന.
മൂത്രാശയത്തിൽ പഴുപ്പ്, കാൻസർ നാലാം സ്റ്റേജ്. പലകുറി തലശ്ശേരി കാൻസർ സെന്ററിൽ. ഓണം കഴിഞ്ഞു റേഡിയേഷൻ തുടങ്ങണമെന്ന് തീരുമാനിച്ചു. 

'വൈകിപ്പിക്കേണ്ട, ശനിയാഴ്ച്ച ഓണം. അത് കഴിഞ്ഞ് തിങ്കളാഴ്ച പോകാമെന്ന്' ഞാനും പറഞ്ഞു. 
അച്ഛനെ മാനസികമായി ഒരുതരത്തിലും ബാധിച്ചില്ലെന്ന് കാണിക്കാനുള്ള ശ്രമങ്ങളായിരുന്നു പിന്നെ. ദിവസവും പാർട്ടി ഓഫീസിൽ നാലാം സ്റ്റേജ് ക്യാൻസറിനെ പറ്റിയുള്ള ചർച്ചകളായിരുന്നു. ക്യാൻസറിനെക്കുറിച്ചുള്ള എന്തെങ്കിലും വീഡിയോകൾ ദിവസവും വാട്സാപ്പ് ഗ്രൂപ്പിലേക്കിടും. 
റേഡിയേഷന് മുന്നേ അത്രയേറെ തയ്യാറെടുപ്പ് നടത്തി. വായനശാല ഗ്രൂപ്പ് കാൻസർ പ്രതിരോധ ഗ്രൂപ്പായി മാറിയെന്ന് ബ്രാഞ്ച്‌സെക്രട്ടറി തമാശപറയും.

രയിശ് പോയ രണ്ടാമത്തെ ഓണം. 

മൂടുപടം പോലെ ആഘോഷങ്ങൾ വേണ്ടെന്ന്, ഇക്കുറിയും ഇങ്ങനെപോട്ടെന്ന് പറഞ്ഞത് ചിത്രയാണ്. പത്രത്തിൽ കൊടുക്കാനുള്ള ഫോട്ടോയും മാറ്ററും അയച്ചുകൊടുത്തു.

'റേഡിയേഷൻ നല്ല വേദനയുണ്ടാവും അല്ലെ' സോഫയിൽനിന്ന് തല ചെരിച്ച് അച്ഛന്റെ ചോദ്യം.

'വേദനയില്ലാതിരിക്കാനല്ലേ മരുന്ന്' ചിത്ര പറഞ്ഞു.

'യൂണിയന്റെ ഒരു വീടുണ്ട്, റേഡിയേഷന് വരുന്നവർക്ക് താമസിക്കാനുള്ളത്. മൂന്നാഴ്ച പോയിട്ട് വരാനാക്കണ്ട, നമുക്ക് അവിടെ നിൽക്കാം. ആഴ്ചയിൽ വന്നുപോകുന്നതാണ് ഭേദം.'
യാത്രാപ്രശ്നം അങ്ങനെ പരിഹരിച്ചു.
'മറ്റന്നാളല്ലേ പോണ്ടത്. തുണിയൊക്കെ എടുത്തു വെക്കണ്ടേ' മനസ്സിന് താങ്ങാനാവാത്ത ആകുലതകളിൽ ശരീരം വിറയ്ക്കുന്നത് അച്ഛന്റെ നടത്തത്തിൽ കണ്ടു. 

'വീട്ടീന്ന് ആദ്യമായി മാറിനിൽക്കുന്നതിന്റെയാണ്' അമ്മ അച്ഛന് പിന്നിൽ നടന്നു. ഒരു പാരമ്പര്യം പോലെ.

'നാലുദിവസം കഴിഞ്ഞാൽ അദിതിക്ക് ഒരുവയസ്സ് തികയും, നാലാളെ വിളിച്ച് ഭക്ഷണം ഒരുക്കണ്ടേ' കട്ടിലിൽ അടുത്ത ചിന്തകളുമായി ചിത്രയും വന്നു.

'വിളിക്കണം, ക്ഷണിക്കണം. മംഗലാപുരം കൂടെകിടന്നവരെയും,  പകരം ചെത്തിയവരെയും വിളിക്കണം. അച്ഛൻ പോകുന്നതിനുമുന്നെ ചെറിയൊരു കേക്ക് മുറിക്കാം.' കൂട്ടിമുട്ടാത്ത വരവുചിലവു കണക്കുകൾക്കിടയിൽ സ്നേഹപ്രകടനങ്ങൾക്ക് കുറവ് വരരുതല്ലോയെന്ന് കണക്കുകൂട്ടി.
സാധരണ കിടക്കാൻ നേരം അദിതിയുടെ ഉറങ്ങാതെയുള്ള കളിയുള്ളതാണ്, നേരത്തെ കിടന്നു. ചിത്ര എന്തൊക്കെയോ പറഞ്ഞു, മനസ്സ് ഒന്നും കേട്ടില്ല.

സത്യേട്ടന്റെ ഫോണിൽ പറയുന്ന ശബ്ദംകേട്ട് ഉറക്ക് ഞെട്ടി. 

'പ്ലാവിൻ കൊമ്പില്, പുലർച്ചെ ആണെന്ന് തോന്നുന്നു..' എഴുനേറ്റ് പുറത്തിറങ്ങിയപ്പോൾ ചിത്രയും അമ്മയും അടുക്കളപ്പടിയിൽ നിലത്തിരുന്നു കരയുന്നു.

'അച്ഛൻ പോയി' ചിത്ര പറഞ്ഞു.

'എങ്ങോട്ട് പോയി' കണ്ണീർ കവിളിലൊട്ടി. 
അമ്മയുടെ കരച്ചിൽ.
കുന്നുംപുറത്ത് ആൾക്കൂട്ട ബഹളം.

വെട്ടിത്തെളിച്ച കുന്നുംപുറത്തെ രയിശൻ തൂങ്ങിയ അതേ പ്ലാവിൽ. അതേ കൊമ്പിൽ തൂങ്ങിയാടുന്ന കാലുകൾക്കിടയിലൂടെ വെളിച്ചം അടുക്കളവാതിലിൽ തട്ടി. തൂങ്ങിയാടുന്ന ജഡം എനിക്കന്ന്യമല്ലാത്ത വളരെ പരിചിതമായ ഒന്നുപോലെ തോന്നി.

പോസ്റ്മാർട്ടത്തിനു ശേഷം അകത്തെടുത്തു കിടത്തി. 

'ഇനി വേദന സഹിക്കണ്ടല്ലോ' അമ്മയെ ആശ്വസിപ്പിച്ചു.
ഇന്നലെ രാത്രി ആകുലതകൾ പങ്കുവച്ച വറ്റിയുണങ്ങിയ ഒരു സാധാരണ മനുഷ്യൻ ജഡമായി ഓലപ്പായയിൽ വെള്ളപുതച്ചു കിടക്കുന്നു.
റേഡിയേഷന് പോകാനുള്ള തുണിയെടുത്തുവയ്ക്കുന്നത് ആലോചിച്ചുകിടന്ന ആ മനുഷ്യൻ ഏത് നേരത്തായിരിക്കും മരിക്കാനുള്ള തീരുമാനമെടുത്തു കാണുക. മകന്റെ ഓർമ്മകളും അവൻ പോയവഴിയും ഓർത്തെടുത്തു അതിലേതന്നെ പോകുവാൻ എന്ത് കാരണമായിരിക്കും കണ്ടെത്തിയിരിക്കുക.
ഓർമ്മകളിൽ രയിശൻ തൂങ്ങിയാടി, അപരിചിതമായൊരു വാതിൽ തുറന്ന് അകത്തു കടക്കുന്നതുപോലെ, മരണം പതിയെ പരിചിതമായിത്തീർന്നു.

ഓരോ ഓർമ്മയും ഒരു കല്ലായി ഹൃദയത്തിലേക്ക് പതിഞ്ഞു. കണ്ണിൽ നിന്നൊരൽപ്പം ബാഷ്പം അദിതിയുടെ മുഖത്തേക്കുറ്റി.
ജഡമായി ശൂന്യമായി വേദനകളറിയാതെ കിടക്കുന്നത് കണ്ണടച്ചുനോക്കി. അദിതിയുടെ മുഖം വന്ന് നെഞ്ചത്ത് ആഞ്ഞൊരു കുത്ത്. അവൾ കരച്ചിൽ നിർത്തിയിട്ടില്ല. ഉച്ചക്കുറങ്ങിയിട്ടില്ല, വൈകിട്ട് പുഴക്കുപോയിട്ടില്ല.


മൂന്നാം ദിനം സഞ്ചയനം. വിളിക്കാതെ പലരും വന്നു. 
തന്റെ ആദ്യ ജന്മദിനം പിണ്ഡബലികണ്ടുണരേണ്ടിവരുന്ന അദിതിയുടെ ദുരവസ്ഥയെക്കുറിച്ചു മാത്രമാണ് ഞാനന്നോർത്തത്.

ശേഷംവന്ന കുംഭം തെല്ലല്ലാത്ത ആവേശത്തോടെ മീനത്തെയും ഇടവത്തെയും വിളിച്ചപ്പോൾ അടുക്കളഭാഗം നിലംപതിച്ചു. ലോണെടുത്ത് അടുക്കള വാർത്തു. വർക്കേരിയ കൂട്ടിയെടുത്തു. ഞെരുക്കത്തിലും അത് അനിവാര്യമായിരുന്നു.
കാലചക്രം തിരിഞ്ഞു. മലയാളമാസം നോക്കി അച്ഛന്റെയും രയിശന്റെയും ഫോട്ടോ ഒരുമിച്ചു പത്രത്തിൽ കൊടുത്തു. ഒരേ ഛായയുള്ള രണ്ടുമുഖങ്ങൾ.'വേദനയോടെ കുടുംബാങ്ങങ്ങൾ'.

അച്ഛൻ പോയതിനു ശേഷം അമ്മ പുറത്തേക്കിറങ്ങിയിട്ടില്ല. ശൂന്യതയുടെ കനം ഒരു കരിമ്പടം പോലെ ഇറങ്ങിവന്നു. ചിത്രയും അദിതിയും പോലും അമ്മയ്ക്ക് അപരിചിതരാവുന്നതുപോലെ.

ഇംഗ്ലീഷ് കലണ്ടറിൽ അദിതിയുടെ രണ്ടാം ജന്മദിനത്തിലേക്ക് പതിമൂന്ന് ദിവസം.

ചിത്രയോട് കുറച്ചുദിവസം വീട്ടിൽപോയി നിൽക്കാൻ പറഞ്ഞു. വേണ്ടെന്ന് അവൾ തീരുമാനിച്ചെങ്കിലും നിർബന്ധപൂർവ്വം പറഞ്ഞയച്ചു, ഓർമ്മകൾ ബാധ്യതയാവരുതെന്ന് ഓർമ്മപ്പെടുത്തി. 
അമ്മയുടെ അടുത്ത് ചേർന്നു കിടന്നപ്പോൾ, അച്ഛന്റെ ഓർമ്മകൾ അടഞ്ഞ വാതിലുകൾക്കുള്ളിൽ ഒരു കൊടുങ്കാറ്റ് പോലെ അലറിവിളിച്ചു. അമ്മയുടെ ഓരോ തേങ്ങലും ആ കൊടുങ്കാറ്റിൽ ശൂന്യതയുടെ കനത്ത തിരശ്ശീലകളെ തട്ടിമറച്ചു, അവശേഷിപ്പിച്ചത് തണുത്ത നിസ്സഹായത മാത്രം.
പതിമൂന്നു ദിവസത്തിനിടയിൽ കലക്ഷനിടെ ചിത്ര ഇടയ്ക്ക് സ്‌കൂട്ടറിൽ വന്നുപോയി.

പതിനാലാം നാൾ ചിത്രയുടെ വീട്ടിൽ ചെന്നു. പ്ലാസ്റ്റിക് കസേരയിൽ കാലു നീട്ടിയിരുന്നു. 

'പാപകർക്കിടകത്തിനു വേണ്ടത് ചെയ്യണം' ചിത്രയുടെ അച്ഛൻ ഉപദേശിച്ചു. മൂലയിൽ തുരുമ്പുകൾക്കിടയിൽ നൂലു കസേര ഒരു സിംഹാസനം പോലെ കിടന്നു. അതെന്നെ നോക്കിയൊന്ന് ഞെരുങ്ങി.

'കർമ്മചക്രം സദാ ഭ്രമ്യം, പ്രകൃതി നിയമം അലംഘ്യം.

കർക്കിടകേ ദുരിതം ഛേദിപ്പാൻ.
മരുന്നുകഞ്ഞി മമ ദേഹത്തിൻ, ആയുസ്സേകിടുമെന്നെന്നും' അച്ഛനെ നോക്കി ചിരിച്ചു.
അച്ഛൻ തലയിൽ കൈവച്ചപ്പോൾ ദേഹമൊന്ന് വിറച്ചു.
ചിത്രയുടെ പിറകിൽ സ്‌കൂട്ടറിലിരിക്കുമ്പോൾ അച്ഛൻ തലയിൽ കൈവച്ചതിന്റെ അർത്ഥവകഭേദങ്ങൾ തിരഞ്ഞ് മനസ്സ് കുന്നുകയറി.

ഈ കുംഭക്കൂറിലും ഒന്ന് കുലുങ്ങി.

ബാങ്കിന്റെ ഓഡിറ്റിങ് നടക്കുന്നു. ബ്രാഞ്ച് മാനേജരും ഡയറക്ടർ ബോർഡിലെ രണ്ടുപേരും വീട്ടിലേക്ക് വന്ന് ചിത്രയുടെ പാസ്സ്ബുക്കുകൾ എല്ലാം എണ്ണിത്തിട്ടപ്പെടുത്തി ബാങ്കിലേക്കെടുത്തു. രണ്ടുദിവസത്തിനുള്ളിൽ ബാങ്കിൽ ഹാജരാവാനുള്ള നോട്ടീസും. 


'പേടിക്കാനൊന്നുമില്ല, ഓഡിറ്റിങ് വെരിഫിക്കേഷനാണ്' കാര്യം മനസ്സിലായില്ല.
ചിത്രയെ അദൃശ്യമായൊരു കാറ്റ് പിടിച്ചുലച്ചു.

ബാങ്കിൽ ചെന്നു. 

'ഡേ ഡെപ്പോസിറ്റ് അക്കൗണ്ടിലെ പണം ടാലിയാവാത്തതിലുള്ള പ്രശ്നമാണ്. ബാങ്കിൽ അടച്ചതായി കാണുന്നില്ല.'
അങ്ങനെവരാൻ വഴിയില്ലെന്ന് ചിത്ര ആവർത്തിച്ചു പറയുന്നുണ്ട്. 

'നമുക്ക് നോക്കാം, ചിലപ്പോൾ ക്ലറിക്കൽ മിസ്റ്റേക്ക് വല്ലതുമായിരിക്കും.' ബാങ്ക് സെക്രട്ടറി ആശ്വസിപ്പിച്ചു.



ബ്രാഞ്ചിലെ ക്ലർക്ക് സൗമ്യ ലഡ്ജറിൽ കൃത്രിമം കാണിച്ചതാണ്. മൂന്നു കലക്ഷൻ ഏജന്റുമാർ ഏൽപ്പിച്ച പലരുടെയും പണം ലഡ്ജറിൽ മാർക്ക് ചെയ്യുകയോ ബാങ്കിൽ നിക്ഷേപിക്കുകയോ ചെയ്തിട്ടില്ല. ഏജന്റുമാർ അറിയാതെ നടക്കില്ലെന്ന് ടെക്‌നിക്കലായി പറയാമെങ്കിലും വിശ്വസിക്കുന്നവരിൽ നിന്നും ആരെങ്കിലും വഞ്ചന പ്രതീക്ഷിക്കുന്നുണ്ടോയെന്ന വരട്ടുവാദം വിലപോകില്ലല്ലോ. സൗമ്യയെ സസ്പെൻഡ് ചെയ്തു. നിയമപരമായി പിരിച്ചിവിടും.
ബാങ്കിനെയോ കസ്റ്റമറെയോ ബാധിക്കുന്നില്ലെങ്കിലും മറുപടിപറയേണ്ടത് ഏജന്റുമാരാണ്.
സമാധാനത്തോടെ തിരിച്ചിറങ്ങിയെങ്കിലും അന്ന് രാത്രി ചിത്രയുടെ ടെമ്പറേച്ചർ അസാധാരണമാവിധം കൂടിവന്നു. ചുട്ടുപൊള്ളുന്ന പനിയോടെ രാത്രി ആശുപത്രിയിൽ.

ഫോണിന്റെ ഡിസ്പ്ളെ പോയതിനാൽ കുറച്ചുദിവസത്തെ കാര്യങ്ങൾ ആരെങ്കിലും നേരിട്ട് പറയാതെ അറിഞ്ഞിരുന്നില്ല. കളക്ഷന് പോകുന്നിടത്തൊക്കെ കുത്തിയുള്ള പറച്ചിലും, പണം തരാതിരിക്കാനുള്ള ഒഴിഞ്ഞുമാറലും ചിത്രയെ ദുർബലപ്പെടുത്തിയിരുന്നു. ജോലിക്കിറങ്ങാൻ മടിച്ചു. ചിത്രയാണ് കൃത്രിമം കാണിച്ചതെന്ന ഇല്ലാക്കഥ ചിലരെങ്കിലും വിശ്വസിച്ചു.

പ്രചരിക്കുന്ന വാർത്ത തെറ്റാണെന്ന് ബാങ്ക് നോട്ടീസ് ബോർഡിൽ പതിച്ചെങ്കിലും ചിലത് പറയുന്നതിൽ ചിലർക്ക് കിട്ടുന്ന സുഖത്തിനുവേണ്ടി അത് തുടർന്നു.
ചിത്രയെയത് ചെറുതല്ലാതെ തന്നെ ബാധിച്ചു. ജോലി അവസാനിപ്പിച്ചു വെറുതെയിരിക്കാനുള്ള ആലോചനയിൽ ചിത്ര അമ്മയെപ്പോലെ, അമ്മയോടൊപ്പം അകത്തളത്തിൽ ഒതുങ്ങിക്കൂടി.


മഴ എന്നത്തേക്കാളും ശക്തിയായി പെയ്തു.
നിർത്താതെയുള്ള മഴ. ഉരുളുപൊട്ടിവരുന്ന വെള്ളത്തിൽ പുഴ ചുവന്നു. 
സാധാരണ പുഴയിൽ ഇങ്ങനെ വെള്ളം കയറാറില്ല.

ഈ മലവെള്ള പാച്ചലിലും നാരാണേട്ടൻ വന്ന് പ്ലാവ് മുറിക്കുന്നത് ഓർമ്മപ്പെടുത്തി.
മുന്നേയും ഒന്ന് രണ്ടുതവണ സൂചിപ്പിച്ചിരുന്നു.

'ഇതുവരെ പെയ്ത മഴയ്ക്ക് വീണില്ലേൽ ഇനി വീഴുവോ?' സംശയം ചോദിച്ചപ്പോൾ നാരാണേട്ടനോന്ന് പരുങ്ങി.

അന്ന് രാത്രി സ്‌കൂളിലെ ക്യാമ്പിലേക്ക് മാറി.

മിഥുനം, കർക്കിടകം, ചിങ്ങം. പലരും ഞങ്ങളെനോക്കി കണക്കുകൂട്ടി. പ്ലാവ് മുറിക്കാൻ നാരാണേട്ടൻ പറഞ്ഞ പൊരുൾ മനസ്സിലാക്കാൻ വൈകി.

പലരുടെയും നോട്ടം അനുതാപമായി ഞങ്ങളിൽ പതിച്ചു. ഇത്തവണ ആരായിരിക്കും തൂങ്ങിയാടുകയെന്ന ശങ്കയിൽ കുടുങ്ങിയ നിശ്വാസം ഞങ്ങളിലേക്ക് നേരിട്ടും അല്ലാതെയും പതിച്ചു.

രയിശൻ പോയത് ഓഗസ്ത് ഇരുപത്തിയൊമ്പതിനാണേൽ അച്ഛൻ പോയത് സപ്തംബർ ആറിന്.  രണ്ടും രണ്ടുവർഷ വ്യത്യാസത്തിലെ ചിങ്ങത്തിലെ തിരുവോണ രാത്രിയായിരുന്നു. ക്യാമ്പിൽ നിന്നും ഇറങ്ങുന്നതുവരെ പലരും അത് ഓർമ്മിപ്പിച്ചുകൊണ്ടേയിരുന്നു.
അഗാധമായ ഒരു ഗർത്തത്തിലേക്ക് അതെന്നെ തള്ളിയിട്ടു.

അച്ഛൻ മരിച്ചതിനുശേഷം അമ്മ കൂടുതൽ മിണ്ടിയിട്ടില്ല. തൊഴിലുറപ്പിനു പോകുന്നതടക്കം വേണ്ടെന്നുവച്ചുള്ള ഇരിപ്പ് തന്നെ. കാണുമ്പോഴൊക്കെ പിന്നിലെ പ്ലാവിലെക്ക് നോക്കി അടുക്കളപ്പടിയിൽ നിൽക്കും. വേണ്ടെന്ന് പറയാൻ തോന്നിയിട്ടില്ല. അച്ഛനും രയിശനും പോയ വഴിയേ പോകാനുള്ള ചിന്തകൾ അമ്മയിലേക്ക് പാറിക്കൂടുന്നുണ്ടോ എന്ന് ഭയന്നു.

ചിത്രയും കഴിഞ്ഞ കുറച്ചു മാസങ്ങളിലായി ആകെ മാറിയിരിക്കുന്നു. മരണത്തിനു തൊട്ടു മുന്നേവരെ രയിശനും അച്ഛനും ജീവിതം മടുത്തുവെന്ന് തോന്നിപ്പിച്ചിട്ടില്ല. പിന്നെ ചിത്രയെയും അമ്മയെയും സംശയിക്കുന്നതിൽ എന്തർത്ഥം. സ്വയം ആശ്വസിപ്പിച്ചു.

കർക്കിടകം പകുതിയോടുകൂടി പുഴയിലെ വെള്ളമിറങ്ങി. 

അച്ഛന്റെ ഓർമ്മകളുടെ ഗന്ധമില്ലാതെ ശ്വാസം മുട്ടലോടുകൂടി അമ്മ വീട്ടിലേക്കിറങ്ങിയോടി. അകത്തുകയറി വാതിലടച്ചു.
മഴ നിന്നിട്ടില്ല.

'നാരാണേട്ടൻ പ്ലാവ് മുറിക്കാൻ പറയുന്നുണ്ട്'

'അത് മുറിക്കണോടാ, ഓർമ്മയല്ലേടാ!' അമ്മ പറഞ്ഞത് എന്നെ തെല്ലൊന്ന് ഭയപ്പെടുത്തി. എന്തോർമ്മയെന്നാണ് അമ്മ പറഞ്ഞത്. തൂങ്ങിയാടുന്ന ജഡമായ ഓർമ്മകളോ. പിന്നിലേക്ക് നോക്കിയാൽ ജീവനറ്റ കാലുകളല്ലാതെ മറ്റെന്ത് ഓർമ്മയാണ്. അതൊരോർമ്മയായിപ്പോലും അവശേഷിക്കരുതെന്ന് തോന്നി, പ്ലാവ് മുറിക്കണമെന്ന് തീരുമാനിച്ചു.

നാരാണേട്ടന്റെ വീട്ടിലേക്ക് കുന്നുകേറി. 

ആരാച്ചാറിന്റെ കണ്മുന്നിലേക്കെന്നപോലെ പ്ലാവിന്റെ നീളൻ കൊമ്പുകൾ നാരാണേട്ടന്റെ വീട്ടുമുറ്റത്തേക്ക് ചെരിഞ്ഞു നിന്നു.

'മുറിക്കാൻ ഒരാളെ ഇപ്പൊ'

'നൗഫലിനോട് ഞാൻ പറഞ്ഞിട്ടുണ്ട്. നാളെ വിളിക്കട്ടെ എന്നാൽ?'

