പിൻഗാമി

ആരാണ് ഞാൻ?
സ്വന്തം നിഴലിനെ നോക്കി ഇങ്ങനൊരു ചോദ്യം ചോദിക്കാത്ത ദിവസമില്ല ആ അരവട്ടൻ.

മൂളിക്കൊണ്ട് മറുപടി കേൾക്കുന്നത് പോലെ അൽപ്പ നേരം അങ്ങനെ നിന്ന് ഉറക്കെ ഉറക്കെ അയാൾ ചിരിക്കും, അങ്ങനെ അയാൾ സമൂഹത്തിൽ അറിയപെടുന്ന ഒരു വട്ടനായി മാറി.

പക്ഷെ കഥ അങ്ങനെയല്ല എന്നാൽ കേട്ടോ,
നിഴൽ മറുപടി പറയുന്നത് അയാൾക്ക്‌ മാത്രമേ കേൾക്കാൻ കഴിയു, അതറിയാതെ വിഡ്ഢികളായ സമൂഹ വാസികൾ അയാളെ വട്ടൻ എന്ന് വിളിക്കുന്നു, സമൂഹ വാസികൾ മുഴുവൻ വിഡികളാണെന്ന്  അയാൾക്കറിയാം; അത് കൊണ്ടാണല്ലോ വട്ടൻ എന്ന് വിളിക്കുമ്പോഴൊക്കെ വിളിക്കുന്നവരെ നോക്കി കണ്ണുകളിൽ പരിഹാസം കലർത്തി അയാൾ ഉറക്കെ ചിരിക്കുന്നത്.

ഒരിക്കൽ ഞാൻ അയാളോട് ചോദിച്ചു,
അങ്ങനൊരു ചോദ്യത്തിനു സ്വന്തം നിഴൽ നിങ്ങൾക്ക് എന്ത് മറുപടിയാണ് തരുന്നത്?

ആരാണ് ഞാൻ? അയാൾ പതിയെ പറഞ്ഞു,
ആരാണ് ഞാൻ? അയാൾ മുകളിലേക്ക് കൈകൾ ഉയർത്തി ഉറക്കെ ചോദിച്ചു,

മുന്നിലെ ചുവരിൽ തെളിയുന്ന സ്വന്തം നിഴലിലേക്ക് വിരൽ ചൂണ്ടി അയാൾ വീണ്ടും പതിയെയായി ചോദിച്ചു "ആരാണ് ഞാൻ"

അയാളുടെ ശബ്ധത്തിൽ ഇപ്പോൾ അതെനിക്ക് കേൾക്കാം, ആരോ പറയുന്നത് ഏറ്റു പറയുന്നത് പോലെ അയാൾ പറഞ്ഞു.

"നീ പിൻഗാമി,
മറ്റാരുടെയോ നിശ്വാസം വലിച്ചെടുത്ത്‌, മുൻഗാമികളുടെ രണ്ടു രേതെസ്സാൽ തീർത്ത ശരീരവുമായി, ആരൊക്കെയോ ചവച്ചു തുപ്പിയ വാക്കുകൾ വീണ്ടും വീണ്ടും ഉരുവിട്ട്, യാതൊരുവിധ തീരുമാനങ്ങളുമില്ലാതെ ജീവിതത്തിലെവിടെയോ നടന്നകലുന്നവൻ."

ആർക്കും മനസിലാവാത്ത വാക്കുകൾ എൻറെ മുഖത്തേക്ക് ചവച്ചു തുപ്പി ഉറക്കെ പൊട്ടിച്ചിരിച്ചുകൊണ്ട് അയാൾ, ആ വട്ടൻ, സ്വന്തം നിഴലിനു മുന്നിലേക്ക് നടന്നെത്താൻ ശ്രമിക്കുന്നു.