നൗഫൽ വന്നില്ല. മഴക്കെടുതിയുടെ ഒഴിവുകൾ പറഞ്ഞു. നാണുവിനെയും നവാസിനെയും വിളിച്ചു. ഓണം കഴിയാതെ ആർക്കും സമയമില്ലത്രേ.

നൗഫലിന്റെ ഹെൽപ്പർ ബിഹാറിയെ വിളിച്ചു.
കർക്കിടകം തീരുന്ന ദിവസം. പാപകർക്കിടകത്തിന്റെ ശാപമോക്ഷമായ പ്ലാവ് മുറിക്കുന്നതുകാണാൻ മഴയത്തും ചുറ്റിലും മനുഷ്യർ.
ശക്തിയായി പെയ്യുന്ന മഴയിൽ വരാന്തയിൽ പലതവണ കയറി നിന്നു. 

ഇരുണ്ടു. കർക്കിടകം അതിന്റെ സർവ്വ ശക്തിയിൽ പെയ്തു.
മടങ്ങാൻ നിന്ന ബിഹാറിക്ക് ആയിരം രൂപ അധികമെടുത്തു നീട്ടി. ഡീസൽ മെഷീൻ കറക്കി ആഴമുറിഞ്ഞ തന്റെ ജീവിതത്തിലേക്ക് നീട്ടിയ രണ്ടഞ്ഞൂറിന്റെ നോട്ടുകൾക്ക് നേരെ അവൻ അവജ്ഞയോടെ കാർക്കിച്ചുതുപ്പി, ചുമരിൽ അടക്കയുടെയും പാനിന്റെയും കറയുള്ള എച്ചിൽ ഒലിച്ചിറങ്ങി.

അന്ന് നാരാണേട്ടൻ ഉറങ്ങിയില്ല. ചുമച്ച് ചുമച്ച് തലയ്ക്കടുത്തേക്ക് നിഴൽ നീട്ടിനിന്ന പ്ലാവിൻ കൊമ്പിലേക്ക് ടോർച്ചടിച്ച് നേരം വെളുപ്പിച്ചു.
വഴിയിലൂടെ പോകുന്നവരൊക്കെ വീട്ടിലേക്ക് ഏന്തിനോക്കി, ചിലർ പിന്നിലെ പ്ലാവിലേക്ക്.രാത്രി വണ്ടി നിർത്തി ചിലർ ടോർച് പിന്നിലെ പ്ലാവിലേക്ക് നീട്ടിയടിക്കുന്നത് ജനലിലൂടെ കണ്ടു.
ഇടയ്ക്കിടെ അമ്മയെ നോക്കി, ഹാളിലെ അച്ഛന്റെ ഫോട്ടോനോക്കി ഉറങ്ങാതെ കിടക്കുന്ന അമ്മ.

ഉറങ്ങിയില്ല. ചിത്രയും ഉറങ്ങിയില്ല. ചിത്ര എന്തൊക്കെയോ പറയുന്നുണ്ട്, ഒന്നും സ്പഷ്ടമായിരുന്നില്ല. ചിന്തകൾ ജഡംപോലെ തൂങ്ങിയാടി. വലിയൊരു ചുഴിയിൽപ്പെട്ട് പ്ലാവിലകൾക്കൊപ്പം ശ്വാസംകിട്ടാതെ അലറി വിളിച്ചുകൊണ്ട് ചിത്രയും അമ്മയും അകപ്പെട്ട ചുഴി മുന്നിലൂടെ കടന്നുപോയി.
വാട്സാപ്പിലെ കുറ്റിയാട്ടൂർ വാർത്തകളിൽ മെസേജ് വന്നു.

'ബസ്സിടിച്ചു യുവതിക്ക് ദാരുണാന്ത്യം.' 
ചിത്രയുടെ ഫോട്ടോയും ചതഞ്ഞരഞ്ഞ സ്‌കൂട്ടറും.

'എന്റെ ദൈവങ്ങളെ..' രഞ്ജിത്ത് നീട്ടിവിളിച്ചുകൊണ്ട് മുട്ടുകുത്തിയിരുന്നു.
വായതുറന്ന് ശ്വാസംമുട്ടി അയാൾ ഉറക്കത്തിൽ നിലവിളിച്ചു. ചിത്ര തട്ടിവിളിച്ചു.
ചിത്രയെ കെട്ടിപ്പിടിച്ച് അന്ന് പുലരുംവരെ അയാൾ കരഞ്ഞു.

25 ജൂലൈ 2025

വർഷാഭിലാഷി

പ്രദീപന്റെ മെസേജുകൾകൊണ്ടുള്ള ശല്ല്യം സഹിക്കവയ്യാതെ പരാതിപറയാൻ മെസേജയച്ചതാണ്. പ്രദീപന്റെ ഭാര്യ മറ്റൊരാളുടെ കൂടെ ഓടിപ്പോയതാണ്, അന്വേഷിച്ചു പോയില്ല. ഭാര്യയെക്കാളേറെ എന്തോ ഒരിഷ്ടം തന്നോട് തോന്നുന്നെന്ന് പറഞ്ഞു തുടങ്ങിയ മെസേജ്, തുടരെ തുടരെ ഉമ്മ വെക്കാൻ തോന്നുന്നു, തൊടാൻ തോന്നുന്നു അങ്ങനെ നീണ്ടു. കോളേജിൽ നിന്നും ആദ്യ ലീവിന് വന്നപ്പോൾ  നേരംനോക്കി മുക്കിലെ പീടിയ്ക്ക് പ്രദീപന്റെ ബാർബർഷോപ്പിനു മുന്നിലുള്ള  ബസ്സ്റ്റോപ്പിൽ കാത്തുനിന്നു മറുപടിയയക്കാൻ പറഞ്ഞുള്ള ശല്ല്യം തുടർന്നപ്പോഴാണ് ഹിമ അർജുനോട് പരാതിയൂന്നി മെസേജയച്ചത്. 
ഒരിക്കൽ ചേട്ടനോട് ഇക്കാര്യം പറഞ്ഞപ്പോൾ 'നിന്നെയും നോക്കാൻ ആളോ' എന്ന് പറഞ്ഞ് ഒഴിവാക്കിയത് ഇപ്പോഴും വിശ്വസിക്കാൻ കഴിഞ്ഞില്ല. 
എല്ലാ ദിവസവും വാട്സാപ്പ് സ്റ്റാറ്റസുകളിൽ യുവജന സംഘടനകളുടെ ഏതെങ്കിലുമൊരു പരിപാടിയുടെ ഫോട്ടോ കാണാറുള്ള ബന്ധംമാത്രം വച്ച് പറഞ്ഞതാണ്.

'അവൾ കുഞ്ഞല്ലേ, നമുക്ക് പത്തു മുപ്പത് കഴിഞ്ഞില്ലെടാ.' അർജുൻ അന്നുതന്നെ പ്രദീപന്റെ കടയിൽ ചെന്നു. ആൾത്തിരക്കില്ലാത്ത നേരം നോക്കി സാമാന്യം മനസ്സിലാക്കാവുന്ന തരത്തിൽത്തന്നെ പറഞ്ഞു. ചെയ്യുന്നത് വൃത്തികേടാണെന്ന് ഓർമിപ്പിച്ചു. എന്നാൽ ശത്രുത തോന്നേണ്ടുന്ന രീതിയിൽ പെരുമാറിയതുമില്ല. ഇറങ്ങുമ്പോൾ അത് മറ്റാരോടും പറയരുതെന്ന് പ്രദീപൻ അപേക്ഷാസ്വരത്തിൽ കുനിഞ്ഞു നിന്ന് പറഞ്ഞത് തലയാട്ടി അംഗീകരിച്ചു.

ശേഷം മെഡിസിന് മംഗലാപുരം രണ്ടാംവർഷ സെമസ്റ്റർ പരീക്ഷ കഴിഞ്ഞുള്ള വെറുതേയിരിപ്പു രാത്രികളിൽ സകലരുമുള്ള നാട്ടുകാരുടെ ഗ്രൂപ്പിൽ അർജുൻ പാട്ട്പാടിയയച്ചുള്ള വീഡിയോ കണ്ടതുകൊണ്ട് പരിചയം പുതുക്കിക്കൊണ്ടുള്ളൊരു മെസേജയച്ചു.

'പ്രണയസുരഭിലമായ ഈ ലോകത്ത് സഖാവിന്റെ പ്രണയം എങ്ങനെ പോകുന്നു?'
'പുതിയ പ്രണയശല്യങ്ങൾ ഒന്നുമില്ലേ കുഞ്ഞേ' തമാശ രൂപേണ ചോദിച്ച ചോദ്യത്തിന് അതേ ഭാഷയിൽ തിരിച്ചൊരു ചോദ്യം.

സാധാരണ പെട്ടെന്ന് മറുപടി കൊടുക്കുന്ന ആളല്ല അർജുൻ. പാർട്ടി കാര്യങ്ങൾ പറഞ്ഞു മുഷിപ്പിച്ചകാരണം പിൻവലിഞ്ഞുപോയ കാമുകിക്ക് മെസേജയക്കാൻ നൽകിയ സമയവും വയസ്സും കുറ്റബോധത്തോടെ ഓർക്കുന്നതുകൊണ്ട് സ്ക്രീൻടൈം കുറച്ചുവച്ചുള്ള ശീലത്തിലാണ്. മാസത്തിൽ ഒരിക്കൽ ആരും കാണാതെയുള്ള രണ്ടുകുപ്പി ബിയർ ശീലമുണ്ട്. ഒറ്റയ്ക്ക്. ആരുമറിയാതെ. പ്രതിച്ഛായ ഭയം. അങ്ങനെയുള്ള ദിവസങ്ങളിൽ പാട്ടുപാടി ഗ്രൂപ്പിലോ ആർക്കെങ്കിലുമൊക്കെയൊ അയക്കുകയും പിറ്റേന്ന് കുറ്റബോധം തോന്നി ഡിലീറ്റ് ചെയ്യുകയും ചെയ്യും. അന്ന് അങ്ങനെയൊരു ദിവസമായിരുന്നു.

'നമ്മളെയൊക്കെ ആര് നോക്കാൻ ചേട്ടാ' കുറെയേറെ സമയമെടുത്ത് ടൈപ്പ് ചെയ്തുവന്ന മെസേജിനപ്പുറം ഹിമയുടെ മുഖത്തെ വൈകാരിക ഭാവം എന്തായിരിക്കുമെന്ന് അർജുൻ വെറുതേ ഒന്ന് ചിന്തിച്ചു.


'ശോകമാണോ അതോ?'

'മെസേജുകൾക്ക് അങ്ങനൊരു ഗുണമുണ്ടല്ലേ. പെട്ടെന്ന് ആളെ പിടികിട്ടില്ല.' 

'പിടികൊടുക്കണമെന്നു വച്ചാൽ പറ്റാതില്ലല്ലോ'

'എന്നെക്കണ്ടാൽ കാമുകനൊക്കെ ഉണ്ടാവുമെന്ന് തോന്നുണ്ടോ?' 


പ്രൊഫൈലിൽ ചെന്ന് നോക്കി കുതറിയോടുന്ന നായയുടെ പടം. വർഷങ്ങൾക്ക് മുന്നേ കണ്ടതാണ്. അന്ന് സാധാരണയിൽ കൂടുതൽ വണ്ണവും നീളവുമുണ്ട്. കൗമാരക്കാരിയുടെ വശ്യതയോർത്തുള്ള അപകർഷതയായിരിക്കാം എന്ന് തോന്നി.

'പ്രദീപന് തോന്നിയ പ്രേമം മറ്റുള്ളവർക്കും തോന്നാലോ.' 

'ഓഹ് തോന്നട്ടെ. നല്ല ഏതേലും ചെറുക്കൻ വരട്ടെ, എന്നിട്ട് വേണമൊന്ന് പ്രേമിക്കാൻ.'

'ഹിമയ്ക്ക് ആരോടും പ്രേമം തോന്നിയിട്ടില്ലേ?' കാര്യവിവരങ്ങൾക്കപ്പുറം നേരെ സ്വകാര്യതയിലേക്ക് കയറുന്നതിനുള്ള മടിയുണ്ടായില്ല.

'തോന്നിയ രണ്ടുമൂന്നുപേരോട് പറഞ്ഞായിരുന്നു. അയ്യേ! അതായിരുന്നു അവരുടെയൊക്കെ മറുപടി.' 

ഇത്രയൊക്കെ തുറന്നുപറയാനുള്ള ബന്ധം ഇല്ലായിരുന്നെന്ന് ഓർത്തു. ഒന്നും പറയാതെ തന്നെ മെസേജിന് ബാക്കിയായി അടുത്തതും വന്നു.


'പ്രദീപന് തോന്നിയത് പ്രേമമല്ലല്ലോ. പൊതുവെ കാണാൻ സൗന്ദര്യമില്ലാത്തവരെ അപ്പ്രോച് ചെയ്യുന്നത് മധ്യവയസ്കരുടെ ഒരു ടെക്നിക്കാണ്. അവർക്ക് പ്രണയമുണ്ടാവാനുള്ള ചാൻസ് കുറവാണ്. അപ്പോൾ വളയ്ക്കാനും റൂമെടുത്തു വിളിക്കാനും എളുപ്പമാണ്.'

ചിരിക്കുന്ന ഇമോജിയിൽ മറുപടികൊടുത്തു ചാറ്റ് ക്ലോസ് ചെയ്തു. ഗൗരവപരമായി അതിനെക്കുറിച്ചു ചിന്തിച്ചില്ല. ഫോൺ കിടക്കയുടെ വശത്തേക്ക് മാറ്റിവച്ചു. 


ഉറക്കം വന്നില്ല. നോട്ടിഫിക്കേഷൻ ബെൽ ഫോണെടുക്കാൻ പ്രേരിപ്പിച്ചു.


'പാട്ട് കൊള്ളാലോ' 
'ബിയറടിച്ചപ്പോൾ പറ്റിപ്പോയതാ'

'എനിക്കും ബിയർ വേണേനു' 
ഇരുപത്തിമൂന്ന് ആയിട്ടുണ്ടാകാൻ വഴിയില്ല. നിയമപ്രകാരം അതാണ് മദ്യപിക്കാനുള്ള വയസ്സ്.

'നാട്ടിൽ വന്നാൽ വാങ്ങിത്തരാം, മംഗലാപുരത്തേക്ക് എത്തിക്കാൻ നിർവാഹമില്ലല്ലോ കുഞ്ഞേ' തമാശയുടെ ഇമോജി ചേർത്തൊരു മറുപടി നൽകി.


'നിങ്ങടെ പ്രേമമൊക്കെ എങ്ങനെ പോണു? എന്തേ കല്ല്യാണം കഴിക്കാതെ?' ചോദ്യങ്ങൾ അങ്ങനെ തുടർന്നുകൊണ്ടേയിരുന്നത് അത്ര സുഖകരമായി തോന്നിയില്ല.

'നിങ്ങൾക്കൊക്കെ എല്ലാം പറ്റുന്നുണ്ടല്ലോ, എനിക്ക് ഇവിടെ ഒന്നും കിട്ടുന്നില്ല. ആർക്കോ വേണ്ടി ജീവിക്കുന്നു.' 
ശോകമാണോ തമാശയാണോ. ശബ്ദമില്ലാത്ത വാക്കുകൾ. തമാശയായി കണ്ട് മെസേജ് നൽകി.

'കുഞ്ഞിനെന്താ വിഷമം?' 
മറുപടി വന്നില്ല. അൽപ്പനേരം കാത്തു നിന്നു. ഫോൺ തലയണക്കരികിലേക്ക് വച്ചപ്പോഴേക്കും നോട്ടിഫിക്കേഷൻ ബെല്ലടിച്ചു.



'ഒന്നുമില്ല. ഞാൻ മുകളിലത്തെ ബെഡിലെ പാലാക്കാരി ഹോസ്റ്റൽമേറ്റ് കാമുകനെ ഫോൺ വിളിക്കുന്നത് കേക്കുവാരുന്നു.' മെസേജിനുകൂടെ ഹോസ്റ്റൽ മുറിയുടെ ഒരു ഫോട്ടോയും വന്നു. അട്ടിയട്ടിവച്ചുള്ള മൂന്നു ബങ്ക് കിടക്കകൾ.

'മുറിയിൽ എത്രപേരാ?' മറുപടി വന്നില്ല. ഫോൺ മാറ്റിവച്ചു. പള്ളിയിലെ വാങ്ക് കേട്ടു, കണ്ണടച്ച് കിടന്നു. പിന്നെ മാസങ്ങളോളം ആ ചാറ്റ്ബോക്സ് അടഞ്ഞു കിടന്നു.



മൂന്നാം വർഷവും ഓണം വെള്ളത്തിലാണ്. 

'വാങ്ങിത്തരാമെന്ന് പറഞ്ഞ ബിയർ?' റിലീഫ് ക്യാമ്പിൽ പച്ചക്കറിയെത്തിക്കുന്നതിനിടെയായിരുന്നു ഹിമയുടെ ഫോൺ വന്നത്. ചിരിച്ചു. 
നാട്ടിൽ വന്നിട്ടുണ്ടെന്നും മദ്യമില്ലെങ്കിലും ഒന്ന് നേരിട്ട് കാണുവാൻ ആഗ്രഹം പ്രകടിപ്പിച്ചു.

ക്യാമ്പിൽ നിന്നും ആളുകൾ വീട്ടിലേക്ക് മടങ്ങിയപ്പോഴേക്കും ലീവ് കഴിഞ്ഞു ഹിമ മടങ്ങിയിരുന്നു. കാണാൻ മാത്രമുള്ള ഉത്സാഹവും ഉണ്ടായതുമില്ല.



വെള്ളമിറങ്ങിയശേഷം വീണ്ടും കർക്കിടകം തിമിർത്തു പെയ്യുന്നു.
ലീവിന് വന്നപ്പോൾ പ്രദീപനെ കണ്ടതും പ്രദീപൻ തന്നോട് മാപ്പ് പറഞ്ഞ കാര്യങ്ങളൊക്കെ ചാറ്റ് ബോക്സിൽ മെസേജുകളായി പറന്നുവന്നു.  


തനിക്ക് തന്റെ ബാച്ചിലെ ഒരുപയ്യനോട് അഗാധമായി പ്രണയം തോന്നുന്നുണ്ടെന്നും നേരിട്ട് പറയാൻ ബുദ്ധിമുട്ടാണെന്നും ഹിമ പറഞ്ഞപ്പോൾ അർജുൻ അവൾക്ക് പറ്റാവുന്ന ധൈര്യം നൽകി. തുടരാൻ പോകുന്ന പ്രണയ കാമ ലൗകീക സുഖങ്ങൾക്ക് ആശംസകൾ അറിയിച്ചു. ഒരു പ്രണയ കവിത അർജുൻ ഹിമയ്ക്ക് വേണ്ടി പാടിയയച്ചു. 

പയ്യനെ ഒറ്റയ്ക്ക് കിട്ടിയ പ്രാക്ടിക്കൽ സെഷനിൽ അയ്യേ എന്ന വാക്കോടുകൂടി നിരസിക്കപ്പെട്ട അന്നുരാത്രി ഹോസ്റ്റലിലെ തന്റെ കട്ടിലിനു മുകളിലുള്ള ബങ്ക് ബെഡിൽ കിടന്നതിന് 'ഇടിഞ്ഞു പൊളിഞ്ഞു താഴെവീഴുമെന്ന്' ഹോസ്റ്റൽ മേറ്റ് പരിഹസിച്ചത്, പാകമല്ലാത്ത ശരീരത്തെക്കുറിച്ചുള്ള അവളുടെ വേദനകളോടെ  അർജുനോട് വന്നു പറഞ്ഞു.

'നിങ്ങൾടെ പ്രേമം എങ്ങനെ?' 

'എന്നെ കാണുന്നവർക്ക് എന്നെ ഇഷ്ടപ്പെടൂലപ്പ, കാണാത്തവരോട് ഞാനൊട്ടു മിണ്ടാറുമില്ല.' 

അപരിചിതരോട് ചാറ്റിൽ മിണ്ടാനുള്ള പേടിയാണ് പ്രണയമില്ലാതെയുള്ള തന്റെ അവസ്ഥയ്ക്കും കാരണമെന്ന് അവൾക്കുമറിയാം. പ്രേമത്തിൽ അകപ്പെട്ടുകഴിഞ്ഞാൽ കുറച്ചു കാലത്തേക്കെങ്കിലും രൂപത്തിന് പ്രസക്തിയില്ലെന്ന് തോന്നിയിട്ടുള്ള പല പ്രണയങ്ങളും ഹോസ്റ്റലുകളിൽ കണ്ടിട്ടുണ്ട്. അങ്ങനെയും ശ്രമിച്ചു പരാജയപ്പെട്ടതാണ്.
നല്ലൊരു ഡോക്ടറായാൽ പ്രണയം താനേ വരുമെന്ന് അർജുൻ ആശ്വസിപ്പിച്ചു.

'ഡോക്ടറാവുന്നതിനുമുന്നെ പ്രണയം വേണം വിവാഹത്തിനു മുന്നെ സുരതമറിയണം' ഹിമയുടെ ആഗ്രഹം അൽപ്പം വിചിത്രമായി അർജുന് തോന്നിയെങ്കിലും തന്നോടത് പറഞ്ഞതിലാണ് അതിശയം തോന്നിയത്. എന്തോ തരിച്ചതുപോലെ ഇക്കിളിയായതുപോലെ.

'നമുക്കൊന്ന് പരീക്ഷിച്ചാലോ, ഫോണിലൂടെ?' കിട്ടിയ അവസരം പാഴാക്കേണ്ട എന്ന് കരുതിയപ്പോൾ മറ്റെല്ലാ ചിന്തകളും അപ്രത്യക്ഷ്യമായി.

'ഞാൻ നിങ്ങളെ അങ്ങനെ കണ്ടിട്ടില്ല' ഹിമ ലളിതമായി കാര്യങ്ങളെടുത്തുവെന്നത് അർജുന് മനസ്സിലായി, ആ ധൈര്യം അയാളെ ആവർത്തിച്ച് ചോദിക്കാൻ പ്രേരിപ്പിച്ചു.

'പരീക്ഷിക്കാം, പറ്റില്ലെങ്കിൽ വിടാം.' ഫോണിലൂടെയുള്ള സുരതം അയാൾ തുടങ്ങിവച്ചെങ്കിലും പാതിയിലെപ്പോഴോ മെസേജുകൾ മുറിഞ്ഞുപോയി. ഹിമയുടെ ചാറ്റ്ബോക്സ് ഓഫ്‌ലൈനിലേക്ക് മറഞ്ഞു.  വരാൻ പോകുന്ന ഭവിഷ്യത്തുകളോർത്തുകൊണ്ട് കണ്ണുകളടച്ചു.

ഇടയ്ക്ക് നോട്ടിഫിക്കേഷൻ ബെൽ വീണ്ടുമടിച്ചു.

'പ്രേമമില്ലാതെ സുരതമില്ലല്ലോ.' തന്റെ ആഗ്രഹങ്ങളെ തട്ടിക്കളഞ്ഞില്ല. ശ്രമങ്ങൾക്ക് അവൾ വഴങ്ങുന്നതുപോലെ തോന്നി. 'പ്രേമത്തോടെ ലൈംഗീകത വേണമെന്ന് നിർബന്ധമുണ്ടോ? ഏതായാലും സ്ത്രീകൾക്ക് കുറച്ചുകൂടെ എളുപ്പമാണത്, പുരുഷനാണെങ്കിൽ സ്വയംഭോഗമല്ലാതെ മറ്റെന്തു മാർഗം.'  മെസേജയച്ച ശേഷമാണ് അതിലൊരു വഷളത്തരമുണ്ടെന്ന് മനസ്സിലാക്കിയത്. ഡിലീറ്റ് ചെയ്തുവെങ്കിലും ഹിമ അത് കണ്ടിരുന്നു. കുറച്ചു സമയത്തേക്ക് ഹിമയുടെ മെസേജ് കാണാതെ വന്നപ്പോൾ വീണ്ടും പേടിതോന്നി. എന്തൊക്കെയോ ടൈപ്പ് ചെയ്യാൻ ശ്രമിച്ചുവെങ്കിലും രണ്ടുമൂന്നു തവണ ആലോചിച്ചു. ശേഷം വേണ്ടെന്നുവച്ചു.

'സ്ത്രീകൾക്കെങ്ങനെയാണത് എളുപ്പമാവുന്നെ?' 
താനയച്ച മെസേജ് കുറ്റമുള്ളതായി അവൾക്ക് തോന്നിയില്ലെന്നത് ആശ്വാസമായി.

'അങ്ങനെയാണല്ലോ' വിശദീകരിക്കാൻ നിന്നില്ല.  വാക്കു തെറ്റിയാലുള്ള കാര്യങ്ങളോർത്തപ്പോൾ ചുരുക്കി.

'അങ്ങനെയില്ല' 

'ഹിമ സ്വയംഭോഗം ചെയ്യാറുണ്ടോ?' അജ്ഞാതമായ ചില വികാരങ്ങൾ അകത്തുകിടന്നു പിടച്ചപ്പോൾ വാക്കുകൾ തെറ്റിപ്പോവുന്നത് സാരമാക്കിയില്ല. വരും വരായ്കകൾ ആലോചിച്ചില്ല.

'ഇടയ്ക്ക്കൊക്കെ'

ഇനിയെന്ത് ചോദിക്കണമെന്ന ധാരണ അയാൾക്കില്ല. കൈകൾ വിറയ്ക്കുന്നതിനോടൊപ്പം അകാലമായ സംഭ്രമം അനുഭവപ്പെടുന്നതറിഞ്ഞു. അവളാവട്ടെ ഉള്ളിലെ സ്ത്രീത്വം ഉണർത്തിയ നാണത്തോടെ മൂളലുകൾ മാത്രം ചാറ്റ് ബോക്‌സിലേക്കിട്ടു ലജ്ജയിൽ കണ്ണുകളടച്ചു.

'എനിക്കെപ്പോഴാ ബിയർ വാങ്ങിത്തരുന്നേ?

'എപ്പോഴാ വരുന്നേ?'

'അടുത്താഴ്‌ച്ച ദസറയുടെ ലീവ് തുടങ്ങും. നാട്ടിലേക്കില്ല.'

'എന്നാൽ ഞാൻ അങ്ങോട്ട് വരാം' വഴുതിപ്പോയതാണെങ്കിലും അവൾ എന്റെ വാക്കുകളെ നിഷേധിക്കാതെ മുന്നോട്ട് പോകുന്നത് അയാളുടെ വികാരങ്ങളെയും പ്രതീക്ഷകളെയും തുറന്നുവിട്ടു. അതിൽ സ്ത്രീയും പുരുഷനും മാത്രമായി ഒതുങ്ങി, പൊള്ളയായ ഉണക്കമരങ്ങൾ പോലെ പല തോന്നലുകളും പൊടുന്നനെയില്ലാതായി. പുലർച്ചെയുള്ള വാങ്ക് വിളി കഴിഞ്ഞശേഷവും മെസേജുകൾ തുടർന്നു. ഉറങ്ങാൻ കിടന്നപ്പോൾ മനസ്സു നിറയെ ലജ്ജ കലർന്ന സ്ത്രീയുടെ നാണം അവളുടെ വാക്കുകളിലുണ്ടോയെന്ന് പലകുറി ആലോചിച്ചു.
വരുന്ന ശനിയാഴ്ച്ച മംഗലാപുരത്തേക്കുള്ള യാത്ര ഉറപ്പിക്കുകയും, ബിയർ കുടിക്കാൻ ചെല്ലേണ്ടുന്ന കഫെയുടെയും താമസിക്കേണ്ട സ്ഥലവും തുടർച്ചയെന്നോളം തീരുമാനിച്ചു.

ഇതിനിടയിൽ ഹിമ പലകുറി അർജുനെയും അർജുൻ പലകുറി ഹിമയെയും ഫോണിൽ വിളിച്ചെങ്കിലും ചാറ്റ് ബോക്സിൽ മെസേജയക്കുന്നതു പോലെ സുഖകരമായ ഒന്നായിരുന്നില്ല അത്.  ഉറങ്ങാതെ നാനാകാര്യങ്ങൾ പറഞ്ഞറിയിക്കാനുള്ളത്ര കാമുകത്വം ഇരുവർക്കുമിടയിലുണ്ടായിരുന്നില്ല. 

ചാറ്റ് ബോക്സിലെ സുഖം വികാരങ്ങളറിയുന്ന ശബ്ദത്തിലൂടെ കിട്ടിയില്ല. സംസാരിക്കുമ്പോൾ അവർ തികച്ചും അന്യരായി നിന്നു.

വടകര മുതൽ മംഗലാപുരം വരെയുള്ള യാത്രയിൽ ഹിമയെ കാണാനുള്ള കലശലായ ആഗ്രഹം അർജുനുണ്ടായി, അത് ഹിമയ്ക്ക് മെസേജയച്ചു. കാരണം ചോദിച്ചെങ്കിലും പറയാൻ അയാൾക്കറിഞ്ഞില്ല.
അല്ലെങ്കിലും ശരീരത്തിന്റെ ചില തോന്നലുകൾ മനസ്സിന്റെ താളം തെറ്റിക്കുമെന്ന് കാലങ്ങൾ വൈകിമാത്രം മനസ്സിക്കാൻ പറ്റുന്ന സത്യമാണ്. കുറ്റബോധങ്ങളിൽ എത്രതവണ ഓരോ മനുഷ്യനും കണ്ണുകളടയ്ക്കുന്നു.

ഹിമയോടൊപ്പം കുദ്രോളിയിലെ ദസറ ഘോഷയാത്രയും പുലിക്കളിയും നോക്കി നിന്നു. ആദ്യമായാണ് അർജുൻ പുലിക്കളി കാണുന്നത്. നവമിയുടെ തിരക്കിൽ ഹമ്പൻകട്ടയും ബാൽമട്ടയും തിക്കിത്തിരക്കി. കഫേയിൽ ഇരിക്കണ്ടെന്നു തോന്നി നാല് ബിയർബോട്ടിൽ പാഴ്‌സൽ വാങ്ങി ഹോം സ്റ്റെയിലേക്ക് ഓട്ടോകയറി. ഹോംസ്റ്റേ എത്തുന്നതുവരെ കുറഞ്ഞ ചില വാക്കുകളല്ലാതെ അവർക്ക് ഒന്നുംതന്നെ സംസാരിക്കാനുണ്ടായില്ല. മണിക്കൂറുകൾ ദസറയ്ക്ക് വേണ്ടിയൊരുങ്ങിയ നഗരത്തെക്കണ്ടുകൊണ്ട് നീങ്ങി.

ഉള്ളാൾ ബീച്ചിലേക്ക് തുറക്കുന്ന വിശാലമായ ബാൽക്കണി, ഗ്ലാസ്സ് ചുവരുകൾ. അവൾ കടലിലേക്ക് നോക്കി ഒരു ബിയർബോട്ടിൽ കയ്യിലേക്കെടുത്തു അർജുനുനേരെ നീട്ടി. അർജുൻ പല്ലുകൊണ്ട് അടപ്പ് തെറിപ്പിച്ചു. ബാൽക്കണിയിലിട്ട കസേരയിൽ കാലുനീട്ടിവച്ച് അപരിചിതരായ രണ്ടുപേർ കടലിലേക്ക് നോക്കിയിരുന്നു. ചോദ്യങ്ങൾക്ക് ശ്രമിച്ചപ്പോഴൊക്കെ വാക്കുകൾ വിറയ്ക്കുന്നതുപോലെ തോന്നി.
അർജുൻ രണ്ടോ മൂന്നോ പാനത്തിൽതന്നെ  ബിയർബോട്ടിൽ കാലിയാക്കി ഓരംവച്ചു. പാടാൻ ശ്രമിച്ചെങ്കിലും കഴിഞ്ഞില്ല. അവളുടെ വലതുകൈ അർജുന്റെ ഇടതുകൈയിൽ കൂട്ടിപ്പിടിച്ചു, തണുത്ത വിരലുകൾ.  രക്തപ്രവാഹത്തിനെന്തോ മാറ്റം സംഭവിക്കുന്നതറിഞ്ഞു.

'എനിക്ക് പൂസാകുന്നില്ല. ഇതും എന്റെ ശരീരത്തിൽ പാകമാകുന്നില്ലേ?' 
അവൾ ചിരിച്ചു. അയാൾ അവസാന ബോട്ടിൽ അടപ്പ് തുറന്നു നൽകി.

മെസേജുകളിലൂടെ കണ്ട വാക്കുകളുടെ വൃത്താന്തങ്ങൾക്കപ്പുറമുള്ള വികാരം തനിക്കും അവൾക്കും ഒരുപോലെയാണോ എന്നൊരു സംശയം അപ്പോൾ ചിന്തയിലേക്ക് വന്നു. ഒരു പുരുഷനെ അവൾ പ്രതീക്ഷിക്കുന്നുവെന്ന തന്റെ തോന്നലുകൾ ശെരിവെക്കുന്നതായ ഒന്നും ഇതുവരെ കാണാനിടയായില്ല. അത് ചിലപ്പോൾ നഗരത്തിൽ, ആൾക്കൂട്ടത്തിൽപ്പെട്ടുപോയതിനാലാകുമോ. 
ഒരുപക്ഷെ എന്റെ ആദ്യ ക്ഷണത്തിനു വേണ്ടി കാത്തിരിക്കുകയാണോ. സ്ത്രീകളുടെ പ്രകൃതം വഴങ്ങിക്കൊടുക്കുന്നതാണ്, മുന്നേ പ്രവത്തിക്കാറില്ല.

അവൾ എഴുനേറ്റു. പരസ്പരം നോക്കി, തലകുനിച്ചു നിന്നു. ഒരുതരത്തിലുള്ള പേടിയും അവളുടെ മുഖത്തില്ല. സ്ത്രീയിലുള്ള ധൈര്യവും ക്ഷമയും പുരുഷനുണ്ടാവാറില്ലെന്ന് തോന്നി.

നനവാർന്ന ചുണ്ടുകൾകാട്ടി ചിരിച്ചുകൊണ്ട് അവൾ ബാൽക്കണിയിലൂടെ തലങ്ങും വിലങ്ങും നടന്നു. അവളുടെ ശരീരത്തിൽ അസ്വാഭാവികതയൊന്നും തോന്നിയില്ല. വശ്യമായ അവളുടെ അരക്കെട്ട് നോക്കി അയാൾ തലയുയർത്തി. ഊരയുടെ തുളമ്പലുകൾ അയാളിൽ ഉദ്ധീപനമുണ്ടാക്കി.

'എന്തെങ്കിലും കഴിച്ചാലോ?'
അടുത്തുള്ള റെസ്റ്റോറന്റിലേക്ക് വിളിച്ച് അവൾ തന്നെ ഭക്ഷണം ഓർഡർ ചെയ്തു.

അവളുടെ വലതുകൈ തന്റെ ഇടതു കൈയ്യിലമരുന്നത് അയാളറിഞ്ഞു. തന്റെ ഉള്ളംകയ്യിൽ അവളുടെ കൈകൾ ഒതുങ്ങില്ലെന്ന് അയാൾക്കപ്പോൾ മനസ്സിലായി. തലകുനിച്ചു നിൽക്കുകയാണ്. എത്രനേരം അങ്ങനെനിന്നുവെന്നറിയില്ല. താൻ പാകപ്പെട്ടെന്ന് അവൾ തിരിച്ചറിഞ്ഞ നിമിഷം അവളുടെ മുഖത്ത് സ്ത്രീയുടെ ലജ്ജ കയറിവരുന്നത് അവളറിഞ്ഞു. അയാളത് കണ്ടു. അവളുടെ പിന്നിൽ നിൽക്കുന്ന ഒരാൾക്ക് അപ്പോഴയാളെ കാണാൻ പറ്റില്ലെന്ന് തോന്നി. അയാളുടെ കഴുത്തു വേദനിച്ചു. ഏറെനേരം അവളുടെ മുഖത്തേക്ക് തലയുയർത്തി നോക്കിനിൽക്കാൻ കഴിഞ്ഞില്ല.
താനൊരു സ്ത്രീയെയും അവളൊരു പുരുഷനെയും ആഗ്രഹിക്കുന്നുവെന്നറിഞ്ഞ നിമിഷത്തിൽ സുന്ദരമായ ലജ്ജയോടുകൂടി ഇരുവരും പിണഞ്ഞു. അയാളുടെ കൈകൾ അവളുടെ അരക്കെട്ടിലും അവളുടെ കൈകൾ അയാളുടെ കഴുത്തിലൂടെയും വരിഞ്ഞു.

ഭക്ഷണം കൊണ്ടുവന്ന പയ്യൻ മുറിയുടെ ബെല്ലടിക്കുന്നതുവരെ അങ്ങനെ നിന്നു. അകത്തേക്ക് വാങ്ങിവച്ചു. വാതിലടച്ചു. തഴുതിട്ടു.
അവളെ അകത്തേക്ക് വിളിച്ചു. അവൾ സൂക്ഷ്മതയോടെ അയാളെ നോക്കി. അകത്തേക്ക്‌ വിളിച്ചത് അസഭ്യമെന്നപോലെ തോന്നിയിരിക്കുമോ. 
സഹജമായ ചോദനകളുള്ള മനുഷ്യ ശരീരമല്ലേ അതും. എങ്കിലും അതിലൊരു അപമര്യാദ അയാൾ കണ്ടു.
അവൾ വന്നു.


'ഇത് ശെരിയാണോ?' അവൾ സംശയപ്പെട്ടു. 
ഇതുവരെ കണ്ട മുഖമായിരുന്നില്ല അപ്പോഴവൾക്ക്. ചുണ്ടുകളിലെ നനവ് വറ്റിയിരുന്നു. കണ്ണുകൾ താളം തെറ്റുന്നു.
'ആരെങ്കിലും അറിഞ്ഞാൽ?'
'സേഫ്റ്റി ഇല്ലാതായാൽ' പലതരത്തിലുള്ള സംശയങ്ങൾ അഴിച്ചുവിട്ടപ്പോൾ തന്റെ ശരീരം തണുക്കാൻ തുടങ്ങിയത് അയാളും അവളും അറിഞ്ഞു. പൊടുന്നനെ പിന്നിലേക്ക് മാറി കട്ടിലിലിരുന്നു. 
അവൾ ബാൽക്കണിയിലേക്ക് നടന്നു. അരക്കെട്ട് കുലുങ്ങി. 
ഖേദിക്കാനുള്ള അനാവശ്യ ചിന്തകളാണ് തന്നിലേക്ക് കടന്നുവരുന്നതെന്ന തോന്നൽ അയാൾക്കുണ്ടായപ്പോൾ അവളെ നിർബന്ധപൂർവ്വം അകത്തേക്ക് വിളിച്ചു. അവൾ തിരിഞ്ഞുനോക്കി. അവളുടെ സുന്ദരമായ മുഖം.

'ഇറങ്ങിയാലോ?' അവൾ പറഞ്ഞു.

'പോകണമെങ്കിൽ പോകാം' വാക്കുകൾ തെറ്റിയത് അയാളറിഞ്ഞില്ല. കൊതിപിടിച്ച അയാളുടെ ശരീരം കാലുകളുയർത്തി അവളുടെ ചുണ്ടുകളിൽ ഉമ്മവയ്ക്കാൻ ശ്രമിച്ചെങ്കിലും കഴുത്തുവരെ മാത്രമേ ചുണ്ടെത്തിയുള്ളു. കഴുത്തിലും മുലകൾക്കിടയിലും ചുംബിച്ചു.
ചുറ്റിപ്പിടിച്ചു. കട്ടിലിലിരുത്തി.

വെള്ളിയരഞ്ഞാണവും പാദസരവും ഉരസി ശരീരത്തിൽ അങ്ങിങ്ങായി ചോരപൊടിഞ്ഞു.
അവളുടെ നഖപ്പാടുകൾ അയാളുടെ പുറത്തു പതിഞ്ഞു.  ആദ്യ മണിക്കൂറുകളിൽ ഊരയിലൂടെ പലവട്ടം അയാളുടെ ചുണ്ടുകൾ കടന്നുപോയി എന്നതൊഴിച്ചാൽ ആ ശരീരത്തിൽ എന്തുചെയ്യണമെന്ന് അയാൾക്കറിയില്ലായിരുന്നു. പാതിയിൽ രക്തം തണുത്തപ്പോൾ പ്രണയത്തിന്റെ ബാധ്യതകളില്ലാതെ മണിക്കൂറുകൾ അങ്ങിനെ കിടന്നു. അത്രമാത്രം.

അയാളുടെ മേനിയെ അവൾ കൈകാര്യം ചെയ്യാൻ തുടങ്ങിയ ശേഷം അയാളുടെ സിരകളിൽ എന്തെന്നില്ലാത്ത ചൂടനുഭവപ്പെട്ടു. 
അന്ന് രാത്രി നഗ്നമായ അവളുടെ മേനിയിൽ പാകമായിക്കൊണ്ട് ഒരു കുഞ്ഞിനെപ്പോലെ അയാൾ സുഖമായി കിടന്നുറങ്ങിയപ്പോൾ പൂർണ്ണതയിലേക്കെത്താൻ തനിക്കാകുമെന്ന് അവൾക്ക് ബോധ്യപ്പെട്ടു.

20 ജൂലൈ 2025

ആദിയിൽ കരുണ


'പുണ്ടച്ചി മോളെ, ഈടെ നിക്കണേൽ തൊടക്കോം ചെലപ്പോ തീട്ടം കോരുവേ ഒക്കെ വേണ്ടി വരും നായിയെ.' ഹാളിലെ ടീവിക്ക് മുന്നിൽ വിരിച്ച പായയിൽ മൂത്രൊഴിച്ച ശാന്തയുടെ വായിൽ നിന്നുള്ള നിർത്താതെയുള്ള തെറി കേട്ടാൽ ശരീരം നടുതളർന്നു കിടക്കപ്പായയിലൊടുങ്ങുന്നതാണെന്ന് വഴിയേ പോകുന്ന ആർക്കും തോന്നില്ല. തുണിയലക്കിനിടയിൽ ദേഷ്യത്തോടെ അകത്തേക്ക് കയറിവന്ന് ഹാളിലെ പുൽപ്പായ വലിച്ചു നീക്കി, അമ്മയുടുത്ത ലുങ്കി പറിച്ചെടുത്ത് ഷൈജ ടൈൽസിലൂടെ പരക്കുന്ന മൂത്രത്തിലേക്കിട്ട് കാലുകൊണ്ടുരച്ചു. 
ശാന്ത പായയുടെ പുറത്തേക്ക് തെറിച്ചു. 
അതേ ലുങ്കി വീണ്ടും നടുപൊന്തിച്ചു അരയിൽ ചുറ്റിക്കൊടുത്തു. ദാക്ഷണ്യമില്ലാതെ പായയിലേക്ക് വലിച്ചിട്ടു.

'ഒന്ന് ചത്ത് കിട്ടീനെൽ' ദേഷ്യം മുഴുവൻ അലക്കുകല്ലിൽ തുണിയോട് തീർത്തു. ഞങ്ങൾ മാത്രം എല്ലാം അനുഭവിക്കണം, അതിനു മാത്രം പാപമൊന്നും ഞാൻ ചെയ്തിട്ടില്ല. അമ്മയുടെ പേരിലെടുത്ത സർക്കാർ വീടല്ലേ, ആടെ നിർത്തിക്കൂടെ.'

മുറ്റത്തന്നെയുള്ള ഭർത്താവ് സുരേശന്റെ അനുജൻ സന്തോഷിന്റെ മോടിപിടിപ്പിച്ച അമ്മയുടെ പേരിൽ ലൈഫ് പദ്ധതിയിൽ നിന്നുകിട്ടിയ കോൺഗ്രീറ്റ് വീടിനകത്തേക്ക് ഇടയ്ക്കിടെ കണ്ണ്പായിച്ചുകൊണ്ട് പുലമ്പുമ്പോൾ കണ്ണിലും പെരുവിരലിലും സമാധാനക്കേടുപോലെ തന്നിലെന്തോ അരിച്ചിറങ്ങുന്നത് ഷൈജ അറിയുന്നുണ്ട്. 

'ഞാൻ ചാവണേൽ നിന്റെയൊക്കെ കടിപ്പ് മാറണം പുരിയാടിച്ചി' പുൽപ്പായയിൽ നിന്നുവന്ന വാക്കുകൾക്ക് നേരെ നീട്ടിനടന്നു. ചുരുണ്ടിരിക്കുന്ന ശാന്തയുടെ ചലനമറ്റ കാലുകളിൽ മാറിമാറി ചവിട്ടി പുറത്തേക്കിറങ്ങേയടച്ച വാതിലിന്റെ ശക്തിയിൽ അലമാരയിലെ പലതും താഴെ വീണു. ഇരുടുംവരെ ഷൈജ ദേഷ്യം തീർത്തത് മണ്ണിനോടാണ്. കഴിഞ്ഞുകൂടാനുള്ളത് തരുന്നതും പുറംപോക്കിലെ അതേ മണ്ണ്തന്നെ. കപ്പയും വാഴയും കിഴങ്ങും, സകലതിനോടും അരിശം തീർത്തു. ഇരുട്ടിയപ്പോൾ എപ്പോഴോ വാതിൽ തുറന്നു. 
നാലിലും രണ്ടിലും പഠിക്കുന്ന ചെക്കന്മാർ വൈകുന്നേരം കിട്ടിയത് കൊണ്ട് വിശപ്പടക്കി.
സുരേശന് തൊട്ടു മൂത്തചേട്ടന്റെ മകൻ കഴിഞ്ഞ വരവിന് കൊണ്ട്കൊടുത്ത ഫോണിലേക്ക് മുഖമമർത്തിയിരിക്കെ രണ്ടുപേരും വാതിൽ തുറക്കുന്ന ശബ്ദം കേട്ട് ഹാളിലെ പായയുടെ മൂലയിലിരുന്ന് തലയൊന്നുയർത്തി ഫോണിലേക്കും ക്ളോക്കിലേക്കും കണ്ണോടിച്ചു.

ഷൈജയെ കൂട്ടിവന്നശേഷം സുരേശൻ ഗൾഫിലേക്ക് മടങ്ങിയിട്ടില്ല. അന്ന് സന്തോഷും സുരേശനും താമസം ഒരുമിച്ചാണ്. ഒരു അമ്മായിയമ്മ പോരിനപ്പുറത്തേക്ക് പറയത്തക്ക ഒന്നും തന്നെയുണ്ടായിരുന്നില്ല. സുരേശന്റെ അച്ഛൻ രാഘവൻ വൈകുന്നേരം ഷാപ്പിന്ന് ഞേറ്റിവരുന്ന രണ്ടു ലിറ്റർ കള്ളു കുടിച്ച് മരിച്ചുമണ്ണടിഞ്ഞവരെ ചീത്തവിളിച്ച് മണിക്കൂറുകൾ കസേരയിലിരിക്കും. കേട്ടില്ലെന്ന് നടിച്ചാൽ ആർക്കും ഉപദ്രവമില്ല. അച്ഛൻ പോയപ്പോൾ സുരേശന്റെ ദേഹത്താണ് ആ ബാധ കേറിയത്.

പണിക്ക് ശേഷം മുക്കിലെ പീടിയക്ക് ചെന്ന് നൂറ്റമ്പതിന്റെ രണ്ടു കോട്ടർ ബീവറേജിന്റെ കീഴിൽ നിന്ന് തന്നെ അകത്താക്കിയ ശേഷം  അമേരിക്ക ചൈനയുടെ മേലേൽപ്പിച്ച നികുതി ഭാരത്തെക്കുറിച്ച് ശ്രദ്ധിച്ചാൽ മാത്രം മനസ്സിലാകുന്ന രൂപത്തിൽ ആരോടെന്നില്ലാതെ പറഞ്ഞുകൊണ്ടിരിക്കുന്ന സുരേശൻ.  കടയടയ്ക്കും വരെ അത് പതിവാണ്. രണ്ടു ബാർബർഷാപ്പും നാലഞ്ചു പലചരക്കു കടകളും പുതുതായി തുടങ്ങിയ മൊബൈൽ കടയിലേക്കും വന്നുപോകുന്നവർ സുരേശന്റെ ഏകാങ്ക നാടകരൂപത്തിലുള്ള പ്രകടനം അൽപ്പനേരം നോക്കി നിൽക്കും. ഹൈവേയിൽ നിന്നും ബീവറേജ് മുക്കിലപ്പീടിയക്ക് മാറ്റിയ ശേഷമാണ് സുരേശന്റെ കലാപരിപാടിക്ക് ആള് കൂടിതുടങ്ങിയത്. 
സ്ഥിരം വന്നുപോകുന്നവർ വിഷയത്തിൽ ഒന്ന് എത്തിനോക്കും. കേൾക്കാനാരുമില്ലെന്ന് തോന്നിയാൽ വീട്ടിലേക്ക് മടങ്ങും. മടങ്ങി.

'ഒരു മനുഷ്യന് സഹിക്കാൻ പറ്റുന്നതിലധികമായി, ഒന്ന് ഇതിനെ കൊന്ന് തരുവോ. തിന്നാണ്ട് ചത്താലും സാരൂല.' വന്നുകേറും മുന്നേ ഷൈജ സുരേശന്റെ മുന്നിലേക്ക് നീങ്ങി. കേട്ടില്ലെന്ന ഭാവത്തിൽ കുളിക്കാൻ കയറി. കുളിച്ചിറങ്ങി. നിലത്തു കിടന്ന അമ്മയെ നോക്കി.

'സാമാനത്തിനുറപ്പില്ലാത്ത നീയെല്ലാം എങ്ങനാ നായിന്റെ മോനെ എന്റെ വയറ്റില് വന്ന് പെറ്റത്, കെട്ടിത്തൂക്കി കൊല്ലെടാ അല്ലേൽ പൊഴേല് കൊണ്ട് മുക്ക്'

'ഒച്ചയാക്കല്ല പുണ്ടച്ചി' പറഞ്ഞത് നാലാംക്‌ളാസ്സിൽ പഠിക്കുന്ന മൂത്ത ചെക്കനാണ്. ഷൈജയുടെയും ശാന്തയുടെയും ശബ്ദം ഇരുട്ടിലും ഉയർന്നുകേട്ട് വയൽക്കരയിലെ ജന്തുക്കൾ എന്നത്തേയും പോലെ അന്നത്തെ രാത്രിയും കഴിച്ചുകൂട്ടി. 
സുരേശൻ കോൺഗ്രീറ്റ് പൊടിപാറുന്ന നിലത്തു കിടന്ന് കൂർക്കംവലിച്ചു. ഷൈജയും ചെക്കന്മാരും എപ്പോഴുറങ്ങിയെന്നറിയില്ല.

സന്തോഷ് കല്ല്യാണം കഴിച്ചതിന്റെ ഒരുമാസം കഴിഞ്ഞപ്പോൾ രാഘവൻ പോയി, ആർക്കും ബാധ്യതയില്ലാത്ത ഒരുദിവസം ഉറക്കത്തിലൂടെ ദേഹം വിട്ട് പോവുകയായിരുന്നു. ശാന്തയുടെ പോലും കരച്ചിൽ അന്ന് വീട്ടിൽ ഉയർന്നില്ല. മരണവിവരം അറിഞ്ഞുവന്ന പ്രമുഖർക്കൊക്കെ മരുമക്കളോട് തിട്ടൂരമിട്ട് കട്ടൻചായ കൊടുപ്പിച്ചത് ശാന്തയാണ്. ആള് കൂടിയപ്പോൾ പിന്നെ അത് വേണ്ടെന്ന് വച്ചു.

പിന്നീട് വന്ന കർക്കിടകത്തില് മുറ്റത്തെ സിമന്റിൽ വഴുക്കി ശാന്ത വീണു, കാലിനു സ്റ്റീലിട്ടു. തുടരെത്തുടരെ അകത്തു പഴുത്തു, അത് എല്ലിനെ ബാധിച്ചതോടുകൂടി എഴുനേൽക്കാൻ പറ്റാത്ത പരുവമായി. അതിനുശേഷമാണ് ശാന്തയുടെ പേരിൽ ലൈഫ് പദ്ധതിയിൽ സന്തോഷ് വീട്ടുമുറ്റത്തുതന്നെ മറ്റൊരു വീടെടുത്തു മാറുന്നത്. സൊയിര്യ ജീവിതത്തിനുള്ള സ്ഥലമൊന്നും അല്ലെങ്കിലും പഴയവീട്ടിലുണ്ടായിട്ടില്ല.
കോ-ഓപ്പറേറ്റിവ് ബാങ്കിന്ന് രാഘവന്റെ റിസ്ക് ഫണ്ട് വന്നപ്പോൾ വീട് പൊളിച്ചു പണിയുന്ന നേരമായതുകൊണ്ട് ഷൈജ അത് മുഴുവൻ അതിലേക്കിട്ടു. 
അത് ഇരുവരുടെയും ഭാര്യമാർ തമ്മിലുള്ള വാക്കേറ്റത്തിലെത്തിയതിനു ശേഷം കണക്കുകൾ അളന്നുകുറിച്ചുള്ള ഷൈജയും കവിതയും തമ്മിലുള്ള പ്രശ്നങ്ങൾ പതിവാണ്. അല്ലെങ്കിലും ഒരു വാക്കേറ്റം മതി ബന്ധങ്ങൾ നാറിത്തുടങ്ങാൻ.

പതിവുപോലെത്തന്നെ നേരം വെളുത്തു. സുരേശൻ എഴുന്നേൽക്കുന്ന സമയം കണക്കാക്കി മെമ്പർ വണ്ണത്താൻ വീട്ടുപടിക്കലെത്തി, ഇടത്തേതോ വലത്തേതോ സുരേശന്റെ വീട്. രണ്ടുവീട്ടിലേക്കും ഒരേ പടികൾ. സർക്കാർ കൊടുത്ത വീട് സുരേശന്റെയാണോ അതോ സന്തോഷിന്റേയോ. എപ്പോഴും സംശയമാണ്. 
ഷൈജ അടുക്കളവഴിയെ തല പുറത്തേക്കിടുന്നത് കണ്ടപ്പോൾ ഉറപ്പിച്ചു, വലത്തേത്.  വശ്യതയോടെ അയാൾ ഷൈജയെ മതിമറന്നു നോക്കിനിൽക്കെ സുരേശൻ മുറ്റത്തേക്കിറങ്ങി. 

'പറമ്പിലെ ബയോഗ്യാസ് പ്ലാന്റ് വൃത്തിയാക്കാൻ ഏൽപ്പിക്കാനാണ്.' വണ്ണത്താൻ കാര്യം പറഞ്ഞു.

' വെറക് വെട്ടാൻ പറഞ്ഞാരുന്നു, മഴയല്ലേ വരുന്നേ.' സുരേശൻ ആകാശത്തേക്ക് തലയുയർത്തി.

'ഇന്ന് വൃത്തിയാക്കിയില്ലേൽ എല്ലാം നാശാവും'
'നനഞ്ഞാൽ വിറക് പിന്നെ ഉണങ്ങിക്കിട്ടാൻ ..'
മങ്ങിയ മുഖത്തോടെ വയൽക്കര കടക്കുംവരെ മുന്നിൽ നടന്നു. 
സുരേശനെ നാലഞ്ചു ചീത്ത മനസ്സിൽ പറഞ്ഞ ശേഷം തിരിഞ്ഞു നോക്കി. കണ്ടില്ല. ഷൈജയുടെ മുഖം വണ്ണത്താൻ വീണ്ടും ഓർത്തപ്പോൾ സുരേശനെ മറന്നു.

ശനിയാഴ്ച്ചത്തെ സ്‌കൂൾ ലീവ്, ഫോണിനുവേണ്ടിയുള്ള ചെക്കന്മാരുടെ അടിപിടി.

'നായ്ക്കൾക്ക് എല്ലു കഷ്ണം കിട്ടിയപോലല്ലേ, ഏതെങ്കിലും ഒന്നിന് ഇതൊന്ന് വച്ച് തന്നൂടെ, നിന്റെയൊന്നും അമ്മ വീട്ടീന്ന് കൊണ്ടന്നതല്ലല്ല.' 
ടീവി ഓൺ ചെയ്തു വെക്കാത്തതിന് ശാന്ത പുൽപ്പായയിൽ നിന്നും മുരണ്ടു.

ഉച്ചയൂണിനു ശേഷം സന്തോഷും ഭാര്യ കവിതയും അണിഞ്ഞൊരുങ്ങി പോകുന്നത് കണ്ട ഷൈജയുടെ കാൽ വിരൽ തൊട്ട് തലവരെ പെരുപ്പിച്ചു. 

'എന്റെ ചെക്കനെ വല്ലതും പറഞ്ഞാൽ ആ അണ്ണാക്കിൽ ഞാൻ തീക്കൊള്ളി വെക്കും.' ഏതോ ഒരു കാരണത്താൽ കൈ നിയന്ത്രിക്കാൻ പറ്റിയില്ല. ശാന്തയുടെ മുഖത്ത് പൊള്ളലേറ്റു. വായ തൽക്കാലത്തേക്കെങ്കിലും അടഞ്ഞു. ഷൈജയിൽ യാതൊരു ഭാവമാറ്റവും ഉണ്ടായില്ല എന്ന് മാത്രമല്ല, പൊള്ളൽ ഗൗനിച്ചതുമില്ല.

'എടീ പുണ്ടച്ചി മോളെ, എന്നെ പേടിപ്പിക്കാൻ നീ ആരെടി.' 
ഇരുവരും തിരിച്ചുവരുന്നുണ്ടോയെന്ന് ഷൈജ പലകുറി അടുക്കള വാതിലുവഴി പുറത്തേക്ക് ഏന്തിനോക്കി. ക്ഷമ നശിച്ചു.

'പുണ്ടച്ചി മക്കളെല്ലാം കാലകത്തി കൊടുത്ത പോലല്ല, നല്ലോണം നയിച്ചുണ്ടാക്കിയതാടി. എന്നെ ഭരിക്കാൻ വരുന്ന്. ത്ഫൂ!' വീടിന് തൊട്ടുരുമ്മി നിൽക്കുന്ന കാഞ്ഞിരയിലപോലെ നാവ് കയച്ചു.
അമ്മയെ രണ്ടുകൈകൊണ്ടും വാരിയെടുത്ത് സന്തോഷത്തിന്റെ ടൈൽസിട്ട ഇറയത്തു കൊണ്ടിരുത്തി. ചുവരിനോട് ചാർത്തിവച്ചു.

'ഇനി ഇവിടുന്ന് കൊണച്ചോളണം'  മാറിനിന്ന് നോക്കി.
കയ്യിൽ പറ്റിയ തീട്ടം, മുഖം എറ്റി. പൈപ്പ് തുറന്ന് കൈ വൃത്തിയാക്കി അടുക്കളയിൽ കയറി അടുപ്പിനു മുന്നിൽ നിന്നു.

സന്തോഷും കവിതയും തിരിച്ചുവരുന്നത് ജനൽ പാളിയിലൂടെ നോക്കി നിന്നു. കവിത എന്തിനെന്നില്ലാതെ സന്തോഷിനോട് ദേഷ്യം പൂണ്ടു. അമ്മയെ അതേപടി എടുത്ത് സുരേശന്റെ ഹാളിൽ കൊണ്ടിരുത്തി കവിത പറഞ്ഞു.

'ആ തള്ളേടെ വീടല്ലേ ഇത്. ഇവിടെത്തന്നെ കിടന്ന് ചാത്തോട്ട്.'
തിരിച്ചതേപടി കൊണ്ടിരുത്താൻ ഷൈജയ്ക്ക് അധിക നേരമെടുത്തില്ല. സന്തോഷിനെ കണ്ടെന്നോളം അമ്മയുടെ വായയിൽ നിന്നും ദയയോടെയും അപേക്ഷയോടെയുമുള്ള സ്വരങ്ങൾ മാത്രം പുറത്തേക്കു വന്നു.

'എന്റെ മോനെ, നീയെന്നെ കാണുന്നില്ലെടാ. എന്തിനാടാ അമ്മയോട് ഇങ്ങനെ...'

ശാന്തയെ ആദ്യകാലങ്ങളിലൊക്കെ ഷൈജ സഹിച്ചിരുന്നു. രാഘവന്റെ ബാധകൂടി വീടും പിള്ളേരെയും നോക്കാതെ ദിവസവും മദ്യപാനം തുടർന്നപ്പോഴാണ് ഷൈജയും മാറിത്തുടങ്ങിയത്.

കവിതയും ഷൈജയും വാക്കേറ്റവും കയ്യാങ്കളിയുമായി. 
സന്തോഷ് ഇരുവരെയും തടഞ്ഞു നിർത്താൻ ശ്രമിച്ചു. അതുവരെ അമ്മയുടെ വായ അടഞ്ഞു കിടന്നു. ചേട്ടന്മാരായ ധർമ്മനെയും വിജയനെയും  മെമ്പർ വണ്ണത്താനെയും സന്തോഷ് വിളിച്ചു. ഷാപ്പിൽ നിന്നിറങ്ങി പ്രശ്‌നപരിഹാരത്തിന് വരാൻ ധർമ്മന് തോന്നിയില്ല. അനുജന്മാരെന്ന പരിഗണനയിൽ തോട്ടിൻ കരയിലെ ചെത്തുകാരും മെമ്പർ വണ്ണത്താനും കൂടിനിൽക്കുന്ന സഭയിലേക്ക് പതുക്കെയെങ്കിലും വിജയൻ വന്നു.

'ഇതെന്ന ഓട്ടോറിക്ഷയാ' വഴുക്കുന്ന ടൈലിൽ ഇരിക്കാൻ പെടാപ്പാടുപെടുന്ന അമ്മയെ നോക്കി ചിരിച്ചുകൊണ്ട് വിജയൻ സന്തോഷിന്റെ മുറ്റത്തേക്ക് കയറി.

'കിടപ്പിലായാൽ മനുഷ്യരെ കൊന്ന് കളയാൻ പറ്റൂലല്ലോ. ആരേലും നോക്കണം.' 
വിജയൻ അമ്മയെ ദയനീയതയോടെ നോക്കി.

'ഏട്ടൻ കൊണ്ട് പൊയ്ക്കോ എന്നാൽ, ' ഷൈജയുടെ ശബ്ദം പൊന്തിയപ്പോൾ വിജയൻറെ മുഖത്തെ ദയനീയത മാഞ്ഞു.

'വിജയാ, മോനെ. ഞാൻ എന്ത് ചെയ്തിട്ടാടാ..!' ആളെക്കാണുമ്പോഴുള്ള അമ്മയുടെ കരയുന്ന മുഖഭാവം ഷൈജയ്ക്ക് പുതിയതായിരുന്നില്ല. തന്റെകൂടെ വീടുവിട്ടിറങ്ങിവന്ന പെണ്ണിനോട് കാണിച്ച കാര്യങ്ങളൊക്കെ ഒരു നിമിഷംകൊണ്ട് മനസ്സിലൂടെ മറഞ്ഞപ്പോൾ വിജയനിൽ ബാക്കിയായ സഹതാപം അലിഞ്ഞില്ലാതാവുന്നതുപോലെ തോന്നി.

'ഭാഗം വെപ്പ് കഴിഞ്ഞപ്പോൾ കൃത്യമായി എഴുതിയതാണ്, തറവാട് ആർക്കാണോ അവർ അമ്മയെ നോക്കുമെന്ന്.' 


'ഇത്രകാലം സഹിച്ചു, നോക്കി. ഇനിവയ്യ. ഒറ്റയ്ക്ക് പേറാൻ, അമ്മയുടെ പേരിലുള്ള വീടന്നെയല്ലെ നിങ്ങളതും.' സന്തോഷ് കാര്യം വണ്ണത്താനോട് സമാധാനപരമായി പറയും മുന്നേ ഷൈജ സ്ഥാപിച്ചു.

ശാന്തയുടെ ചുറ്റും തീട്ടനാറ്റം പരന്നു തുടങ്ങി, വിജയനും വണ്ണത്താനും കഴുകാൻ ആജ്ഞാപിച്ചെങ്കിലും ഷൈജ മുഖം തിരിഞ്ഞു നിന്നു. കവിത അകത്തേക്ക് കയറി വാതിലടച്ചു.
കോടിയ മുഖവുമായി ടൈലിലിരിക്കുന്ന അമ്മയ്ക്ക് ചുറ്റും സന്തോഷും വിജയനും കസേരയിട്ടിരുന്ന് തീരുമാനത്തിലെത്താനുള്ള ആശയക്കുഴപ്പത്തിൽ മുഖം താഴ്ത്തിവച്ചു. കസേലയിരുന്ന് മെമ്പർ വണ്ണത്താൻ ഇടംകണ്ണുകൊണ്ട് ഷൈജയെ നോക്കിക്കൊണ്ടിരുന്നു, മഴക്കാറിന്റെ എല്ലാ കോളും അയാളിലും കണ്ടുതുടങ്ങി.

നിന്ന് മടുക്കുന്നവരൊക്കെ ജാതിത്തടിയിൽ തീർത്ത നീളം ബെഞ്ചിൽ മാറിമാറി ചന്തിയുറപ്പിച്ചു. ചിലർ അഭിപ്രായങ്ങൾ പങ്കുവച്ചു. തീട്ടനാറ്റം സഹിക്കാൻ പറ്റാതെ ചിലർ വളപ്പിലെ തോട്ടിൻ വക്കത്തിറങ്ങി നിന്നു.

ഇരുടുമൂടിത്തുടങ്ങി. മഴക്കാറും. ചുറ്റും കൂടിനിന്നവർക്ക് മടുത്തു തുടങ്ങി. 
സുരേശൻ വീട്ടിലേക്കെത്തി. ചിലർ അടുത്തതെന്തെന്നുള്ള ആകാംക്ഷയിൽ എഴുനേറ്റ് നിന്നു. നേരത്തെ കുടിയടങ്ങിയ സുരേശനെ കണ്ടപ്പോഴാണ് ചിലർക്ക് ഒന്നാം തീയതിയാണെന്നും ബീവറേജ് അവധിയാണെന്നും ഓർമ്മവന്നത്.

'അമ്മയെ തിരിച്ചു സുരേശന്റെ വീട്ടിലേക്ക് തന്നെ കേറ്റുക. അല്ലാതെന്തു ചെയ്യാൻ. വാക്കാലല്ല, പ്രമാണം അങ്ങനെയല്ലേ.' രാവിലത്തെ ദേഷ്യം ഉള്ളിൽ തികട്ടിക്കൊണ്ട് വണ്ണത്താൻ കാര്യം പറഞ്ഞു. എല്ലാവരുടെയും മുഖത്തേക്ക് മാറി നോക്കി.
സുരേശന്റെ മറുപടിക്ക് കാത്തു നിന്നവരെ നിരാശപ്പെടുത്തിക്കൊണ്ട് വീടിന്റെ പിന്നിൽ നിന്നും ഒരു ലിറ്ററിന്റെ പ്ലാസ്റ്റിക് കുപ്പിയെടുത്തുകൊണ്ട് സുരേശൻ വയലിലേക്കിറങ്ങി നടന്നു.

'ഉള്ളതൊക്കെ വിറ്റുപെറുക്കിയാണ് തറവാട് വീട് പൊളിച്ചു ഞാനിത് പണിതത്. സ്ഥലേ അങ്ങേർക്കുള്ളതുള്ളു. വീട് ഞാൻ നയിച്ച് പണിതത് തന്നെയാണ്. അത്രതന്നെ ഇവർക്കും കിട്ടീനല്ലോ, ഇവിടെ നിക്കട്ടെ.' ഷൈജ തന്റെ വാദം പറഞ്ഞു.

'എന്നോട് ചോദിച്ചിട്ടൊന്നും അല്ലല്ലോ ഭാഗവും വീതംവെപ്പും നടത്തിയത്. ഇനി ഇവിടേക്ക് കേറരുതെന്ന് വച്ചതാണ്. പിന്നെ ചെയ്യാണ്ട് നിക്കാൻ പറ്റൂലല്ലോ. ചോരയായിപോയില്ലേ' ദയനീയതയോടെ എല്ലാവരുടെയും മുഖത്തേക്ക് മാറിമാറി നോക്കുന്ന അമ്മയെ നോക്കി അൽപ്പം ദേഷ്യം കനപ്പിച്ചുകൊണ്ട് വിജയൻ പറഞ്ഞൊപ്പിച്ചു.
'നിങ്ങള് പറയുന്നത്ര ഭീകരതയൊന്നും ഞാൻ കാണുന്നില്ലല്ലോ.' എല്ലാവരുടെയും നടുക്കിരിക്കുന്ന ശാന്തയെ വണ്ണത്താൻ സൂക്ഷിച്ചി നോക്കി. മോനെ എന്നവിളിയോടെ ശാന്ത വണ്ണത്താന്റെ കയ്യിൽപ്പിടിച്ചു.

'നിന്റെയും കൂടെ അമ്മയല്ലേ സന്തോഷേ' വണ്ണത്താൻ കസേരയിൽ നിന്നെഴുന്നേറ്റു. ഉത്തരമില്ലാതെ സന്തോഷ് ഫോണിൽ ഞെക്കി. കവിത വാതിൽ തുറന്നു.
'ഇവിടിപ്പോ ആര് നോക്കും. ഞങ്ങൾ രണ്ടുപേരും ഇവിടെ എല്ലാ നേരവും കാണില്ലല്ലോ. ആ വീട്ടിന് ടൈലിട്ടുകൊടുത്തത് ഞാനാ, പണി എടുപ്പിച്ചത് ഞാനാ. എന്റെ ഓള് അവിടെ കേറിക്കൂടാന്നു വച്ചാൽ. അതൊക്കെ ഞാൻ അമ്മയ്ക്ക് വേണ്ടി ചെയ്തില്ലേ.' സന്തോഷ് പറഞ്ഞു.

പ്രശ്നം പഴയകാര്യങ്ങളിലേക്ക് സഞ്ചരിക്കാൻ തുടങ്ങിയപ്പോൾ കൂടിനിന്നവരുടെ മടുപ്പ് മാറി, തുമ്പത്തിരുന്നവർ എഴുനേറ്റ് ചന്തിക്കെ പൊടിതട്ടി. മുറ്റത്തേക്ക് നീങ്ങിയവർ തീട്ട നാറ്റം കൂടിയതിനാൽ പിന്നിലേക്ക് തന്നെ നീങ്ങി.

ഇരുട്ടി. മഴപൊടിയെ അവസാനമെന്തെന്നറിയാനുള്ള ആളുകളുടെ ത്വര സ്വന്തം വീട്ടുകാര്യങ്ങളിലേക്ക് നീങ്ങിയതുകൊണ്ടാണെന്ന് തോന്നുന്നു, ചിലരൊക്കെ വീടുകളിലേക്ക് തിരിച്ചു. ചിലർ തിരക്ക് കൂട്ടി. ഒരുലിറ്റർ കുപ്പിയിൽ നിറച്ചകള്ള് സുരേശൻ പിന്നാമ്പുറത്തു കൊണ്ടുവച്ചശേഷം എല്ലാവരെയും പോലെ മുന്നിൽ വന്നുനിന്നു.

'നിന്റെ അമ്മയല്ലേട, അകത്തേക്ക് കൊണ്ടുപോയാട്ടെ.' മാറി നിന്ന സുരേശനെ നോക്കി വിജയൻ പറഞ്ഞു. സുരേശൻ അമ്മയെ താങ്ങിയെടുത്തു, ഷൈജ കത്തിയുമായി മുന്നിൽനിന്ന് അമ്മയെ താഴെ വയ്ക്കാൻ ആംഗ്യം കാണിച്ചു. സുരേശൻ അമ്മയെ താഴെവച്ചു. ടൈൽസിൽ പരന്നുപിടിച്ച തീട്ടം ദേഹത്തെല്ലാം പറ്റി. സുരേശൻ നാറ്റം അറിഞ്ഞതേയില്ല.

'അമ്മയുടെ മരണശേഷം എന്നല്ലേ, പറ്റുന്നോൻ മാത്രം ഈ പറമ്പിലേക്ക് കയറിയാൽ മതി.' അവസാനയസ്ത്രമെന്നോളം വിജയൻ കടുപ്പിച്ചു. 
ദേഷ്യത്തോടെ സന്തോഷിനെയും ഷൈജയെയും നോക്കി കണ്ണുരുട്ടി.
സന്തോഷും ഷൈജയും ഭയമൊളിപ്പിക്കാനാവാതെ വാക്കുകൾ പരതി.  ചെത്തുകാർ അന്തിക്കേറാൻ പിരിഞ്ഞു. താൽപ്പര്യമില്ലാതെ വണ്ണത്താൻ ഷൈജയെ തിരിഞ്ഞുനോക്കിക്കൊണ്ട് ഇറങ്ങി നടന്നു. ആളൊഴിഞ്ഞു. എങ്ങുമെത്താതെ ചർച്ച മഴയ്‌ക്കൊപ്പം പിരിഞ്ഞുപോയി. കാലവർഷത്തെ ആദ്യത്തെ മഴ ശക്തിയായി പെയ്തിറങ്ങുന്നത് നോക്കി ആരോ സന്തോഷിന്റെ ഇറയത്തുവിരിച്ച പുൽപ്പായയിൽ ശാന്ത ചെരിഞ്ഞു കിടന്നു.

'പുണ്ടച്ചി മക്കളെ, എനിക്കൊരു പുതപ്പുതാടി' പറ്റാവുന്ന ശബ്ദത്തിൽ വിളിച്ചു ചോദിക്കുന്നുണ്ട്.

18 ജുലൈ 2025

ഉത്തരം

ഒരു ഫിക്ഷനിൽ നിന്ന് ഇന്ന് ഒരാളോട് ഫോണിൽ സംസാരിച്ചു. തീയതി ഷെഡ്യൂൾ ചെയ്ത് സമയവും ഫിക്സ് ചെയ്തു വിളിച്ചതാണ്. ഒരു മണിക്കൂറ്. സമാധാനത്തിനുവേണ്ടി എൺപത്തിയഞ്ചു ദിവസം ജയിലിൽ കിടന്നൊരാൾ. 

ഞങ്ങൾ നാല് അസിസ്റ്റന്റ്. ജഡ്ജ്‌മെന്റോന്നും ഉണ്ടാവരുതുന്നുള്ള സംവിധായകന്റെയും പ്രൊഡക്ഷൻ ഓഫീസിന്നുമുള്ള നിർദ്ദേശവും. സംഭവം അടപടലം സബ്ജെക്റ്റീവ്. പന്ത്രണ്ട് പോയന്റുകൾ. എത്ര നേരം സംസാരിച്ചാലും ഞങ്ങൾ അസിസ്റ്റന്റുകൾ പോയന്റുകളേ നോട്ട് ചെയ്യാറുള്ളു. ഇവിടെ തന്ന ടാസ്ക്, ആന്റഗോണിസ്റ്റ് ഓർ പ്രൊട്ടഗോണിസ്റ്റ്. നായകനോ വില്ലനോ എന്ന് പറഞ്ഞാൽ പ്രകൃതി വിരുദ്ധവും പൊളിറ്റിക്കൽ ഇൻ കറക്ടറ്റുമാവും. തൊണ്ടിമുതലും ദൃക്‌സാക്ഷിയും പോലെ. ഗൂഗിൾ മീറ്റിൽ താടിയെല്ല് മാത്രം കാണിച്ചുകൊണ്ട് അയാൾ ക്യാമറക്ക് അപ്പുറം. ചോദ്യമില്ല. ഉത്തരങ്ങളിലേക്ക് എത്തിക്കുക എന്നത് ഞങ്ങൾ സ്ക്രപ്റ്റ് അസിസ്റ്റന്റുകളുടെ ജോലിയാണല്ലോ. 

ഉത്തരം ഒന്ന് : " സ്റ്റൂളെടുത്തു നാലടി, അച്ഛന്റെ നടു ഒടിക്കേണ്ടി വന്നു, ഒരുമാസം - നാല് സ്റ്റീൽ. ഭാഗം വെക്കുമ്പോ നോക്കണ്ടേ" 

ജഡ്ജ്‌മെന്റ് : ആൻറ്റഗോണിസ്റ്റ്. നോ ഡൌട്ട്. 

ഉത്തരം രണ്ട് : "അളിയന്റെ കയ്യിന്നു ഡെയിലി രണ്ടു പെഗ് കിട്ടും എന്ന് വരുമ്പോ, ബോധം ഇല്ലാത്ത ഭ്രാന്തുള്ള (ഉദ്ദേശിച്ചത് ബുദ്ധിമാന്ദ്യം - ID) അമ്മയെയും എന്നെയും മറന്ന് മൂന്നുസെന്റിൽ വാക്കാൽ കേറി താമസിക്കാൻ കൊടുക്കാൻ പാടുണ്ടോ." 

ജഡ്ജ്‌മെന്റ് : ന്യുട്രൽ, നമുക്കാർക്കും അതൊന്നും മനസ്സിലാവൂല. നാട്ടുകാരൊക്കെ ഉള്ള നാടാണല്ലോ. 

ഉത്തരം മൂന്ന് : "രാജ്യം ഭരിക്കുന്നവരാണ് പഞ്ചായത്തു ഭരണം. വീടിന്റെ അവകാശം മൂത്തവൾക്ക് വേണ്ടിയുള്ള കേസ്." 

ജഡ്ജ്‌മെന്റ് : ന്യുട്രൽ, പ്രൊട്ടഗോണിസ്റ്റ് ആവാം, പക്ഷെ നായകനാവാനുള്ളതില്ല. 

ഉത്തരം പതിനൊന്ന് : "അളിയനാണ് വാർഡ് മെമ്പർ. ചേച്ചിയുടേത് പ്രേമ വിവാഹവും. വക്കീല് പറഞ്ഞു കേസ് അവരെ ജയിക്കൂ എന്ന്. പ്രേമിച്ച പയ്യൻ ഇട്ടിട്ട് പോയപ്പോ കാണുന്നോനോടൊക്കെ ഒരുതരം അറപ്പും. അങ്ങനെ ID യുള്ള ചേട്ടനേം അമ്മയേം നോക്കാൻ ഇനി ചേച്ചിയും ഓൾടെ കെട്ടിയോൻ മെമ്പറും ഉണ്ടല്ലോ, എന്ന സമാധാനവും സമാധാനകേടും ഒരുമിച്ചു വന്നപ്പോ അടുത്തുള്ള ശ്മശാനം നമ്മളെ മതക്കാർക്കും വേണം ന്ന് പറഞ്ഞങ് പരാതി കൊടുത്തു. അക്ഷയശ്രീയിൽ ആദ്യമേ പറഞ്ഞിരുന്നു, കേസ് വരും റിമാൻഡ് ആവുംന്ന്." 

ജഡ്ജ്‌മെന്റ് : സപ്പോർട്ടിങ് റോൾ ആണേൽ ഓക്കെ ആണ്. ഒരു എന്റർടൈനിംഗ് ഫാക്ടർ ഇല്ല. 

ഉത്തരം പന്ത്രണ്ട് : "ഇപ്പൊ ലൈഫിൽ എന്തോ ഒരു സമാധാനം ഉണ്ട്, ഭർത്താവിനെ കൊന്ന് വന്നവരും, മാല മോഷണവും, ബീവറേജിലെ കുപ്പി മോഷണവും വരെയുള്ള സ്ത്രീവാർഡ്, അതിൽ ഏറ്റവും ചെറുതായ് ഞാനും" 

ഒരു സിനിമക്കുള്ള സ്കോപ് ഒന്നുല്ല, പക്ഷെ നല്ല ജമണ്ടൻ ലൈഫ് ആണ് ആളുടെ. അവിടെയാണ് പ്രശനം.

കുട്ടമ്മിലെ തീ

കുട്ടമ്മിൽ ജലീൽ മഴയത്തു നാട് കത്തിച്ച കഥയാണ് കുട്ടമ്മിൽ പള്ളി കവലയിലെയും, കുട്ടമ്മിൽ വായനശാലക്ക് മോളിലെയും, മിനി സ്റ്റേഡിയത്തിലെയും മദ്യപാന സഭയിലെ പ്രധാന ചർച്ച. കടലുകടന്ന് അറേബിയയിലെ മദ്യപാന സഭയിലും ചർച്ചയെത്തി. എന്തിനു പറയുന്നു, യുകെയിലെ ബിജേഷിന്റെ അവിടെയും ഇവിടെയും തൊടാതെയുള്ള വാട്സാപ്പ് ഓഡിയോ ഗ്രൂപ്പിൽ വന്നതുകൊണ്ടാണ് ഷിജു കാര്യത്തിൽ ചെവികൊടുത്തത് തന്നെ.

ഇരുപത്തിമൂന്ന് വർഷങ്ങൾക്കപ്പുറം രണ്ടു ദിവസം മാങ്ങാട്ടുപറമ്പ കെഎപി യിലെ നാലു ബസ്സ് പോലീസുകാരുടെ ഉറക്കം കളഞ്ഞ സംഭവമാണ് എന്നതിനപ്പുറമൊന്നും ഷിജുവിനറിയില്ല. അന്ന് മാങ്ങാട്ടുപറമ്പ ക്യാമ്പിലെ പോലീസ് ട്രെയിനിയായിരുന്നു. 
പോലീസിൽ നിന്നും ഓഡിറ്റിങ്ങിലേക്കുള്ള മാറ്റം, പരീക്ഷ, കല്ല്യാണം, കുട്ടികൾ - അങ്ങനെ നാട്ടുകാര്യത്തിലൊന്നും തലയിടാതെയുള്ള പോക്കായിരുന്നു. ഭാര്യയോടുള്ള പുതുമോടി തീർന്നതിനു ശേഷം നാട്ടിൽ തന്നെ ജോലി തരപ്പെടുത്തി. ഇന്ന് നാട്ടിൽ നടക്കുന്ന സകലകാര്യങ്ങളും അറിഞ്ഞില്ലേൽ ശ്വാസം മുട്ടല് പോലെ തോന്നുമെന്ന് മാത്രമല്ല ചിലതിലൊക്കെ ഇടപെട്ടാലേ പ്രധാനിയാവുള്ളു എന്ന ബോധവും കലശലാണ് ഷിജുവിന്.

ഇത്തരം തൊങ്ങലുകൾ കിട്ടുന്ന ദിവസം മാത്രമുള്ള ഇറക്കമുണ്ട് വായനശാല മോളിലെ മദ്യപാന സഭയിലേക്ക്, അന്ന് നാന്നൂറ് ഉറുപ്പ്യടെ അര ഷിജുവിന്റെ വക സ്പോൺസറാണ്. മദ്യം സ്പോൺസർ ചെയ്തിരിക്കുന്ന സഭയിൽ തമ്പ്രാന്റെ തരം അധികാരപ്പെടുത്തൽ ഒരുതരം സുഖമാണെന്ന ധാരണ അയാൾക്കുണ്ട്.

'ആ നായി അൽമക്ക് ന്തിന്റെ ചൊറിച്ചിലാണ്. പറയാനുള്ളത് നേരെ ചൊവ്വേ പറഞ്ഞാ പോരെ' പെഗ്ഗോഴിക്കുന്നതിനു മുന്നേ മാള ചർച്ച തുടങ്ങിയിട്ടു.

'അടിച്ചു ചാത്തോട്ടെ ന്നു വച്ചാൽ ഇതിപ്പോ ഉപദ്രവം നാട്ടുകാർക്കാണ്. നാട്ടുകാർക്ക് ഫേസ്ബുക്കിൽ കേറാൻ പറ്റാത്ത അവസ്ഥയായി. ഇത് നട്ടപാതിരാക്ക് ബെഡ്‌റൂമിൽ കണ്ട കഥയൊക്കെയല്ലേ ലൈവിൽ വന്ന് വിളിച്ചു പറയുന്നേ. ഇന്നലത്തെ ലൈവിൽ സജീവന്റെ ഭാര്യയുടെ പാന്റിയുടെ കളറ് വരെയുണ്ട്. പിന്നെ ഇടക്കിടക്ക് വന്നു പോകുന്നവരുടെ പേരും. സജീവനിനി ഫേസ്ബുക്കിൽ കേറാതിരിക്കുന്നതാ നല്ലേ.' മോനിച്ചൻ അൽമയുടെ ഫേസ്ബുക്കിലെ ലൈവ് വീഡിയോ സഭയിലേക്ക് നീട്ടി കാണിച്ചു.

'മടിയിൽ കനമുള്ളവരേ പേടിക്കേണ്ടു.' മാള ആദ്യത്തെ പെഗ്ഗ് കമിഴ്ത്തി ഗ്ലാസ്സ് നിലത്തുവച്ചു.

അൽമയെന്ന ഷിനോജ് വത്സനെ പൊതുശല്യമെന്ന അപേക്ഷയുണ്ടാക്കി നൂറുപേരുടെ ഒപ്പ് ശേഖരിച്ച് സ്ഥലം സിഐയുടെ സ്പെഷ്യൽ പെർമിഷനോട് കൂടി വയനാട് ഡീഹൈഡ്രേഷൻ സെന്ററിൽ എത്തിച്ചത് മോനിച്ചനാണ്. എത്തിച്ചതിന്റെ നാലാം നാൾ ഷിനോജ് വത്സനിട്ട ഫേസ്ബുക്ക് പോസ്റ്റാണ് നാട്ടുകാരെമൊത്തം കുട്ടമ്മിൽ ജലീൽ മഴയത്തു നാട് കത്തിച്ച കഥ വീണ്ടും ഓർമ്മിപ്പിച്ചത്. സത്യം പറഞ്ഞാൽ ഫേസ്ബുക് പോസ്റ്റിനും ആ സംഭവത്തിനും വലിയ ബന്ധമൊന്നുമില്ല.

ഉപദ്രവം ന്നു വച്ചാൽ ആള് കൂടുന്നിടത്ത് ദേഷ്യമുള്ളവരെ, പ്രത്യേകിച്ച് അയൽവാസികളെ തെറിവിളിക്കുക, പുലഭ്യം പറയുക. കയ്യാങ്കളിയോടടുക്കുമ്പോ 'എനിക്ക് സർട്ടിഫിക്കറ്റുണ്ടെടാ, തൊട്ടാൽ ജയില് കേറ്റും' ന്ന് പറഞ് ഭ്രാന്തിന്റെ സർട്ടിഫിക്കറ്റ് കാണിക്കുക, തന്നെപ്പറ്റി ആരെങ്കിലും സംസാരിക്കുന്നുണ്ടോയെന്ന് കൂട്ടങ്ങളിലും എന്തിന്, രാത്രി ബെഡ്‌റൂമിൽ വരെ ഒളിഞ്ഞു വീക്ഷിക്കുക. 
ഫോൺ വിളിക്കുന്നവരെ കണ്ടാൽ മാറാതെ പിന്തുടരുക. മദ്യമോ പണമോ ചോദിച്ചിട്ട് തരാത്തവരുടെ മക്കളെ വധഭീഷണി മുഴക്കുക, പോലുള്ള പൊതു ശല്യ പ്രവർത്തനങ്ങളാണ്. പക്ഷെ ബോധമുള്ളപ്പോൾ മാത്രമേ സത്യം വിളിച്ചു പറഞ്ഞുള്ള ഫേസ്ബുക് ലൈവുള്ളു, അന്നാണേൽ ഡീഹൈഡ്രേഷൻ സെന്ററിലായിരിക്കും.

'എല്ലാ ടീമിലും ഇപ്പൊ ഉമേശനുണ്ട്, കുടുംബം നോക്കിക്കോ നായ്ക്കളെ.' ഇതാണ് അൽമയുടെ ഫേസ്ബുക്ക് പോസ്റ്റ്. ഇതും കുട്ടമ്മിൽ ജലീലും തമ്മിലുള്ള ബന്ധമാണ് ഷിജുവിന് പിടികിട്ടാത്തത്.

'കുട്ടമ്മിൽ ജലീൽന്റെ ന്തോ ഇണ്ടല്ല ഇപ്പൊ ' ഇതൊക്കെ തനിക്കറിയാവുന്ന കാര്യങ്ങളാണ് എന്ന കണക്കെ അൽമയുടെ വിഷയം മാറ്റി ജലീലിന്റെ കാര്യമറിയാൻ ഷിജു ചൂണ്ടയിട്ടു. അതുകേട്ട മാള ആർത്തു ചിരിച്ചു. 'അതങ്ങനെ പട്പ്രാണിയായി. എന്തൊക്കെയാരുന്നു. ഇപ്പോയിതാ പട്ടി വട്ടം ചാടി ബൈക്കേന്ന് വീണ് ജീവച്ഛവമായി. ഓടുന്ന വണ്ടീന്ന് വാളുവീശാൻ പഠിക്കാൻ വെട്ടിയ പട്ടികളുടെ ശാപാണ്. അൽമക്ക് കള്ളു മൂത്തു ഭ്രാന്തായതാണ്. ജലീലിന് ധൈര്യം മുത്തും. എന്നാലും ഓന്റൊരു ധൈര്യം.!'

'പറഞ്ഞാ മതിയ, കഞ്ചാവ് കേസിൽ നാലഞ്ചു പോലീസ്കാര് വീട്ടില് കേറാൻ നോക്കിയപ്പോ മുറ്റത്തുകിടക്കുന്ന സൈക്കിൾ ചെയിൻ ഒറ്റവലിക്കൂരി പൊരേക്കറിയാൽ ഒറ്റൊരുത്തൻ തിരിച്ചെറങ്ങൂല ന്നു പറഞ്ഞു പൊലീസുകാരെവരെ പേടിപ്പിച്ചു വിട്ട കക്ഷിയാ.'

'അഞ്ചു പൊലീസുകാരെ ഓൻ തോളത്തിറുക്കി നടക്കൂലേ, എജ്ജാതി പൊതാ.'

'അൽമയും ഓനും കണക്കന്നെ. രണ്ടിനും ബോധുല്ല. ബോധുണ്ടെങ്കിലേ പേടിണ്ടാവു. ബോധുണ്ടെങ്കിലേ വെളിവുണ്ടാവൂ'

അൽമയുടെയും ജലീലിന്റെയും വളർച്ചയിൽ പരിതപിച്ചും തളർച്ചയിൽ ആശ്വാസം പ്രകടിപ്പിച്ചും അന്നത്തെ മദ്യപാനസഭ പിരിയുമ്പോൾ ഷിജുവിന് കാര്യമറിയാത്തതിലുള്ള നിരാശ കനത്തുനിന്നു. അൽമയുടെ ഫേസ്ബുക്ക് നോക്കിയിട്ടും കാര്യമൊന്നും മനസ്സിലായുമില്ല.
ഭാര്യ രേഷ്മയോട് പാത്രം കഴുകാതെ ഫോൺ നോക്കിയിരുന്നതിന് ദേഷ്യപ്പെട്ടു, അയലിൽ നിന്ന് കൊണ്ടുവച്ച തുണി മടക്കി ഷെൽഫിൽ വയ്ക്കാത്തതിനു ചീത്ത പറഞ്ഞു. അതൊന്നും മൈൻഡ് ചെയ്യാതെ രേഷ്മ സോഫയിൽ നടു നീട്ടിവച്ച് ഫോണിലേക്ക് മുഖമമർത്തി.

രണ്ടാം ശനിയാഴ്ച ലീവ്.
ഫോണ് നോക്കി സോഫയിൽ ഉറങ്ങിവീണ രേഷ്മയെ ചീത്തവിളിച്ചുകൊണ്ടുതന്നെ അന്നത്തെ തുടക്കം. ഫോണ് നീട്ടി ഒറ്റയേറ്, ബാത്റൂമിന്റെ അലൂമിനിയം ഫാബ്രിക്കേഷൻ ഡോർ കീറി അതിൽ തറച്ചു നിന്നു. 
ഉറക്കമറ്റ രേഷ്മ കുറച്ചുസമയം സ്ഥലകാല ബോധമില്ലാതെ എഴുന്നേറ്റപടി നിന്നു. കാല് തൂക്കി മുന്നോട്ടുവച്ചു; ഫോണെടുത്തു. ഇത്തവണ വലിയ പൊട്ടലൊന്നുമില്ല, കഴിഞ്ഞ തവണത്തെ ഏറിൽ പൊട്ടിയ ഡിസ്‌പ്ലെതന്നെ. മാക്സി തുമ്പുകൊണ്ട് തുടച്ചു. അടുക്കളയിലേക്ക് കയറി.

'ഒരു ഫുള്ള് കിട്ടീട്ടുണ്ട് രാവിലെത്തന്നെ നോക്കിയാലോ' പണിക്ക് പോകാനിറങ്ങിയ മാളയെ വിളിച്ചു പറഞ്ഞു. കേൾക്കേണ്ട താമസം പണിഡ്രെസ്സ്‌ വായനശാല ജനാലയിലിറുക്കി ഷിജുവിന്റെ വീട്ടുമുറ്റത്തെത്തി. പിന്നിലുള്ള റബ്ബറിലേക്ക് വെള്ളവും ഗ്ലാസ്സും കൊടുത്ത് മാളയെ പറഞ്ഞുവിട്ട ശേഷം നേരെ ബീവറേജിൽ ചെന്ന് ഫുള്ള് വാങ്ങി പിന്നാമ്പുറത്തൂടെ റബ്ബറിലേക്ക് കയറി. 
ദോശയും സാമ്പാറും, ഇന്നലെ വീട്ടിൽ സാമ്പാറായിരുന്നത് ഷിജു ഓർത്തു.  ദഹിക്കാതെ; ചോദിക്കാതെ വീട്ടിലേക്ക് പോയ മാളയെ നോക്കി ഫുള്ള് നീട്ടി.

'നീ ആ ജലീലിന്റെ കഥയൊന്നു പറഞ്ഞെ.' മൂടി തുറക്കും മുന്നേ ഷിജു തന്റെ ഉദ്ദേശം എടുത്തിട്ടു.

'ഏത് കുട്ടമ്മിൽ ജലീലാ' മാള ഗൗനിക്കാതെ പെഗൊഴിച്ചു. അകത്താക്കി. ഷിജുവിന് ഒന്നൊഴിച്ചു. കഥകേൾക്കാതെ ഷിജു വലിക്കില്ലെന്ന ബോധത്തിൽ മാള തുടങ്ങി.

'അഷ്‌റഫിന്റെ ഓള് മരിച്ചിട്ടില്ലേ, അതന്നെ.' അഷ്‌റഫിന്റെ ഓളും കുട്ടമ്മിലെ ജലീലും എന്തെന്ന കണക്കെ ഷിജു മാളയെ നോക്കി. മാള പെഗ്ഗ് ഗ്ളാസ്സിലേക്കും. ഗ്ലാസ്സൊഴിയുന്നതുവരെ മാള മിണ്ടിയില്ല. ഒഴിഞ്ഞ ശേഷം തുടർന്നു.

'ഫ്ലവർ മിൽ നടത്തുന്ന ഉമേശൻ, 
അഷ്‌റഫിന്റെ ഭാര്യയ്‌ക്ക് അയച്ച ന്തോ ഒരു മെസേജ്! 
നല്ല മഴില്ലൊരൂസം അഷ്‌റഫ് പൊരക്ക് പോമ്പോ ഓളെ ഫോണിലൊരു മെസേജ്. ന്തോ കണ്ടെന്ന മട്ടിൽ ഓൻ രണ്ടു പൊട്ടിച്ചു. ആ മൂച്ചിന് അവള് കേറി കഴുത്തിൽ കത്തികൊണ്ട് സ്വയമൊരു വരവരച്ചു. ചോരയൊലിപ്പിച്ച് നിക്കുന്ന ഓളെ ആശുപത്രീല് എത്തിച്ചെങ്കിലും! രണ്ടു പെൺ കുട്ടികൾക്ക് തള്ള ഇല്ലാണ്ടായി.'

ഈ കഥ പുതിയ അറിവാണേലും അറിയാതെ വായിന്നു വീണു. 'കുട്ടമ്മിൽ ജലീൽ?'

'ആയുധ പരീശലനം ആക്രമിക്കാൻ വരുന്ന നായ്ക്കളോട് കാണിക്കേ, കടി കിട്ടി ആശുപത്രിയിലെത്തിയ ജലീലാണ് കുടുംബത്തിന് പുറത്ത് ഇക്കാര്യം ആദ്യം അറിഞ്ഞത്. നിജസ്ഥിതിയറിയാതെ വാട്സാപ്പ് ഗ്രൂപ്പുകളിൽ ന്തൊക്കെയോ മെസേജങ്ങയച്ചു.' മാള പറഞ്ഞതുപോലെ അതൊന്നും എന്തൊക്കെയോ മെസേജുകളായിരുന്നില്ല.

'അവൾ ഗുസൽ ചെയ്യട്ടെ,  അശ്ർ സമയത്തിന്റെ ആരംഭം മുതൽ നമ്മൾ ഇതിനുള്ള പ്രതികാരം തുടങ്ങിയിരിക്കുന്നു. ഫജ്ർ നു മുന്നേ നമുക്കിത് തീർക്കണം. അംസൈനാ വ-അംസ അൽ-മുൽകു ലില്ലാഹി വ-അൽ-ഹംദു ലില്ലാഹി ലാ ഇലാഹ ഇല്ലാ അള്ളാഹു വഹ്ദാഹു ലാ ശാരിക ലാഹു, ലാഹു അൽ-മുൽകു വ-ലാഹു അൽ-ഹംദു വ-ഹുവാലി ക്യാലിഖുൽ. (നാം വൈകുന്നേരത്തിലെത്തിയിരിക്കുന്നു, ഈ വൈകുന്നേരം എല്ലാ പരമാധികാരവും അല്ലാഹുവിനാണ്, എല്ലാ സ്തുതിയും അല്ലാഹുവിനാണ്.) 
ഈ രാത്രിയിലെ തിന്മയിൽ നിന്നും അതിനെത്തുടർന്നുള്ള നന്മയും ഞാൻ നിങ്ങളോട് ചോദിക്കുന്നു. ഈ രാത്രിയിലെ നന്മ ഞാൻ നിങ്ങളോട് ചോദിക്കുന്നു. നമ്മുടെ സഹോദരിക്ക് വേണ്ടി. അബൂ ഹുറൈറ.

'ജലീലിന്റെ കൂടൊരുത്തനുണ്ട്, ചാണ്ടി സുയിത്. 
അവൻ കൊടുത്ത കഞ്ചാവിൽ മുഴക്കിയ ആഹ്വാനത്തിന്റെ മാറ്റങ്ങൾ ദീനിൽപ്പെട്ടവർ കാര്യമറിയും മുന്നേ സംഭവിച്ചിരുന്നു. കഞ്ചാവ് വലിച്ചാൽ ജലീൽ സാധാരണയിലും കൂടുതൽ ദീനിയാണ്.' 
ഈ പറയുന്ന ചാണ്ടിയുടെ കയ്യിന്ന് ഷിജുവിന് ഇലക്ഷൻ ഡ്യൂട്ടിക്കിടയിൽ ഒന്ന് കിട്ടീട്ടുണ്ട്. മന്ത്രിയെ തെറിവിളിച്ച് ഫേസ്ബുക്കിൽ പോസ്റ്റിട്ട കേസിനും അകത്തായതാണ്. ഈ സമയം ഒതുങ്ങേണ്ടതോ ഒടുങ്ങേണ്ടതോ ആണ്.

'മരണം ഒറപ്പിച്ചയിന് ശേഷം പിന്നെ ഈടെ കത്തിക്കലും കത്തിക്കുത്തും ഒക്കെയാരുന്നു. കാര്യങ്ങളൊക്കെ പിന്നെ വാട്സാപ്പിലാരുന്നു പോക്ക്'

അറിയാവുന്ന കാര്യം കൂട്ടി അടുത്ത പെഗ്ഗിൽ ഷിജു മനസ്സിലൊരു കഥ രൂപപ്പെടുത്തി. 
സംഘം ചേരുന്നവരെ തടയണമെന്ന ഓർഡറിൽ പുഴക്കരയിലേക്ക് പോയ ബസ്സിലായിരുന്നു അന്ന് ഷിജു. അവിടെയെത്തുമ്പോഴേക്കും സുകുമാരന്റെ വീട് ആക്രമിക്കുന്നെന്ന് പറഞ്ഞ് ബസ്സിലെ മുപ്പത്തിയെട്ടു പോലീസുകാരും സംഭവസ്ഥലത്തെത്തി. സുകുമാരന്റെ മകനാണ് ഉമേശനെന്ന് അന്ന് അറിയില്ലാരുന്നു. 
ശവശരീരം ആശുപത്രിയിൽ നിന്നും വീടെത്തുന്നതിനു മുന്നേ ഉമേശന്റെ വീടിന്റെ ഒരുഭാഗം തകർക്കാൻ തുടങ്ങി. വീട്ടുമുറ്റത്തുള്ള ലോറി അടിച്ചു തകർത്തു. ഉമേശന്റെ സുഹൃത്തുക്കളായ സജീവന്റെയും ചുണ്ടൻ പ്രകാശന്റെയും വീടൊക്കെ അന്ന് അടിച്ചു തകർത്തു.
പോലീസ് പെട്ടെന്നെത്തിയതുകൊണ്ടും ജലീലിന്റെ പോരാളികളുടെ അംഗബലം കുറവായതുകൊണ്ടും വീട് പകുതി ബാക്കിയായി. 
അൽപ്പം ബുദ്ധിയുള്ളതും സാമൂഹിക ബോധമുള്ളതുമായ ദീനികളുണ്ടായതിനാൽ ആ പ്രവർത്തനം കത്താനവർ അനുവദിച്ചില്ല. എന്ന് മാത്രമല്ല ഉമേശന്‌ ജീവൻ കൈച്ചലാക്കി നാട് വിട്ട് പോകാനുള്ള സമയവുമുണ്ടായി. 
പുറം നാട്ടീന്നൊക്കെ ആള് വന്നത് അപ്പൊ ജലീലിന്റെ ഇറക്കുമതിയാണ്. വന്നതൊന്നും വെറുതേ വന്നവരല്ല. നാട് കത്തിക്കാനായി ഇറങ്ങിയ കാണ്ടാമൃഗ ജാതിക്കള് തന്നാരുന്നു. അതിലൊരുത്തനാണ് അന്ന് ഫ്ലവർമില്ലിന് തീയിട്ടതെന്ന് ക്യാമ്പിൽ പറയുന്നുണ്ടാരുന്നു. അതും കൂടെ ആയപ്പോൾ രണ്ടുപേരിൽ കൂടുതൽ ഒരുമിച്ചു റോഡിലേക്കിറങ്ങരുതെന്നുള്ള കർശന നിയമം അടുത്ത ദിവസം തൊട്ട് പോലീസ് പ്രഖ്യാപിച്ചു. ഇറങ്ങിയവരുടെ പിൻതുടകളിൽ ലാത്തി വീണു. 
പക്ഷെ വീടാക്രമണവും, മില്ല് കത്തിക്കലും കേസ് അഷ്‌റഫിന്റെ പേരിലാരുന്നു. അത് ഒത്തുതീർപ്പാക്കിയിട്ടുണ്ടാവണം. 
അന്ന് തന്നെ സജീവനും ചുണ്ടനും നാട്ടിലിറങ്ങിയെങ്കിലും പൊതുയിടത്തിൽ അധികം കൂടാറില്ല. ഒരു ഭീകരാന്തരീക്ഷം കുറച്ചുകാലം ഇവിടെ തളം കെട്ടിനിന്നിരുന്നു.

'അന്ന് ഉമേശനെവിടാ പോയെ?

'മംഗലാപുരം ' മൂളിപ്പാട്ട് പാടി വരുന്ന മോനിച്ചനാണ് അതിനുത്തരം കൊടുത്തത്. 'ഉം ..!' മോനിച്ചനെ കണ്ടതും മാള അടിമുടിയൊന്നു നോക്കി കനത്തിലൊന്ന് മൂളി.
'സ്റ്റേഷനിൽ നിന്നും ആദ്യം നീങ്ങുന്ന ട്രെയിനിൽ കയറി. മംഗലാപുരത്തേക്ക്.' ന്നാലും ഓന്റെ ഓക്ക് ന്ത് കേടിണ്ടായിട്ട കണ്ടൊന്റെ ..!' മാള - മോനിച്ചന് ഒരു പെഗ്ഗ് വച്ചുനീട്ടി. സാമ്പാറ് തൊട്ടുനക്കി മോനിച്ചനത് വലിച്ചു.

'പക്ഷെ അത് സ്വിച്ചിട്ട പോലെ നിന്നിനല്ല. രണ്ടൂസം കഴിഞ്ഞ ശേഷം ഫുൾ ഫോഴ്‌സിനെ ക്യാമ്പിലേക്ക് തിരിച്ചു വിളിച്ചാരുന്നു.'

'അത് അഷ്‌റഫിന്റെ കഴിവ്. ഖബറിടത്തു നിന്ന് തന്നെ അഷ്‌റഫ് പ്രഖ്യാപിച്ചു - ഓളുടെ മരണത്തിൽ ഓന് മാത്രമാണ് പങ്കെന്നും. അത് ഓന്റെയും കുടുംബത്തിന്റെയും മാത്രം നഷ്ടമായി ഉൾക്കൊള്ളുന്നെന്നും. ദീനികളാരും ഗുണ്ടകളുടെ കൂടെ ചേർന്ന് ദീനിനെ പറയിപ്പിക്കരുതെന്ന ശാസനയും നൽകി.'

'അല്ലേലും ഓൻ ഉശിരുള്ളോനാ'

'ന്നിട്ടാണ് ഓള് കണ്ടോന്റെ കൂടെ പോയത്.' ഷിജുവിന്റെ സംസാരം മാളയ്ക്ക് പിടിച്ചില്ല. പെഗ്ഗിന്റെ ബലവും കൂടെയായപ്പോ മാളയുടെ മട്ട് മാറി.

'അയിന് ഓളെന്ന ചെയ്തേ ന്ന് ആർക്കാ അറിയ. പോയോക്കല്ലേ അറിയൂ. 
നിന്റെ ഓള് പോന്നുണ്ടോ ന്ന് നിനക്കറിയാ?. ഇനിയിപ്പോ പോയാലെന്നാന്ന്. മനുഷ്യന്മാരല്ലേ ല്ലാം.' മാളയുടെ സംസാരത്തിൽ അമർഷം പൂണ്ട ഷിജു എഴുനേറ്റു. 
മോനിച്ചൻ സമാധാനപ്പെടുത്താൻ ശ്രമിച്ചെങ്കിലും, നിലത്തിരിക്കുന്ന മാളയുടെ നെഞ്ചത്തു നോക്കി ഒറ്റ ചവിട്ട്. കുപ്പിയും മാളയും നിലത്ത്.

മാള സർവ്വ സർവ്വശക്തനെപ്പോലെ എഴുനേറ്റു. 
ആദ്യമായി രണ്ടുപെഗ്ഗ്‌ കൂടുതലടിച്ചതാണ് ഷിജുവിന് പറ്റിയതെന്ന് പറഞ്ഞ് മാളയെ സമാധാനിപ്പിക്കാൻ മോനിച്ചൻ ശ്രമിച്ചെങ്കിലും പ്രതികാരം ചെയ്യാൻ തിരിഞ്ഞു നിന്നു, അപ്പോഴേക്കും ഷിജു വീട്ടിലെത്തി ഉമ്മറത്തെ കസേരയിൽ കയറിയിരുന്നിരുന്നു.

റബ്ബറിൽ നിന്നും ഷിജുവിന്റെ വീട്ടു മുറ്റത്തേക്ക് നടന്ന് മാള നടത്തുന്ന അസഭ്യ തെറി നിയന്ത്രിക്കാൻ മോനിച്ചൻ പാടുപെട്ടു. വായനശാലയിൽ വരുന്ന ഓരോരുത്തരും ഭാര്യയുടെ സാമ്പാറ് കണ്ടാണെന്നും ഷിജു ലിംഗഹീനനാണെന്ന് ഷിജുവിന്റെ ഭാര്യ മോനിച്ചനോട് പറഞ്ഞെന്നുമടക്കമുള്ള തരത്തിൽ അസഭ്യം ചൊരിഞ്ഞ് മാള മുറ്റത്ത് കാലുകളുറപ്പിച്ചു.

ദേഷ്യം കൊടുമ്പിരികൊണ്ട ഷിജു അകത്തേക്ക് ചെന്ന് രേഷ്മയുടെ മുടികുത്തിന് പിടിച്ചുവലിച്ച് ഇറയത്തേക്ക് കൊണ്ടുവന്നു. വാരിയെല്ലുനോക്കി ഒറ്റ ചവിട്ട്.
അതുകണ്ട് മാള കൈകൊട്ടി. മോനിച്ചൻ മാളയെ വിട്ട് കുട്ടമ്മൽ പുഴക്കരയിലേക്കിറങ്ങിപ്പോകുന്ന റോഡിലൂടെ കിതച്ചുകൊണ്ട് വേഗത്തിൽ നടന്നു.

24 ഏപ്രിൽ 2025


മോഹിനീ വധം

'ഇരുപത്തിനാലുകാരിയായ കോളേജ് വിദ്യാർത്ഥിയാണ് വെടിയേറ്റ് മരിച്ചിട്ടുള്ളത്, സഹോദരിയുടെ മരണത്തിൽ എന്ത് തോന്നുന്നു' ചാനലുകാരന്റെ മൈക്ക് വാതോരാതെ കരഞ്ഞുകൊണ്ടിരിക്കുന്ന സഹോദരിയുടെ അടുത്തേക്ക് നീട്ടി. വെടിയേറ്റുവീണ യുവതിയുടെ വീഡിയോ എക്സ്ക്‌ളൂസീവ് ടൈറ്റിലും ത്രില്ലർ സിനിമകളുടെ സ്കോറും ചേർത്ത് കാണിച്ചുകൊണ്ടിരിക്കുന്നു. കയ്യിലുള്ള കഞ്ഞി വറ്റ് വായിലേക്ക് വെക്കാതെ വിഷ്ണു തരിച്ചുനിന്നു.

'കൊലപാതകി കാമുകനോ? ' ഫ്ലാഷ്.

സോഫയിലിരുന്ന അച്ഛൻ ഭയന്നെഴുനേറ്റു, തരിച്ചിരിക്കുന്ന വിഷ്ണുവിനെ തട്ടി. ഇന്ന് രാവിലെ നടന്ന സംഭവമാണ്, തന്റെ മകനാവാൻ സാധ്യതയില്ലെന്ന് അയാൾക്കുറപ്പായിരുന്നു, കഴിഞ്ഞ ദിവസങ്ങളിലൊക്കെ റിസർച് കംപ്ലീറ്റ് ചെയ്യാനുള്ള മകന്റെ ആവേശം കണ്ടതാണ്. മോഹിനിയുമായി ഒരുബന്ധവും ഇല്ലാതിരുന്നിട്ട് ആറര മാസത്തിനു മുകളിലായി. എങ്കിലും കണ്ണീർ തട്ടിയ കവിൾ അച്ഛന് നേർക്ക് തിരിച്ചു. ചാനലിലെ ഭീകരമാവിധമുള്ള ശബ്ദം അവർക്കിടയിലേക്ക് പേമാരിപോലെ പെയ്തിറങ്ങി.

പോലീസ് ശബ്ദം മുറ്റത്തു തട്ടി, മന്ദതയിൽ വിഷ്ണു അവർക്കൊപ്പം ഇറങ്ങി. രാഘവൻ ഷർട്ട് തോളത്തിട്ട് സ്‌കൂട്ടർ റോഡിലേക്കിറക്കി, പോലീസ് ജീപ്പ് കണ്ണെത്താ ദൂരത്തെത്തിയിരുന്നു. ഫോണെടുത്തു; ആരെയൊക്കെയോ വിളിച്ചു. ഇന്നലെ അവൻ ആവശ്യത്തിലധികം കുടിച്ചിട്ടാണ് വന്നത്, രാവിലെ ചോദിക്കാമെന്ന് കരുതിയിരുന്നതാണ്. കാഴ്ച്ച കണ്ണിലെ ഒരിറ്റ് നനവോടെ ആവിയിൽ മൂടി. വിറയലോടെ എന്ത് ചെയ്യണമെന്നറിയാതെ സ്റ്റേഷനിലേക്ക് രാഘവൻ തന്റെ സ്‌കൂട്ടർ തുഴഞ്ഞു.

ചോദ്യം ചെയ്യാനുള്ള മുറിയിലേക്ക് കൊണ്ട് പോകെ വിഷ്ണു നിയന്ത്രണം വിട്ട് വാവിട്ടു കരയാൻ തുടങ്ങിയിരുന്നു, തനിക്ക് അത്രയേറെ പ്രിയപ്പെട്ടൊരാൾ ഇല്ലാതെയാത് മനസ്സുൾക്കൊള്ളാനുള്ള ദൂരം. പോലീസുകാരുടെ ആവർത്തിച്ചുള്ള ചോദ്യങ്ങൾ കേൾക്കാതെ വാവിട്ടു കരഞ്ഞുകൊണ്ടിരുന്നു.

'രണ്ട് വെടി, ഒന്ന് മുഖത്തും ഒന്ന് നെഞ്ചിനും. ജനലിലൂടെയാണ്. ലോക്കൽ മേഡ് തോക്കും.' സംഭവ സ്ഥലത്തുനിന്നും വിഷ്ണുവിന്റെ മുന്നിലേക്ക് വന്നടുക്കെ സി ഐ തലക്കിട്ടൊന്ന് കൊട്ടി. ഒരു നിമിഷത്തേക്ക് കണ്ണിലെ കാഴ്ച മങ്ങി.

'നിങ്ങൾക്ക് എവിടുന്നാടാ തോക്ക് ?' എസ്ഐയുടെ വക കൈമുട്ടുമടക്കി കുറച്ചെണ്ണം പുറത്തുകിട്ടി. 'വെടിയേറ്റ് മരിച്ചത് നിന്റെ കാമുകിയാണ്. വെച്ചവനെ നിനക്കറിയാം, നിന്റെ കൂട്ടുകാരനല്ലേ. 
തോക്കെവിടുന്നു കിട്ടി? എന്തിന് കൊന്നു? ഇതിനുള്ള ഉത്തരം പറഞ്ഞാൽ കൂടുതൽ ഇടി വാങ്ങാതെ റിമാൻഡിൽ പോവാം.' 
സ്വാഭാവിക മനോനില തകരാൻ മാത്രം ആരോഗ്യമേ അയാളുടെ മനസ്സിനുണ്ടായുള്ളു. അതിനിടയിലെ ബൂട്ടിട്ട കാലുകൊണ്ടുള്ള വളഞ്ഞിട്ടാക്രമണം അറിഞ്ഞതേയില്ല.

'വളപട്ടണം പുഴയുടെ തെക്ക് മാറി മുന്നൂറു മീറ്റർ അകലെയുള്ള അമൃത് നിവാസിൽ ഹരിഹരന്റെ രണ്ടാമത്തെ മകൾ മോഹിനിയെ പ്രണയ നൈരാശ്യ കാരണം വെടിയുതിർത്തു കൊല്ലാൻ രാത്രി മദ്യപിക്കെ രാഘവൻ മകൻ വിഷ്ണുവും, സനത്കുമാർ മകൻ ഉമേഷും ഗൂഡാലോചന നടത്തുകയും, മദ്യപിച്ചതിനു ശേഷം ഉമേഷ് മോഹിനിയെ വീട്ടിലെത്തി രണ്ടു തവണ വെടിയുതിർത്ത് തിരിച്ചുപോവുകയും ..' സ്റ്റേഷൻ റൈറ്റർ എഫ് ഐ ആർ ഡ്രാഫ്റ്റ് വായിക്കുന്നതിനിടെ വിഷ്ണു ബോധത്തിലേക്ക് തിരിച്ചുവന്നു. പരിചിതമായ രൂപം റൈറ്ററുടെ പിന്നിൽ നിൽക്കുന്നത് കണ്ടു.

പൊടുന്നനെ സ്റ്റേഷൻ മൂകമാകും വിധം അയാൾ പൊട്ടിക്കരഞ്ഞു.  കാതിലെത്തിയ മകന്റെ അലർച്ച പോലീസുകാരുടെ മുന്നിൽ മകന്റെ നിരപരാധിത്വം തെളിയിക്കാൻ ശ്രമിക്കുന്ന രാഘവനെ മുന്നോട്ട് നീങ്ങാൻ കഴിയാത്തവിധം തറയിലിരുത്തി.. സ്റ്റേഷൻ പരിസരം മുഴുവൻ ആ അലർച്ചയ്ക്ക് ശേഷം നിശബ്ദമായി.

-

തന്റെ ചുണ്ടിൽ നിന്നും അനുവാദം കൂടാതെ സിഗററ്റെടുത്തു പോകുന്ന  ഉമേഷിന്റെ മുഖം മനസ്സിൽ തെളിഞ്ഞു. റിസർച്ചിനുള്ളവർക്കുള്ള ഹോസ്റ്റൽ മുറി തികയാതെ, യൂണിവേഴ്‌സിറ്റിക്ക് പുറത്തുള്ള പ്രൈവറ്റ് ഹോസ്റ്റൽ. മുറി വാടക ചുരുക്കാൻ നാലുപേരുള്ള മുറിയിലേക്ക് അഞ്ചാമനായി വന്ന പിജി ക്കു പഠിക്കുന്ന ഉമേഷ്.

ആൾക്കൂട്ടമില്ലാത്ത  ഒരവധി ദിവസം ചുണ്ടിൽ കത്തിച്ച സിഗററ്റെടുത്തുമാറ്റി ഉമേഷ് തന്റെ ചുണ്ടിനുമേൽ ചുണ്ടമർത്തി. 
ആദ്യമായി പുരുഷനോട് തോന്നിയ രതി. ബൈ സെക്ഷുവൽ ആണെന്ന തിരിച്ചറിവും, അത് പ്രകൃതിയാണെന്ന ബോധവും - തനിക്ക് ചുറ്റും പ്രകൃതിക്കെതിരെ നിയമങ്ങൾ തീർക്കുന്ന യൂണിവേഴ്‌സിറ്റിയിലെ മുനിമാർക്കെതിരെയുള്ള പ്രതിഷേധമെന്ന തോന്നലിൽ പ്രണയമില്ലാതെയുണ്ടാവുന്ന സുരതത്തിനോട് വേണ്ടെന്ന് പറയാൻ തോന്നിയില്ല. 
വ്യക്തമായ പുരുഷ സ്വവർഗാനുരാഗം. നഗ്നമായ അവന്റെ ശരീരവും ചുണ്ടുകളും ഞാനറിയുമ്പോൾ മോഹിനിയോടുള്ള പ്രണയത്തിന് വേര് മുളച്ചിരുന്നില്ല.

മോഹിനിയന്ന് പിജി വിദ്യാർത്ഥി. പോകെ പോകെ മോഹിനിയെ കാണാതിരിക്കാൻ പറ്റില്ലെന്നായി. എന്റെ ചേഷ്ടകൾ പൈങ്കിളി കൗമാരക്കാരന്റേതെന്ന് പറഞ്ഞു കളിയാക്കിയെങ്കിലും എങ്ങനെയാണ് ഉമേഷ് അവളെ പറഞ്ഞു ഫലിപ്പിച്ചതെന്ന് എനിക്കറിയില്ല. വലിയൊരു അപായസൂചനാ പ്രസംഗം നടത്തി, എന്റെ പ്രണയത്തിന്റെ ഒരംശം പോലും പാഴാക്കാതെ പ്രണയിക്കണമെന്നു പറഞ്ഞാണ്  ആദ്യത്തെ ഡേറ്റിങ്ങിന് ഇറങ്ങാൻ വണ്ടിയുടെ ചാവി തന്നത്. അയാൾ മോഹിനിയെ വെടിവച്ചു കൊന്നെന്ന് ചിരിച്ചുകൊണ്ട് സ്റ്റേഷൻ റൈറ്റർ വായിക്കുന്നു. മരീചിക പോലെന്തോ ഒന്ന്.

രണ്ടോ മൂന്നോ തവണ ഉമേഷുമായി സുരതത്തിൽ ഏർപ്പെട്ടുകാണും. മോഹിനി പ്രണയം തുറന്നുപറഞ്ഞതിനു ശേഷമില്ല. ഉമേഷിൽ നിന്നും അത്തരത്തിലുള്ള ഭാവ വ്യത്യാസം പിന്നീട് ഉണ്ടായിട്ടുമില്ല. പക്ഷെ മോഹിനിയോടൊപ്പം അല്ലാത്ത ഏതു സമയവും ഉമേഷ് എനിക്ക് ചുറ്റിലുമുണ്ടായിരുന്നു.

ക്യാന്റീനിൽ മോഹിനിയോടൊപ്പം ചിലവഴിച്ച സമയങ്ങളിലൊക്കെ, അവളുടെ സ്പർശവും, കണ്ണേറും, തലോടലും അനുഭവിച്ചു ഹോസ്റ്റൽ മുറിയിലേക്ക് നടന്നുവരുമ്പോഴൊക്കെ എന്റെ സ്പർശം അതിനുശേഷവും ഉമേഷിന് ഇതുപോലെയാണോ അനുഭവിക്കുന്നുണ്ടാവുക എന്ന തോന്നൽ എന്നെ വേട്ടയാടിയിട്ടുണ്ടായിരുന്നു. അന്നൊരുനാൾ സമയം നോക്കി ചോദിക്കുകയും ചെയ്തു.

'ഉമേഷ്, നീ ഓക്കെ അല്ലെ? ഞാൻ മോഹിനിയുമായി അത്രയേറെ ബോണ്ടിലാണ്. നീ അത് മനസ്സിലാക്കുമെന്ന് പ്രതീക്ഷിക്കട്ടെ'

'നീ എപ്പോഴും സന്തോഷമായിരുന്നാൽ മതി, അതുമതി' 
അത്രയും പറഞ്ഞ് അയാൾ നടന്നുപോകുമ്പോൾ വരാൻ വൈകിയതിൽ പരിഭവം കാണിച്ചു നടന്നുപോയ മോഹിനിയുടെ അതേ ശരീര ഭാഷയാണോ എന്ന് സംശയം തോന്നി.
പിന്നീട് ഉമേഷിനെ കണ്ടിട്ടില്ല. പാതിവഴിയിൽ പിജി പഠനം അയാൾ വിട്ടുപോയതറിഞ്ഞു. അയാൾ എങ്ങോട്ട് പോയെന്നോ എവിടേക്ക് പോയെന്നോ വാട്സാപ്പിൽ ഒരു മെസേജ് പോലും അയച്ചു ചോദിച്ചില്ല.
'ആ പയ്യനെ ഇറക്കിവിടടോ' നിലത്തിരുന്ന് ദയയോടെ എസ്ഐ യുടെ റൂമിലേക്ക് നോക്കുന്ന രാഘവന്റെ മുന്നിലേക്ക് തലചെരിച്ചു പറഞ്ഞു.
'അവൾക്ക് മൂന്നു കാമുകന്മാരുണ്ട്, പോരാത്തതിന് അന്ന് രാത്രി നിന്റെ മോനും വന്ന് പോയതിനു തൊട്ട് ശേഷം നടന്നതാണ് ഇത്.' എസ്ഐ യുടെ മുഖത്ത് തറപ്പിച്ചു നോക്കി.
'എല്ലാത്തിനെയും വിളിച്ചിട്ടുണ്ട്. അല്ലേൽ എന്തിനാണ് കൊന്നതെന്ന് ഇവൻ പറയണം. ഗൂഡാലോചന നടത്തിയതിനാണേൽ തെളിവും ഇല്ല. നമ്മൾ പെടും. കുത്തിച്ചികളൊക്കെ തീരട്ടെ.'  ഉമേഷിന്റെ മുഖത്ത് കൈവീശി ഒന്നടിച്ചു.
ഇന്നലെ പരിചിതമല്ലാത്ത ഒരു നമ്പറിൽ നിന്നും കോൾ. അലോഹ്യത്തിന്റെ അലോസരമൊന്നുമില്ലാത്ത പരിചിത ശബ്ദം. 
' ഡാ, ഞാൻ ഉമേഷാണെ, ഇന്നൊന്ന് ഇരുന്നാലോ?' 
വേണ്ടെന്ന് പറയാൻ തോന്നിയില്ല. ഒമ്പതരയോടടുക്കെ ടൗണിലെ കൈരളി ബാറിലേക്ക് ചെന്നു. കൂടെ വന്നവനെ തന്നെ മദ്യലഹരിയിൽ കുത്തുകയും ആശുപത്രിയിലേക്ക് കൊണ്ടുപോവുകയും ചെയ്യുന്ന രണ്ടു മധ്യവയസ്കരുടെ കോപ്രായങ്ങൾ. രണ്ടു പെഗ് തീരുന്നതുവരെ അതുതന്നെയായിരുന്നു ചർച്ചാ വിഷയവും.

പ്രണയമെന്നു തോന്നിപ്പിച്ചു കടന്നുകളയുമ്പോഴുണ്ടാകുന്ന വേദന പലപ്പോഴും ഒരുതരം അരക്ഷിതത്വത്തിലേക്ക് തള്ളിവിടും, അവനവനെ ഒരു ചാക്കുനൂലിന്റെ വിലപോലും ഇല്ലെന്നുള്ള തോന്നലുകളിൽ അതങ്ങനെ കുടുങ്ങിക്കിടക്കും. കാലം ഉരുണ്ടുരുണ്ട് പോകുമ്പോൾ ഇതുപോലുള്ള നുറുങ്ങുകൾ പഠിക്കും, കാര്യമൊന്നുമില്ലെങ്കിലും.

ഉമേഷിനുണ്ടായിരുന്നേക്കാവുന്ന വേദന, ഭസ്മാസുരനെപ്പോലൊരുത്തൻ അവളുടെ സുഹൃത്തായി എന്നും കൂടെവരികയും അതിർവരമ്പുകളിലാതെ ഞങ്ങളുടെ പ്രണയത്തിനകത്തെ ഓരോ സ്വകാര്യതയിലും അഭിപ്രായം പറയുമ്പോൾ ഞാൻ അനുഭവിച്ചതിനു തുല്ല്യമായിരിക്കുമോ എന്നും  സംശയിച്ചു പോയിട്ടുണ്ട്.

ഒരിക്കൽ, 'വിഷ്ണു മോഹിനിയെ ഉമ്മവച്ചുകഴിഞ്ഞാൽ തുപ്പല് തുടക്കാൻ അവളൊരു ടവൽ അധികം കരുതാറുണ്ട്' എന്ന് പറഞ്ഞുള്ള ഭസ്മാസുരന്റെ തമാശ ആസ്വദിച്ചു ചിരിക്കുമ്പോൾ എനിക്കവളോട് സഹതാപം തോന്നി. അന്ന് ഭസ്മാസുരനെപ്പോലെ ആരോഗ്യമുള്ള മനുഷ്യനുമായി ഉമേഷ് കയ്യാങ്കളിയായത് ഹോസ്റ്റലിൽ ചർച്ചചെയ്യുന്നത് കേട്ടപ്പോഴാണ് അറിഞ്ഞത്. അത് എനിക്കും മോഹിനിക്കിടയിലുമുള്ള അകലത്തിന്റെ ആഴം മനസ്സിലാക്കാൻ ഉപകാരപ്പെട്ടുവെന്നത് സത്യം.
പിന്നീട് പലപ്പോഴായി മോഹിനിയോട് മാത്രം ഞാൻ തുറന്നു പറഞ്ഞ പലതും അയാൾ ലവലേശം മര്യാദയില്ലാതെ സഭയിലേക്ക് തമാശയായി വിളമ്പി. അതെന്നെ പ്രണയത്തിന്റെ അരക്ഷിതാവസ്ഥയിലേക്ക് കൂപ്പു കുത്തിച്ചു. 
എനിക്ക് പിൻവലിയണമെന്ന് തോന്നി. പക്ഷെ അതത്ര എളുപ്പമായിരുന്നില്ല.

അതിനുശേഷം മോഹിനി എനിക്ക് അതിർവരമ്പുകൾ തീർക്കാൻ തുടങ്ങുന്നത് ഞാനറിയുന്നുണ്ടായിരുന്നു. സമയക്രമങ്ങൾ, പാടുള്ളതും പാടില്ലാത്തതും.  രണ്ടുപേർ തമ്മിലുള്ള ബന്ധത്തിൽ ഒരാൾ മറ്റൊരാൾക്ക് മാത്രം അതിർത്തി നിശ്ചയിക്കുകയും ഒരാൾക്ക് ചോദ്യം ചോദിക്കാൻ പറ്റാതിരിക്കുകയും ദാസ്യവർത്തിത്വമാണ് എന്ന പ്രായോഗികമായ ധാരണ ഉണ്ടെങ്കിൽ പോലും പ്രണയത്തിലകപ്പെട്ടൊരാൾക്ക് പിൻവലിയുകയെന്നത് എളുപ്പമല്ല.
ബന്ധങ്ങൾ പലപ്പോഴും സ്നേഹവും, ദാസ്യവും, ഉദാസീനതയും കൂടുമ്പോൾ ഉണ്ടാവുന്നതാണ്. അതിൽ ദാസ്യവർത്തിത്വം മാത്രം ബാക്കിയാവുന്നത് ഒരാൾക്ക് മറ്റൊരാൾ നഷ്ടപ്പെടുമ്പോഴുണ്ടാകുന്ന താത്ക്കാലിക വേദന അനുഭവിക്കാനുള്ള പേടികൊണ്ടാണെന്ന് കരഞ്ഞിരിക്കുമ്പോൾ ഉമേഷ് ഉപദേശിച്ചു. യൂണിവേഴ്‌സിറ്റിയിൽ മുനിമാർക്കെതിരെ വിളിച്ച മുദ്രാവാക്യങ്ങളുടെ സത്ത മറന്നുപോകുന്നൊരു സ്വത്വം എന്നിലേക്ക് കടന്നുവന്നു.

എനിക്ക് പേടിയായിരുന്നു, മോഹിനിയില്ലാതെയുള്ള ജീവിതാവസ്ഥയെപ്പറ്റി എനിക്ക് ചിന്തിക്കാൻ കഴിഞ്ഞിരുന്നില്ല. അതെന്നെ കൂടുതൽ അടിമത്വത്തിലേക്ക് നയിച്ചു. യൂണിവേഴ്‌സിറ്റിയുടെ പുതിയ പരിസരം പ്രണയത്തിൽ നിന്നും അകന്ന് - ശാരീരികാനുഗ്രഹം കൂടെയുണ്ടാകുന്ന സൗഹൃദ വലയത്തിലേക്ക് അവൾ ചേക്കേറിയിരുന്നു. അതിലെനിക്ക് ലവലേശം പരാതിയുണ്ടായിരുന്നില്ല. എന്നോട് ഇത്തിരി ദാക്ഷണ്യം കാണിക്കണമേയെന്നു മാത്രമായിരുന്നു എന്റെ അപേക്ഷ.
അതുണ്ടായില്ലെന്നു മാത്രമല്ല. വാശിയും, ആധിപത്യവും കാണിക്കാൻ മോഹിനി എപ്പോഴും പ്രണയത്തിന്റെ പേര് പറഞ് എന്നെ കൂടെ കൂട്ടുകയും ചെയ്തു.

എന്റെ മൂകമായ ചലനങ്ങളിൽ ഉമേഷ് സങ്കടപ്പെടുന്നത് ഞാനറിയുന്നുണ്ടായിരുന്നു. 
എന്റെ തുണിക്കളലക്കുന്നതും റിസർച് പാതിവഴിക്കിട്ടുപോകാതെ തടഞ്ഞു നിർത്തിയതുപോലും അവനാണ്. പക്ഷെ ഞങ്ങൾ തമ്മിൽ കൂടുതൽ സംസാരങ്ങളൊന്നും ഉണ്ടായില്ല. സ്പർശം ലവലേശമില്ലാതെ അയാൾ എന്നോടൊപ്പം ഉരുകിത്തീരുന്നത് ഞാൻ കണ്ടുകൊണ്ടേയിരുന്നു. അതെന്തിനായിരുന്നെന്ന് ആലോചിക്കാൻ പോലും വെറുത്തുപോയത്ര ചീഞ്ഞ കാലയളവായിരുന്നത്.

താൽക്കാലികമായി മറ്റേതെങ്കിലും ഹോസ്റ്റൽ മുറിയിലേക്ക് മാറി താമസിക്കാൻ നിർബന്ധിച്ചു. അവിടങ്ങളിലെ വിരഹമനുഭവിക്കുന്ന പുരുഷന്മാരുടെ നനഞ്ഞ കണ്ണുകളിലേക്ക് നോക്കുമ്പോഴേ കരച്ചില് വരും. പുരുഷനും സ്ത്രീയ്ക്കും പ്രണയവും കാമവും അനുഭവിക്കാതെ ധീർകകാല സൗഹൃദം സാധ്യമാകുമോ എന്നതിൽ ഓരോ മുറിയിലും ചേരിതിരിഞ്ഞുള്ള ചർച്ചകൾ അപ്പോഴൊക്കെ വീക്ഷിച്ചു. ഭസ്മാസുരന്മാർ അവർക്കിടയിലും ഉണ്ടായതുകൊണ്ടാവണം. ചിലർ യൂണിവേഴ്‌സിറ്റിക്ക് അകത്തുന്നു തന്നെ വെള്ളപ്പൊടികൾ ഉപയോഗിച്ച് മെലിഞ്ഞുണങ്ങി തീരുന്നത് കണ്ടപ്പോൾ പ്രായോഗികമായ തീരുമാനം എടുക്കണമെന്ന് തോന്നി തുടങ്ങിയിരുന്നു.
കാണുമ്പോഴൊക്കെ എന്റെ ഹാപ്പിനെസ്സ് മീറ്റർ ഉമേഷ് അളക്കും, റിസർച്ചിനെ കുറിച്ച് ചോദിക്കും. ചോദിക്കാതെ സഹായവുമായിവരും. ലൈബ്രറിയിൽ, ഹോസ്റ്റലിൽ, വീട്ടിൽ.

'ഉമേഷ്, എന്റെകയ്യിൽ നിന്നും ശെരിക്കും എന്താണ് പ്രതീക്ഷിക്കുന്നത്. അന്നങ്ങനെ പറ്റിപ്പോയതാണ്. അത് മറക്കണം.' എന്റെ സന്തോഷമാണ് ഉമേഷിന്റെ നിലനിൽപ്പെന്ന് തോന്നും വിധം അയാളെനിക്ക് ഭാരമാവാൻ തുടങ്ങിയപ്പോൾ ഞാൻ ചോദിച്ചു.

'നീ സന്തോഷമായിരുന്നാൽ മാത്രം മതി, അതുമാത്രം മതി' മറ്റൊന്നും പറയാതെ അയാൾ തോളത്തു തട്ടി പിന്നിലേക്ക് നടന്നു. വീണ്ടും കാണാമെന്നു പറഞ്ഞു മോഹിനി നടന്നകലുന്നതുപോലെ. എങ്കിലും എത്ര ലാഘവത്തോടെയാണ് പറ്റിപ്പോയതെന്ന് ഞാൻ പറഞ്ഞു മുഴുവിപ്പിച്ചത്.

മോഹിനി വീണ്ടും വന്നു. ഞങ്ങൾ മാത്രമുള്ള ജീവിതത്തിലേക്ക് പോകാമെന്നും മറ്റുള്ളതൊക്കെ സരസമായ താത്ക്കാലിക ഉന്മാദങ്ങളാണെന്നും പറഞ്ഞു വിശ്വസിപ്പിച്ചു. മോഹിനിയുടെ മൃദുലമായ വിരലുകൾ എന്റെ മുടിയിഴകളിൽ വീണ്ടും മേഞ്ഞു നടക്കുന്നത് ഞാനറിഞ്ഞു. ഉമേഷിനെ പ്രസന്നതയോടെ അവിടെയെവിയൊക്കെയോ കാണാൻ തുടങ്ങി.
റിസർച്ചിന് ലൈബ്രറികളിൽ അവളെനിക്ക് കൂട്ടിരുന്നു. ഭസ്മാസുരന്മാരുടെ സാമീപ്യം മെസേജുകളിൽ ഒതുങ്ങിത്തീരുന്നത് എന്നിൽ പ്രത്യാശ പരത്തി. ഉമേഷിനുള്ളൊരിടം നൽകാതെ ഞാൻ പൂർണ്ണമായും ആ മായയിൽ അകപ്പെട്ടിരുന്നു.
മീഥെയിനിലേക്ക് പോകാതെ എന്നെ ഞാൻ പ്രണയത്തിലേക്ക് തളച്ചിട്ടതിൽ ഉമേഷ് വാട്സാപ്പിൽ അഭിനന്ദിച്ചത് ഞാനോർക്കുന്നു.

-

റൈറ്റർ വായിച്ച എഫ്ഐആർ ന്റെ ഡ്രാഫ്റ്റ് ഉള്ളടക്കത്തിനു പകരം കഴിഞ്ഞ രണ്ടുവർഷത്തെ ഭൂതകാലത്തിലെ ഉള്ളടക്കം വിഷ്ണു കഥപോലെ ഓർത്തെടുത്തു.

അതേ ഉമേഷ് തന്നെയാണ് മുന്നിൽ നിൽക്കുന്നതെന്ന് വിശ്വസിക്കാൻ കഴിഞ്ഞില്ല. എസ്ഐ  എഴുനേറ്റ് അരകുലുക്കി പാന്റ് വലിച്ചുകേറ്റി ഉമേഷിനോട് കുനിഞ്ഞു നിൽക്കാൻ പറഞ്ഞു.

'നിനക്കൊക്കെ പൊടിയടിക്കുമ്പോൾ കഴപ്പ് അല്ലെടാ. അത് ഞാൻ മാറ്റിത്തരാടാ!'  അടിയുടെ ആവേശം കൂടെ എസ്ഐ കിതച്ചുകൊണ്ട് പറഞ്ഞു.
വാതിൽപ്പടിയിലൂടെ എസ്ഐ വിഷ്ണുവിനെ തുറിച്ചുനോക്കി, അടുത്തേക്ക് ആക്രോശത്തോടെ ചെന്ന് ലാത്തികൊണ്ട് ചുറ്റിലും വീശി. തലയ്ക്ക് കൊള്ളാതിരിക്കാൻ കൈകൊണ്ട് മറച്ചുപിടിച്ചു.

പുറത്തുപോയ സി ഐ മറ്റന്വേഷണ ഉദ്യോഗസ്ഥരോടൊപ്പം സ്റ്റേഷനിലേക്ക് വന്നു.

ഉമേഷ് തലയുയർത്തിയില്ല.
സിഐ ഭാഷ്യം വിഷ്ണുവിന് അറപ്പുളവാക്കി.
രാഘവൻ വിഷ്ണുവിനെ പുറത്തേക്ക് വിളിച്ചു. നടക്കാൻ അൽപ്പം ബുദ്ധിമുട്ടുണ്ട്. ഉമേഷിനെ നോക്കി. ഉമേഷ് കുനിഞ്ഞുതന്നെ നിൽക്കുന്നു. ഭയന്നുകൊണ്ടുള്ള നിൽപ്പല്ലത്. സ്റ്റേഷനിൽ നിന്നും പുറത്തേക്കിറങ്ങേ വിഷ്ണു അതുറപ്പിച്ചു.


'നീ അങ്ങ് മാറിയല്ലോടാ, വേറെയാരെയോ പോലെ' മറുപടി കൊടുക്കാതെ കേൾവിക്കാരനായി മാത്രം ഇരുന്നതുകൊണ്ടാവണം. 
'മാറ്റം നല്ലതല്ലേ' മുഷിപ്പിക്കേണ്ട എന്ന് കരുതി പറഞ്ഞതാണ്. 
'നീ എപ്പോഴും സന്തോഷത്തോടെയിരിക്കുന്നത് എനിക്ക് കണ്ടാൽ മതി' നിശ്ശബ്ദത ബാധ്യതയായപ്പോൾ എഴുനേറ്റ് കൗണ്ടറിൽ ചെന്ന് ബില്ല് കൊടുത്ത് നേരെ പുറത്തേക്കിറങ്ങിപ്പോവുന്ന ഉമേഷിനെ തിരിച്ചുവിളിക്കാതെ നടന്നകലുന്നത് നോക്കിയിരുന്നു. ശേഷം രണ്ടു പെഗ് കൂടി ഓർഡർ ചെയ്തു. 
പതിമൂന്ന് മാസം, ദിവസങ്ങൾക്കൊക്കെ ഇത്രയേ വിലയുള്ളുവെന്ന് തോന്നിപ്പോയി.

അയാൾ എവിടുന്ന് വന്നു, എവിടേക്ക് പോകുന്നു ഒന്നും ചോദിച്ചില്ല. ചോദിക്കാമായിരുന്നെന്ന് പിന്നീട് തോന്നി.
അയാളെൻറെ സുഹൃത്താണോ അയാൾക്ക് ഇപ്പോഴും എന്നിൽ പ്രണയത്തിന്റെ ചക്രങ്ങൾ ബാക്കിയുണ്ടോ എന്നൊന്നും ആലോചിച്ചിരുന്നില്ല. 
ഞാനും മോഹിനിയും പ്രണയിച്ചു. അമൃതുപാനം ചെയ്തപോലെ അത് ഞങ്ങളെ ഓജസ്സുള്ളവരാക്കി. എന്നിട്ട് എന്തുണ്ടായി? 
രണ്ടുമനസ്സുകൾ എത്ര കടഞ്ഞുകൊണ്ടിരുന്നാലും അതിലെ പ്രണയം വറ്റുക തന്നെ ചെയ്യുമെന്ന് എനിക്കന്ന് ബോധ്യപ്പെട്ടതാണ്.
പ്രണയത്തിൽ സ്വാഭാവികമായ ഒന്ന്.! പ്രണയിപ്പിക്കപ്പെട്ടവരുടെ ഓർമ്മകളിൽ മാത്രം നിൽക്കുകയും,  അവരുടെ സാമീപ്യം ഒരു മായ മാത്രമെന്ന തോന്നലുമുണ്ടാവണം.

തിരിച്ചുകിട്ടില്ലെന്നറിഞ്ഞിട്ടും പ്രണയിക്കുന്ന മനുഷ്യർക്ക് ചിലപ്പോൾ അങ്ങനെയൊരു ധാരണയേ ഉണ്ടായിക്കൊള്ളണമെന്നില്ല. അവർ പ്രണയിക്കുന്നവരുടെ സുഖവും സന്തോഷവും കണ്ട് രമിക്കുന്നു. അതിൽ അവരുടെ ജീവൻ തന്നെ നിലനിർത്തുന്നു. അമരത്വമില്ലാത്ത മനുഷ്യനെപോലെ അവർ പെരുമാറുന്നുണ്ടെന്ന് തോന്നി.

മുടന്തി വീട്ടിലേക്ക് കയറേ രാഘവൻ വിഷ്ണുവിനോട് ചോദിച്ചു 
ഉമേഷ് എന്തിനത് ചെയ്തു? ഉമേഷ് തന്നാണോ ചെയ്തത്.?

20 ഏപ്രിൽ 2025


ലവ് ലെറ്റേഴ്സ് വിൽ നെവർ ഗോ ഔട്ട് ഓഫ് ഫാഷൻ

പ്രിയപ്പെട്ട കാമുകി, 

ദി ഹിന്ദുവിന്റെ 'ലവ് ലെറ്റേഴ്സ് വിൽ നെവർ ഗോ ഔട്ട് ഓഫ് ഫാഷൻ' പരസ്യം കണ്ടപ്പോൾ വീണ്ടും എഴുതണമെന്ന് തോന്നി. എത്രകാലമായി എഴുതിയിട്ട്. സലീൽ ചൗധരിയുടെ ചില പാട്ടുകൾ കേൾക്കുമ്പോഴൊക്കെ എഴുതണമെന്ന് തോന്നും. അപ്പോൾ വലിക്കാൻ തോന്നും. 

സിഗരറ്റുവലിക്കാതെ റൊമാന്റിക്കാവാൻ കഴിയാത്തൊരു മനുഷ്യനാണ് ഞാൻ. 
വലിച്ചുകഴിഞ്ഞാൽ എഴുത് വേണ്ടെന്ന് വയ്ക്കും. 
ഇതിപ്പോ കുറച്ചായല്ലോ. !

ചിലപ്പോൾ തോന്നും അകലങ്ങളിലാണ് പ്രണയത്തിന് ഭംഗിയെന്ന്. 
ചിലപ്പോൾ പൊട്ടിക്കരച്ചലുകളിൽ, ഒച്ചപ്പാടുകളിൽ, തേങ്ങലുകളിൽ. 
ചില നേരത്ത് സൗമ്യമായ ഭാഷണങ്ങളിൽ, പങ്കുവയ്ക്കലുകളിൽ. 
ചിലപ്പോഴത് കാമാതുരമായ ചുംബനങ്ങളിൽ. ചേരലുകളിൽ. 
എവിടെയോ കൊതിക്കുന്ന ചേർത്തു നിർത്തലുകളിൽ. 

എനിക്കതറിയുന്നുണ്ട്. കൈ ചേർത്തുപിടിച്ചു നടക്കുന്ന വഴിവക്കിൽ, യാത്രകളുടെ അവസാനങ്ങളിലെ കെട്ടിപ്പിടിത്തിൽ. 
അരക്കെട്ട് ചേർത്തു പിടിച്ചിരുന്ന കടൽക്കരകളിൽ. 

ഇങ്ങനെയൊക്കെ നമുക്ക് നേരിട്ട് സംസാരിക്കാൻ കഴിയാത്തതെന്താണ്? 
പാതിമുറിഞ്ഞ വാക്കുകൾ എത്രെയോ നിനക്കുപിന്നിൽ വീണുപോയിരിക്കുന്നു. ചിലപ്പോഴൊക്കെ പിന്നിൽ ചുംബനങ്ങളായി മാറിയിരിക്കുന്നു. 
അതുകൊണ്ട് തന്നെയാവണം 'ഇറ്റ് വിൽ നെവർ ഗോ ഔട്ട് ഓഫ് ഫാഷൻ' ആവുന്നത്. 
അപ്പോഴും നിനക്കുവേണ്ടി നല്ലൊരു പ്രണയലേഖനം പോലും എഴുതാൻ കഴിയുന്നില്ലല്ലോ. പ്രണയാതുരമായ വാക്കുകളിത്തിരി കുറഞ്ഞാലും, വലതുകമ്മ്യുണിസ്റ്റുകാർക്കിടയിലകപ്പെട്ട നക്സലേറ്റിനെപോലെ പുകമണമില്ലാത്ത ഇത്തരം കത്തുകൾ നമുക്കിടയിൽ മഷിപുരളട്ടെ. 

എന്ന്, 
കാമുകൻ.

ഉൾക്കടൽ




സീൻ 1  

ഷോട്ട് 1 - Wide Angle (Pan)
ഇരുട്ടിൽ നിന്നും ചുവന്ന ഇരുണ്ട വെളിച്ചത്തിലേക്ക് വാതിൽ തുറന്നു.

പുറത്തുനിന്നും പാകമായൊരു സ്ത്രീ അകത്തേക്ക് കയറിവരുന്നു.
മങ്ങിയ വെളിച്ചത്തിൽ വാതിൽ തുറന്നുകൊണ്ട് മുറിയുടെ അകത്തേക്ക് അവൾ കടന്നുവന്നു.

അവൾ - കടൽ!
ഫ്രസ്‌ട്രേഷനിൽ അകപ്പെട്ടുപോയവൾ. തനിക്ക് ചുറ്റും സംഭവിക്കുന്ന എല്ലാ കാര്യങ്ങളിലും അവൾ ഫ്രസ്‌ട്രേഷനനുഭവിക്കുകയാണ്. കടലിന്റെ; ഉൾക്കടലിന്റെ അടിയൊഴുക്കുപോലെ.
നിരാശയുടെ മുഖഭാവം മാത്രം പേറിക്കൊണ്ട് ഓരോ ദിവസവും തിരക്കുള്ള നഗരത്തെ തന്റെ തന്നെ കണ്ണുകളിലൂടെ ഏച്ചുകെട്ടി നിരാശയുടെ ആഴത്തിലേക്ക്; ഇരുട്ടിലേക്ക് വീണുകൊണ്ടിരിക്കുന്നവൾ.

ഷോട്ട് 2 - Master Shot
ബാഗ് വാതിലിനരികിലുള്ള മേശയുടെ മുകളിൽ വച്ച് അകത്തേക്ക് കടന്നുവന്ന അതേ നിൽപ്പിൽ.
തന്നെ അവസാനമായി ഇറിറ്റേറ് ചെയ്ത നിമിഷം ഓർത്തെടുക്കുന്നതുപോലെ അവൾ കണ്ണുകളടയ്ക്കുന്നു.
(തിരയുടെ ശബ്ദം താഴ്ന്ന ശബ്ദം - മേശമുകളിൽ ബാർത്തിന്റെയും മറ്റു ചിന്തകളുയർത്തുന്ന പുസ്തകങ്ങളും മറ്റും. - കറുത്ത മേശവിരിയും, കാർട്ടനുകളും വ്യക്തം.)

ഷോട്ട് 3 - CloseUp
(ചിന്തകൾ കൊണ്ട് കണ്ണുകളടക്കുന്ന മുഖത്തേക്ക് ക്യാമറ അടുക്കുന്നു.)
ചുവന്ന ഇരുണ്ട വെളിച്ചത്തിൽ പാതിയെന്നോളം അവളുടെ മുഖം കാണുന്നു.

ഷോട്ട് 4 - Medium Track
നിശബ്ദതയിൽ വാർദ്ധക്യം നിറഞ്ഞ സെക്യൂരിറ്റി ഗൗരവത്തോടെ തന്നെ നോക്കുന്നു.
(മതാചാരങ്ങൾ നിറഞ്ഞ അദ്ദേഹത്തിന്റെ ചേഷ്ടകൾ വ്യക്തം. - പിന്നിൽ വാഹനത്തിന്റെ ഇറിറ്റേറ്റ് ചെയുന്ന ശബ്ദം.)

(സെക്യൂരിറ്റിയുടെ മുഖം ദൂരേക്ക് മറഞ്ഞുകൊണ്ട് ഇരുട്ട് പകരുന്നു.)

ഷോട്ട് 5 - Medium Shot
(മുഖത്ത് വെള്ളം തെറിക്കുന്നു - തിരകളുടെ ശബ്ദം ചുറ്റും മുഴങ്ങുന്നു. ചുവപ്പും, ചുവപ്പും, നീലയും വർണ്ണങ്ങളുള്ള തുണികൾ കണ്ണാടിക്കു സമീപം. വിരിയാത്ത ചുവന്ന പൂക്കളുടെ മൊട്ടുകളും.)
മുറിയിലെ ഇരുട്ടിനെ മാറ്റിനിർത്തികൊണ്ട് അവൾ കണ്ണാടിയിലേക്ക് ഉയരുന്നു. വെളിച്ചത്തിൽ അവളുടെ മുഖം കാണുന്നു.
ദേഷ്യത്തോടെ അടഞ്ഞ കണ്ണുകൾ തുറന്നു.
(ദേഷ്യത്തിന്റെ നിരാശയുടെ സങ്കടത്തിന്റെ ഭാവം മുഖത്തു പടരുന്നു.)

ഷോട്ട് 6 - Medium Shot - Mirror View
ഇരുട്ടിലും കണ്ണാടിക്കു മുന്നിലെ ചുവന്ന വെളിച്ചത്തിൽ അവളുടെ ദേഷ്യവും വിരക്തിയും വ്യക്തം.
വരവുകൾക്കും തിരക്കിട്ടിറങ്ങിപ്പോകലുകൾക്കുമിടയിൽ ശാന്തമാവുന്ന നിരാശാഭവത്തിലേക്ക് പതിയെ അവളുടെ മുഖഭാവം മാറുന്നു.

ഷോട്ട് 7 - Insert Shot
(അവളിൽ അടുത്തിരുന്ന ക്യാമറ അവളിൽ നിന്നും ദൂരേക്ക് ഒഴിഞ്ഞു മാറുന്നു, മുറികളിൽ ഇരുണ്ട ചുവന്ന വെളിച്ചം പതിയെ ഉയർന്നു പൊങ്ങുന്നു. കടലിന്റെ ശബ്ദത്തിന്റെ കൂടെ പ്രതിഷേധങ്ങളുടെ അലയൊലികൾ പിന്നിൽ മുഴങ്ങുന്നു.)

- ഉൾക്കടൽ -
(ടൈറ്റിൽ - ആ മുറികളിൽ അവളെ ചുറ്റികൊണ്ട് ക്യാമറ ചലിക്കുന്നു.)

ഷോട്ട് 8 - Medium Shot
ചുവപ്പും നീലയും കലർന്ന മങ്ങിയ വെളിച്ചത്തിൽ അവൾ തന്റെ മുഖം കണ്ണാടിയിൽ കണ്ടു ജയിലറകൾക്കുള്ളിൽ ഇട്ടതെന്നപോലെ.
(ജയിലഴികളുടെ പശ്ചാത്തലത്തിൽ അവൾ തന്റെ മുഖം കണ്ണാടിയിൽ കാണുന്നു. മുഖത്തെ ക്ഷീണം വ്യക്തം.)

ഷോട്ട് 9 - Insert - Closup
വാഷ് ബേസിലുള്ള പൈപ്പിൽ നിന്നും വീഴുന്ന വെള്ളത്തിലേക്ക് അവളുടെ കൈകൾ നീളുന്നു.

ഷോട്ട് 10 - Insert - Closup
(കണ്ണാടിക്ക് പുറത്തായി)
കൈകൾ കൊണ്ട് വെള്ളം മുഖത്തേക്ക് തെറിപ്പിക്കുന്നു.

ഷോട്ട് 11 - CloseUp - Mirror - Reaction Shot
തന്നെ തന്നെ നോക്കി നിൽക്കുന്നു.
(കണ്ണാടിയിൽ മുഖം വ്യക്തം. ഫ്രസ്‌ട്രേഷന്റെ സംഗീതം അവളുടെ കാതുകളിലേക്ക് കടന്നുവന്നുകൊണ്ട് കണ്ണാടിയിലെ അവളുടെ ദേഷ്യം കലർന്ന മുഖം അടുത്തേക്കായി വരുന്നു.)

ഷോട്ട് 12 - CloseUp - Mirror - Reaction Cut Shots
(അവളുടെ മുഖം അടുത്തേക്കായി വരുന്നതിനിടയിൽ)
ദേഷ്യം നിറഞ്ഞ മറ്റു പല പാതി മുഖങ്ങളും കണ്ണാടിയിൽ അവൾ കാണുന്നു.
ഫ്രസ്‌റ്റേഷനുകളുടെയും, ദേഷ്യത്തിന്റെയും, ഉപദ്രവത്തിന്റെയും, പീഡയുടെയും, അസഹ്യതയുടെയും കണ്ണുകൾ. തനിക്കു പരിചയമില്ലാത്ത പാതി മുഖങ്ങൾ.
ഫ്രസ്‌റ്റേഷനിൽ നിന്നും ഭയത്തിലേക്കു മാത്രമായി അവളുടെ കണ്ണുകൾ മാറി.

ഷോട്ട് 12 - CloseUp - Two Shot
ഫ്രസ്‌റ്റേഷനിൽ നിന്നും ഭയത്തിലേക്കു മാത്രമായി മാറിയ അവളുടെ കണ്ണുകൾ.

ഷോട്ട് 13 - Extreme CloseUp
കൈകളിൽ നിറഞ്ഞൊഴുകുന്ന വെള്ളം മുഖത്തേക്ക് ഒരു ഞെട്ടൽ പോലെ ഒഴുക്കി.
(കണ്ണാടിക്കു വെളിയിൽ)

ഷോട്ട് 14 - Extreme CloseUp - Zoom
വീണ്ടും അവൾ അവളുടെ കണ്ണുകൾ നോക്കി അൽപ്പനേരം കണ്ണാടിക്കുമുന്നിലായി തന്നെ നിൽക്കുന്നു.

ഷോട്ട് 15 - Extreme CloseUp - Zoom
"കടൽ" - അമ്മയുടെ പാകമാർന്ന വിളി.
നിശബ്ദതയിൽ ഉയർന്ന ശബ്ദത്തിൽ അവൾ ഞെട്ടുന്നു. കണ്ണുകൾ വിറങ്ങലിച്ചതു പോലെ.
അവളിലേക്ക് ക്യാമറ അടുക്കുന്നു.
(പിന്നിൽ നിശബ്ദമായി ഒഴുകുന്ന കടലിന്റെ ശബ്ദം - കണ്ണാടിക്കുള്ളിലേക്ക് ക്യാമറ കടന്നു ചെല്ലുന്നു.)

ഷോട്ട് 16 - Dutch Tilt
"കടൽ" - വീണ്ടും അമ്മയുടെ പാകമാർന്ന വിളി.
"ഉം" - അവൾ മൂളുന്നു. ഒരു തടവുകാരിയുടെ നിശ്വാസം.
(അവൾ തലയുയർത്തുന്നു.)

ഷോട്ട് 17 - Medium Shot - Back View
"കടൽ" - അമ്മ ആവർത്തിച്ച് വിളിക്കുന്നു.
"ഇനിയും മാറിയില്ലേ മോളെ പേടി..."

ഷോട്ട് 18 - CloseUp
"ഉം" - അവൾ മൂളുന്നു. (കണ്ണാടിക്കു വെളിയിൽ)
(കടൽ കണ്ണുകളടയ്ക്കുന്നു. തന്റെ ദിവസത്തെ പേടിപ്പെടുത്തുന്ന, ഫ്രസ്‌ട്രേഷനുണ്ടാക്കുന്ന യാത്രകളും മുഖങ്ങളും കടന്നുവരുന്നു.)

ഷോട്ട് 19
(കടലിന്റെ കണ്ണുകളിലൂടെ മാത്രം കാണുന്നു. - മെട്രോയിലെ കാഴ്ചകൾ)
അതികാലത്തുണരലുകൾക്കുശേഷമുള്ള യാത്രകൾക്കിടയിൽ എവിടെയോ!
തിരക്കുള്ള മെട്രോയിൽ തനിക്കു ചുറ്റും തന്നെ നോക്കുന്ന കണ്ണുകൾ. പല ഭാവങ്ങളിൽ തന്റെ നേർക്ക് പതിയുന്നു.
പുരുഷന്മാരും സ്ത്രീകളും. പല മുഖങ്ങളിൽ നിന്നും തന്റെ കണ്ണുകൾ മറ്റു കണ്ണുകളിലേക്ക് പറിച്ചു നടുന്നു.
എല്ലാം ഫ്രസ്‌റ്റേഷനുകളുടെയും, ദേഷ്യത്തിന്റെയും, ഉപദ്രവത്തിന്റെയും, പീഡയുടെയും, അസഹ്യതയുടെയും കണ്ണുകൾ, മുഖങ്ങൾ.

ഷോട്ട് 20 - CloseUp - POV Angle
തെരുവുകളിൽ നൃത്തം ചെയ്യുന്ന കാലുകൾ. 

ഷോട്ട് 21 - Wide 
കടുംവെളിച്ചം, ഉച്ചിയിലെത്തിയ സൂര്യൻ.
എങ്കിലും എല്ലായിടത്തും ഇരുട്ട്.

ഷോട്ട് 22 - Medium - POV Angle
മെട്രോയിൽ നിന്നും ഇറങ്ങുമ്പോൾ കയറാൻ നിൽക്കുന്നവരുടെ ഇടയിൽ നിന്നും ചിലരുടെ കണ്ണുകൾ കാണുന്നു.
തിരക്കുള്ള വെളിച്ചം വീഴാത്ത വഴികളിലും തന്റെ നേർക്ക് പതിക്കുന്ന കണ്ണുകൾ.

ഷോട്ട് 23 - CloseUp - Tilt - Mirror View
(കണ്ണാടിയിൽ)
"കടൽ" - വീണ്ടും അമ്മയുടെ പാകമാർന്ന വിളി.

ഷോട്ട് 24 - ClosUp
(കണ്ണാടിക്ക് പുറത്)
"ഉം" - അവൾ മൂളുന്നു. 

ഷോട്ട് 25 - CloseUp - Dutch Tilt - Mirror View
(കണ്ണാടിയിൽ)
"ഫ്രസ്‌ട്രേഷൻ മാത്രം ഉണ്ടായിട്ടു കാര്യമില്ലല്ലോ. പ്രതികരിക്കുകകൂടി വേണ്ടേ. എന്തിനോടായാലും. പ്രതികരിക്കാനൊക്കെ ശീലിക്കൂ, ഇനി അതൊരു ചെറു ചിരിയാണേൽ അങ്ങനെ."

ഷോട്ട് 26 - Medium Shot - Dolly
"മോളെ, ഈ ലോകത്ത്‌ സ്വയം ചിന്തിക്കാൻ കെൽപ്പില്ലാത്തവരുടെ കാട്ടിക്കൂട്ടലിൽ ആർക്കെങ്കിലും എന്തെങ്കിലും ഒക്കെ നഷ്ടപെട്ടിട്ടുണ്ടാവും."
(മുഖത്ത് സങ്കടം കലർന്ന ഭാവം)

അമ്മയൊരു കാര്യം കാര്യം പറയട്ടെ, തന്റെ ചെയ്തിയെയല്ലേ മറ്റുള്ളവർ പ്രതികരിക്കുക. നീയൊന്നു നിന്നെത്തന്നെ നോക്കി നോക്കൂ.."  - അമ്മ

ഷോട്ട് 27 - Dutch - Tilt 
അവൾ

ഷോട്ട് 28 - Medium Shot - Back View
"പ്രതികരിക്കേണ്ടത് നമ്മളാണ്. നമ്മളുടെ പ്രതികരണങ്ങൾ മറ്റുള്ളവർക്ക് കൂടി ഉപകാരപ്പെടുന്ന സമയങ്ങളുണ്ട്. കണ്ണുകളിലെ ശാന്തതപോലും.

ഷോട്ട് 29 - Medium Shot - Out Door
എല്ലായിടത്തും തലകുനിഞ്ഞുകൊണ്ട് പേടിച്ചരണ്ട ഭാവത്തിൽ അവൾ നിൽക്കുന്നു.
(മറ്റു കണ്ണുകളുടെ കാഴ്ചയിലൂടെ തന്നെ കാണുന്നു.)
താൻ കണ്ട എല്ലാവരുടെയും കണ്ണുകളിലൂടെ കടൽ തന്നെ കാണുന്നു.
വികൃതമായ തന്റെ മുഖം കാണുന്നു. ദേഷ്യവും, ദുഖവും നിറഞ്ഞ തന്റെ കണ്ണുകൾ, കാണുന്നു.
ദേഷ്യവും, ദുഖവും നിറഞ്ഞ വാർദ്ധക്യം ഏറിയ മറ്റു പല കണ്ണുകളും തന്റേതെന്നപോലെ കാണുന്നു.

ഷോട്ട് 30 - Medium Tilt
(എന്തോ ചിന്തിക്കുന്നതെന്നപോലെ കടൽ കണ്ണാടിക്കുമുന്നിൽ പുറം തിരഞ്ഞു നിൽക്കുന്നു.)
"നമുക്കൊക്കെ ഫ്രസ്‌ട്രേഷൻ കാണിക്കാനുണ്ട്, പ്രതികരിക്കാനുണ്ട്. പക്ഷെ അതെവിടെയാണ്.?"
ഉൾക്കടലിന്റെ കൂടെ തിരയൊന്നാഞ്ഞടിച്ചാൽ തീരാവുന്നതേയുള്ളു ഈ ലോകം. പക്ഷെ..!"
(പിന്നിൽ പ്രതികരണങ്ങളുടെ ഒച്ചപ്പാടുകൾ - അവൾ സോഫയ്ക്കരികിലേക്കായി നടക്കുന്നു.)

ഷോട്ട് 31 - Medium Tilt
സോഫയിലേക്ക് നടന്നെത്തി മലർന്നുകിടന്നുകൊണ്ട് പതിയെ ചിരിക്കുന്നു.
(വിരിഞ്ഞ ചുവന്ന പൂക്കൾ സോഫയ്ക്കരികിൽ.)
ചുവന്ന പൂക്കളുള്ള സോഫയിലെ വരികളിൽ അവളുടെ ശരീരം സന്തോഷത്തിലേക്ക് ട്രാക്ക് ചെയുന്നു. 
(ഒറ്റപ്പെടലിന്റെ, ഫ്രസ്‌ട്രേഷന്റെ, പേടിയുടെ ദൂരത്തിൽ എന്തൊക്കെയോ അകലുന്നു.അവളുടെ മുഖം പതിയെ സന്തോഷവുമായി കൂടി കലരുന്നു. മുറിയിൽ ചുവന്ന വെളിച്ചം പടരുന്നു.)

ഷോട്ട് 31 - Medium Track
"അതെ കടൽ, നമ്മുടെയൊക്കെ ഒരേയൊരാസക്തി നമ്മൾ മാത്രമായി മാറരുത്".


ഷോട്ട് 32 - Wide - Zoom
ചോരയുടെ, കിനാവുകളുടെ, നഷ്ടപെടലിന്റെ നഗരമാവുന്ന ആ മുറിയിൽ നിന്നും തിരക്കുള്ള മറ്റൊരു നഗരം ആ കണ്ണുകളിൽ കയറിയിറങ്ങുന്നു.
വെളിച്ചം പരന്ന നഗരത്തിന്റെ കാഴ്ചകളിൽ മെട്രോ പായുന്നു.
സോഫയിൽ കിടന്ന് മങ്ങിയ രീതിയിൽ ചിരിച്ചുകൊണ്ട് ദൃഢമായ സന്തോഷത്തിലേക്ക് നീങ്ങുന്നു.
(പതുങ്ങിയ ശബ്ദത്തിൽ എവിടെയോ സംഗീതം മുഴങ്ങുന്നു.-പ്രതികരിക്കേണ്ടുന്ന, സന്തോഷിക്കേണ്ടുന്ന - സ്വാതന്ത്ര്യത്തിന്റെ വരികൾ.)

സീൻ 2 

ഷോട്ട് 33 - Wide - Track
(കടലിന്റെ കാഴ്ചയിൽ)
ചോരയുടെ, കിനാവുകളുടെ, നഷ്ടപെടലിന്റെ നഗരമാവുന്ന ആ  മുറിയിലെ സോഫയിൽ വാർദ്ധക്യം നിറഞ്ഞൊരു സ്ത്രീ ഇരിക്കുന്നു. സ്ത്രീയിൽ നിന്നും വാതിലിനു പുറത്തേക്ക് കാഴ്ചകൾ നീളുന്നു.
(മുന്നിലുള്ള ടീപ്പോയുടെ മുകളിൽ പുസ്തകങ്ങൾ വാരി വലിച്ചിട്ടിരിക്കുന്നു.)

ഷോട്ട് 34 - Middle - Track
നിശബ്ദതയിൽ വാർദ്ധക്യം നിറഞ്ഞ സെക്യൂരിറ്റി ചിരിക്കുന്നു. കടലിനോടുള്ള മറുപടിയെന്നപോലെ.
(മതാചാരങ്ങളുടെ ചേഷ്ടകളിൽ നിന്നും ഒഴിഞ്ഞുമാറിയ സെക്യൂരിറ്റിയുടെ രൂപം)
അയാൾ ദൂരേക്ക് മറയുന്നു. (കടൽ ദൂരേക്ക്‌ നടക്കുന്നത് പോലെ).

ഷോട്ട് 35 - Wide - Out
വീണ്ടും ഉച്ചിയിലെത്തിയ സൂര്യൻ.
"തന്റെ മൗനമേതുവിധമെന്നറിയുന്നതതുമാത്രം,
തന്റെ എളിയ വാക്കുകൾ വരുന്നതെവിടുന്നെന്നും.
അനന്തം അഗാധം സ്വയം "

-End-